Կորոնավիրուսային հիվանդություն 2019 (COVID-19)

Այս էջում դուք կգտնեք օգտակար և անհրաժեշտ տեղեկատվություն վերջին ամիսներին թեժ նորություններում մշտապես տեղ գտած Covid-19 կորոնավիրուսի և դրանով հարուցված հիվանդության վերաբերյալ:

Կորոնավիրուսային հիվանդություն 2019-ը կամ COVID-19-ը մարդկանց շրջանում կորոնավիրուսի վերջերս տարբերակված շտամ է, որն առաջին անգամ հայտնաբերվել է Չինաստանի Հուբեյի նահանգի Ուհան քաղաքում:

Կորոնավիրուսները վիրուսների մեծ ընտանիք են, որոնք կարող են առաջացնել սուր շնչառական վիրուսային վարակ (ՍՇՎՎ կամ ընդհանուր մրսածություն), իսկ հազվադեպ՝ նաև ավելի լուրջ հիվանդություններ, օրինակ՝ սուր ծանր շնչառական համախտանիշ (SARS) և մերձարևելյան շնչառական համախտանիշ (MERS):

COVID-19-ի վիրուսը հիմնականում փոխանցվում է օդակաթիլային ճանապարհով՝ վարակված մարդու փռշտոցի, հազի կամ արտաշնչման ժամանակ առաջացած կաթիլների միջոցով: Վարակված ծանր կաթիլները արագ ընկնում են գետնի կամ տարբեր մակերեսների վրա:

Դուք կարող եք վարակվել վիրուսը ներս շնչելու միջոցով, եթե գտնվում եք COVID-19-ով վարակված անձի հետ սերտ կամ անմիջական շփման գոտում՝ մոտ տարածության վրա, կամ վիրուսային կաթիլներով աղտոտված մակերեսներին՝ այնուհետև ձեր աչքերին, քթին կամ բերանին դիպչելու միջոցով:

Սերտ շփումը նշանակում է՝

  • դուք դեմ առ դեմ առնվազն 15 րոպե շփվում եք ինչ-որ մեկի հետ, ով վարակված է COVID-19 կորոնավիրուսով
  • դուք առնվազն 2 ժամ գտնվում եք փակ տարածքում մեկ այլ անձի հետ միասին, ով վարակված է COVID-19 կորոնավիրուսով:

Իմացե՛ք ավելին COVID-19-ի հարուցիչի և տարածման ուղիների մասին:

COVID-19 կորոնավիրուսային վարակի ամենահաճախ հանդիպող ախտանիշներից են՝ ջերմության բարձրացում, հազ կամ հարբուխ և ընդհանուր թուլության և հոգնածության զգացում: Վարակվելիս այս և մյուս գանգատները կարող են զարգանալ 2-ից մինչև 14 օրվա ընթացքում: Շատ հաճախ, հատկապես, երեխաների և գործանականում առողջ մարդկանց մոտ վարակը կարող է ընթանալ անախտանիշ: COVID-19 կորոնավիրուսային վարակը, սակայն, ծանր ընթացք կարող է ստանալ այսպես կոչված «բարձր ռիսկի» խմբերում, որոնք պատկանում մեծ տարիքով կամ քրոնիկ հիվանդություններով մարդիկ:

Իմացե՛ք ավելին COVID-19-ի գանգատների և ախտանիշների մասին:

Եթե ձեզ մոտ զարգացել են շնչառության հետ կապված խնդիրներ, ապա անհապաղ զանգեք 1-03 և կանչեք շտապբուժօգնություն: Զանգելիս նշեք հավանական վարակման մասին:

Նույն կերպ, եթե դուք ինքներդ եք այցելում որևէ բուժհաստատություն կամ ձեր ընտանեկան բժշկին, գանգատներից բացի ներկայացրեք նաև հավանական վարակման վերաբերյալ որոշ անհրաժեշտ տվյալներ:

Ցանկացած վարակային հիվանդությունից խուսափելու լավագույն ճանապարհը վարակված անձանց հետ շփումը բացառելը կամ կտրուկ սահմանափակելն է: Մասնավորապես, դուք կարող եք՝

  • հաճախակի ախտահանել ձեր ձեռքերը՝ լվանալ ձեռքերը օճառով և ջրով կամ ախտահանել ալկոհոլ պարունակող միջոցներով
  • անվտանգ տարածություն պահել այն մարդկանցից, որոնք փռշտում կամ հազում են
  • եթե ֆիզիկական հեռավորությունն անհնար է պահպանել, դիմակ կրել
  • չդիպչել ձեր աչքերին, քթին կամ ականջներին:
  • փռշտալու կամ հազալու ժամանակ փակել քիթը և բերանը ծալված արմունկով կամ անձեռոցիկով
  • մնալ տանը, եթե ձեզ լավ չեք զգում
  • ջերմություն, հազ և դժվարացած շնչառություն ունենալիս դիմել բժշկական օգնության:

Դիմակը կարող է կանխել վարակի փոխանցումը դիմակ կրողից այլ անձանց։ Սակայն, դիմակ կրելն առանձին վերցրած չի պաշտպանում COVID-19-ից, և պետք է զուգորդվեն ֆիզիկական հեռավորություն պաշտպանելու և հիգիենայի կաննոնները պահպանելու հետ։

Իմացե՛ք ավելին COVID-19-ի կանխարգելման հմտությունների մասին:

COVID-19 կորոնավիուսային վարակի դեմ որևէ հատուկ բուժում գոյություն չունի: Վիրուսային վարակի բուժումը ներառում է միայն կանխարգելիչ մեկուսացումը և գանգատները մեղմացնող ախտանիշային միջոցները: Հակաբիոտիկները վիրուսների վրա չեն ազդում: Ուշադիր եղեք, որպեսզի չընկնեք կորոնավիրուսային վարակի բուժում երաշխավորող գովազդային ծուղակը: Հետևեք միայն ձեր բժշկի խորհուրդներին ու նշանակումներին:

Իմացե՛ք ավելին COVID-19-ի բուժման մեթոդների մասին:

Ներկա պահին Ամերիկյան Սննդի և դեղերի գործակալությունը (FDA) անհետաձգելի օգտագործման թույլատվություն է տվել COVID-19-ի երեք տարբեր արտադրողների պատվաստանյութերին` Pfizer-BioNTech, Moderna և Janssen/Johnson & Johnson: Ռուսաստանի Դաշնությունը հաջողությամբ օգտագործում է Sputnik-V պատվաստանյութը, որը մատչելի է նաև Հայաստանում:

Հոդվածը վերանայվել է՝ 04-07-2021