Գաստրիտ. բուժում

Ախտորոշված գաստրիտի բուժումը սովորաբար կախված է այն առաջացնող պատճառից։

Բժիշկը կարող է ձեզ նշանակել ինչպես դեղատոմս չպահանջող, այնպես էլ դեղատոմսով դուրս գրվող դեղեր և խորհուրդ տալ բուժմանը նպաստող ապրելակերպի, հատկապես սննդակարգի բարեփոխումներ։

Գաստրիտի բուժման ամենահաճախ կիրառվող մեթոդներից են՝

• որոշ հակաբիոտիկների զուգակցում, որոնք կարող են վերացնել գաստրիտի հիմնական պատճառներից մեկը համարվող «հելիկոբակտեր պիլորի» բակտերիան (H. pylori) (հիշեք, որ եթե բժիշկը նշանակել է այս բուժումը, ապա կարևոր է, որ հակաբիոտիկների ընդունումը շարունակեք մինչև վերջ)
• որոշ դեղերի նշանակում, որոնք նվազեցնում են ստամոքսի կողմից աղաթթվի արտադրությունը, ինչն էլ նպաստում է, որ ստամոքսի լորձաթաղանթը «հանգստանա» և վերականգնվի
• անտացիդների նշանակում, որոնք չեզոքացնում են ստամոքսում առկա ավելցուկային թթուն (այս դեղերը պետք է ընդունվեն այլ դեղերից առանձին, հարցրեք այս մասին ձեր բժշկին)։

Գաստրիտի բուժման հիմքում ընկած են նաև ապրելակերպի բարեփոխումները, որոնք մի կողմից նպաստում են դեղորայքային բուժման արդյունավետության բարձրացմանը և մյուս կողմից կանխարգելում ստամոքսի լորձաթաղանթի հետագա գրգռումն ու բորբոքումը։ Դուք կարող եք փորձել՝

• սնունդ ստանալ փոքր չափաբաժիններով, սակայն ավելի հաճախակի
• խուսափել ստամոքսը գրգռող սննդից, օրինակ՝ կծու, թթու (ցիտրուսներ և լոլիկներ), տապակած կամ ճարպոտ սննդատեսակներ
• խուսափել ալկոհոլից
• խուսափել ոչ ստերոիդային հակաբորբոքային դեղերից (ՈՍՀԲԴ) (հարցրեք ձեր բժշկից այլընտրանքային ցավամոքիչ դեղերի մասին)
• խուսափել կամ կրճատել սթրեսը։

Եթե կարծում եք, որ բուժումը չի մեղմացնում ձեր գանգատները, առանց ուշացնելու տեղեկացրեք այդ մասին ձեր բժշկին։