Ականջի վարակ

Ականջի վարակ

Ականջի վարակները հաճախ հանդիպող առողջական խնդիրներ են, որոնք ավելի տարածված են երեխաների շրջանում։

Ներթափանցելով ականջ, վարակն առաջացնում է ականջացավ և լսողության հետ կապված ժամանակավոր խնդիրներ։

Ականջի վարակները սովորաբար լավանում են ինքնուրույն, մեկ կամ երկու շաբաթվա ընթացքում, սակայն երբեմն կարիք է լինում նախաձեռնել հակաբիոտիկներով բուժում՝ միայն բժշկի նշանակմամբ։ Դուք կամ ձեր երեխան կարող եք նաև սովորական ցավավազրկողների կարիք ունենալ։ Որոշ երեխաների մոտ, հատկապես ականջի կրկնակի վարակներից հետո կարող են զարգանալ լսողության երկարաժամկետ խնդիրներ։ Նման դեպքերում բժիշկը կարող է առաջարկել վիրահատական բուժում։

Որոշ դեպքերում նաև կարող է առաջանալ թմբկաթաղանթի պատռում, որը թուլացնում է միջին ականջում բարձր ճնշումը և ինքնուրույն լավանում է մի քանի օրվա ընթացքում։ Դիմեք ձեր բժշկին, եթե գանգատները չեն բարելավվում, դուք կամ ձեր երեխան նշում եք սաստիկ ականջացավեր կամ ականջներից հոսում է հեղուկ կամ թարախ։

Ըստ միջազգային տարբեր ուղեցույցների, խորհուրդ է տրվում 2-12 տարեկան երեխաների մոտ միջին ականջի վարակը չբուժել հակաբիոտիկներով, քանի դեռ չեն առաջացել մարմնի ջերմության բարձրացում և ինքնազգացողության վատացման այլ նշաններ։

Ի՞նչ է ականջի վարակը

Կան ականջի վարակային բորբոքման տարբեր տեսակներ, սակայն ամենահաճախ հանդիպողը միջին ականջի վարակն է (միջին օտիտ)։ Նորածինները և մանկահասակ երեխաները միջին օտիտի նկատմամբ ունեն առանձնահատուկ հակվածություն։

Մյուս հաճախ հանդիպող տեսակը արտաքին ականջի վարակն է (արտաքին օտիտ), որի ժամանակ վարակային բորբոքումն ընդգրկում է արտաքին լսողական ուղին։ Արտաքին օտիտն ավելի հաճախ զարգանում է լողալուց կամ լողանալուց հետո ականջներում մնացած ջրից (հայտնի է նաև որպես «լողորդների ականջ»):

Ականջի վարակները կարող են պատճառվել վիրուսներով կամ բակտերիաներով։

Ականջի վարակային բորբոքումից հետո երեխան կարող է դրսևորել կամ նշել լսողության հետ կապված խնդիրներ, որոնք կարող են տևել 2-6 շաբաթ։ Եթե լսողության նվազումը պահպանվում է ավելի երկար, դիմեք ձեր բժշկին։

Ականջի վարակի ախտանիշները

Ականջի վարակային բորբոքումները կարող են ընթանալ հետևյալ նշաններով՝

Նորածինների և մանկահասակ երեխաների մոտ կարող են ի հայտ գալ հետևյալ նշանները՝

  • ձեռքը տանում է դեպի հիվանդ ականջը կամ քորում այն
  • բարձր ջերմություն (38°C կամ ավելի)
  • ականջի շուրջը կարմրություն
  • լաց, անհանգստություն կամ գերգրգռված վիճակ
  • սովորաբար երեխայի ուշադրությունը գրավող ձայների կամ աղմուկների նկատմամբ անտարբերություն։

Ականջի վարակի կանխարգելումը

Միջին ականիջի վարակները հաճախ զարգանում են ընդհանուր մրսածությանն ուղեկցող քթի փակվածության պատճառով («քթային կանգ»)։ Երեխաների մոտ ականջի վարակման ռիսկը կարող է նվազեցվել, եթե հոգ տանեք, որ լողավազաններից օգտվելիս կրեն ականջները փակող պաշտպանիչ միջոցներ կամ դրանից հետո պատշաճ կերպով չորացնեն ականջները։

Հաճախակի կրկնվող ականջի վարակների դեպքում բժիշկը հավանաբար խորհուրդ կտա կանխարգելիչ այլ՝ հատուկ միջոցներ։

Ահա որոշ խորհուրդներ ևս՝

  • ձեր ականջների մեջ մի՛ դրեք ոչ մի բան (օրինակ՝ բամբակե խցան), նույնիսկ եթե ձեր այն «փակված է» կամ ցավում է
  • մի՛ օգտագործեք ականջի կաթիլներ, քանի դեռ այն չի նշանակել ձեր բժիշկը։

Այցելեք ձեր բժշկին, եթե ականջացավը տևական է, աստիճանաբար սաստկանում է և ուղեկցվում է ինքնազգացողության վատացմամբ կամ բարձր ջերմությամբ։

Հոդվածը վերանայվել է՝ 22-03-2021