Ցավեր մեջքի շրջանում. ինքնօգնություն

Ցավեր մեջքի շրջանում. ինքնօգնություն
Անգլերեն անվանումը՝ Back Pain Self-help

Եթե դուք ունեք մեջքի ցավեր, կան մի շարք մեթոդներ և հնարքներ, որոնք կարող են օգնել ձեզ մինչև բժշկին դիմելը:

Սակայն հիշեք, որ մեջքի շրջանի ցավերը կարող են զարգանալ նաև այնպիսի հիվանդությունների ժամանակ, որոնց դեպքում դուք պետք է դիմեք վիրաբուժական կենտրոն:

Շարունակեք շարժվելը

  • Խուսափեք երկարատև անկողնային հանգստից. ակտիվ մարդիկ ավելի արագ են լավանում:
  • Փորձեք քայլել՝ ամեն օր մի փոքր ավելացնելով քայլքի երկարությունը: Օրինակ, կարող եք սկսել տան մեջ քայլելուց և հասնել մինչև ոտքով մոտակա խանութ գնալ-գալուն: Այս ընթացքում գուցե մի փոքր անհարմարություն զգաք: Ամեն դեպքում, խուսափեք այն ամենից, ինչը կարող է մեջքի ցավի սաստակցման պատճառ դառնալ:
  • Ամեն անգամ, երբ պետք է ֆիզիկական ակտիվություն դրսևորեք, մինչ այդ փորձեք կատարել մեղմ ձգող վաժություններ:
  • Խուսափեք ծարություններ բարձրացնելուց և մեծ ծավալի ու «անհարմար» շարժումներից:

«Տաք և սառը» բուժումներ

  • Ցավոտ շրջանը տաքացնելը կարող է մեղմացնել ցավերը (տաք ջրով լոգանք, ջեռակ):
  • Ցավոտ շրջանին սառը դնելը նույնպես կարող է օգտակար լինել (շորով փաթաթած սառույցի կտորներ, հաճախակի փոփոխվող սառը ջրով թրջոցներ և այլն):
  • Կարելի է նաև պարբերաբար տաք միջոցառումները փոխարինել սառով և հակառակը:

Տաքացնող և սառեցնող միջոցառումներին մի դիմեք, եթե գոտկատեղի, հետույքի կամ ոտքերի շրջաններում զգում եք թմրածություն:

Քնելու դիրքեր

Փոփոխելով քնելու դիրքը, դուք կարող եք ձեր մեջքն ազատել որոշ լարվածությունից և մեղմացնել ցավերը:

  • Եթե դուք քնում ենք մի կողմի վրա պառկած վիճակում, ապա փորձեք ձեր ոտքերը մի փոքր ծալել և մոտեցնել ձեր իրանին: Օգտակար կարող է լինել նաև այս դիրքում ոտքերի արանքը բարձ դնելը:
  • Եթե դուք քնում եք մեջքի վրա պառկած վիճակում, ապա ոչ մեծ բարձը դրեք ձեր ծնկների տակ:

Մի ընկճվեք

Ցավերին դիմակայելու հնարքներից է նաև դրանց վրա կենտրոնանալու փոխարեն շարունակել առօրյա կյանքով ապրելը:

Աշխատավայր

  • Եթե ձեր աշխատանքը պահանջում է երկար ժամանակ նստած մնալը, օգտագործեք գոտկային հենակով աթոռներ: Հակառակ դեպքում ձեր գոտկային շրջանի ետևը բարձ կամ փաթաթած սրբիչ դրեք:
  • Աշխատեք օգտվել այնպիսի աթոռից, որի վրա նստելիս ձեր ազդրերը կամ ծնկները շատ չեն սեղմվում:
  • Եթե ձեր աշխատավայրում դուք ստիպված եք երկար ժամանակ կանգնած մնալ, ժամանակ առ ժամանակ և փոխարինաբար ոտքերից մեկին հանգիստ տվեք:
  • Խուսափեք բարձրակրունկ կոշիկներից, առավել ևս, եթե ձեր աշխատանքը կապված է երկար ժամանակ ոտքի մնալու հետ:
  • Խուսափեք երկար ժամանակ անընդմեջ մի կողմի վրա թեքված կամ կռացած գործ անելուց:
  • Եթե ձեր աշխատանքը կապված է կրկնող շարժումների հետ, ժամանակ առ ժամանակ դադար վերցրեք (օրինակ՝ ամեն 10-15 րոպեն մեկ 30 վայրկյանով) և այս կարճ ժամանակում մի փոքր թուլացեք և հանգստացեք:

Ե՞րբ է պետք դիմել բժշկին

Որոշ դեպքերում ինքնօգնության հնարքների փոխարեն ավելի ճիշտ է դիմել բժշկին և լսել նրա խորհուրդները: Բժշկին դիմելու անհրաժեշտությունն առաջ է գալիս հետևյալ դեպքերում՝

  • եթե ցավերն անհանգստացնող են, ձեր բժիշկը կարող է խորհուրդ տալ, թե ինչ ցավազրկողներ կարելի է ընդունել
  • եթե ժամանակի ընթացքում ցավերը չեն մեղմանում, առավել ևս, եթե դրանք ավելի են սաստկանում
  • եթե մեջքի ցավերը բերում են ընդհանուր ինքնազգացողության վատթարացման և ուղեկցվում են մարմնի ջերմության բարձրացմամբ
  • եթե մեջքի ցավերն ուղեկցվում են հետույքի, շեքի, ոտքերի կամ ոտնաթաթերի շրջաննեում թմրածության զգացման հետ
  • անհապաղ կապ հաստատեք ձեր բժշկի հետ, եթե մեջքի ցավերն ուղեկցվում են աղիների գործունեության վրա ձեր վերահսկողության խանգարումներով:

Հոդվածը վերանայվել է՝ 27-05-2019