ՍՇՎՎ և գրիպ. վիրուսի տեսակները

ՍՇՎՎ և գրիպ. վիրուսի տեսակները
Անգլերեն անվանումը՝ Colds Types, Flu Types

Վերին շնչուղիերի սուր վիրուսային վարակները՝ «ընդհանուր մրսածությունը» և գրիպը հարուցվում են վիրուսների տարբեր տեսակներով:

Հարուցվելով տարբեր վիրուսներից, «ընդհանուր մրսածության» կամ սուր շնչառական վիրուսային վարակը (ՍՇՎՎ, ОРВИ) և գրիպը, փաստորեն, տարբեր հիվանդություններ են:

ՍՇՎՎ վիրուսների տեսակները

«Ընդհանուր մրսածությունը» կամ ՍՇՎՎ-ն կարող է պատճառվել ավելի քան 200 տեսակի վիրուսներից, որոնց մեծ մասը պատկանում է հետևյալ երկու խմբերից մեկնումեկին՝

  • ռինովիրուսներ
  • կորոնավիրուսներ:

Ելնելով այն փաստից, որ ՍՇՎՎ-ի պատճառ կարող են դառնալ վիրուսների բազմաթիվ տեսակներ, մի տեսակի վիրուսից առաջացած «մրսածությունը» կարող է փոխարինվել մեկ այլ տեսակի վիրուսով, այսպիսով, մի անձը կարող է տարվա ընթացքում ՍՇՎՎ-ով հիվանդանալ մի քանի անգամ:

Այս վիրուսները առաջացնում են քթի և ըմպանի լորձաթաղանթների բորբոքում և արդյունքում ձեզ մոտ ի հայտ են գալիս ընդհանուր մրսածությանը բնորոշ գանգատներ, օրինակ՝ ջերմություն, ֆարինգիտ («հիվանդ կոկորդ»), փակված կամ «հոսացող» քիթ և փռշտոցներ:

Գրիպի վիրուսի տեսակները

Գրիպը (ինֆլուենցա) հարուցվում է գրիպի A, B կամ հազվադեպ C տեսակի վիրուսներով: Գրիպի միայն A և B տեսակները կարող են առաջացնել մեծ բռնկումներ և ընթանալ ծանր, մինչդեռ C տեսակը հանդիպում է միայն երեխաների մոտ և բերում ավելի մեղմ՝ ՍՇՎՎ-ին նմանվող գանգատներ:

Գրիպով վարակված մարդկանց մեծ մասի մոտ հայտնաբերվում է A տեսակի վիրուսը, որն էլ պատասխանատու է պանդեմիաների (վարակի բռնկում և տարածում աշխարհով մեկ) և համաճարակների մեծ մասի համար (կոնկրետ ժամանակահատվածում վարակի բռնկում և տարածում որևէ մեկ համայնքում):

Դուք կարող եք գրիպի վիրուսով վարակվել տարվա բոլոր եղանակներին, սակայն ավելի հաճախ գրիպը տարածվում է ցուրտ՝ ձմռան ամիսներին:

Գրիպի A վիրուսը հանդիպում է կենդանական աշխարհի տարբեր ներկայացուցիչների մոտ, սակայն այս տեսակի համար բնական օջախ են համարվում ջրային թռչունները: Գրիպի A տեսակին են պատկանում ձեզ հավանաբար ծանոթ թռչնագրիպի և H1N1 (խոզի) վիրուսները:

Գրիպի B վիրուսը գլխավորապես հանդիպում է մարդկանց մոտ:

Գրիպի կանխարգելման մեթոդները կարող են ներառել՝

  • տարեկան պատվաստումներ
  • հակավիրուսային դեղեր, թեև դրանք արդյունավետ են, եթե դուք գրիպի վիրուսով կարող էիք վարակվել վերջին 48 ժամվա ընթացքում:

Հոդվածը վերանայվել է՝ 17-02-2020