Վարակային մոնոնուկլեոզ. ախտանիշներ

Վարակային կամ ինֆեկցիոն մոնոնուկլեոզը նշագեղձերի և պարանոցի ավշային գեղձերի ախտահարմամբ ընթացող վիրուսային վարակ է:

Վարակային մոնոնուկլեոզը, հատկապես երեխաների մոտ կարող է ընթանալ առանց որևէ գանգատների: Սակայն, որոշ դեպքերում հիվանդությունը կարող է սկսվել վարակային ըմպանաբորբին նմանվող նշաններով, այդ թվում՝

• բարձր ջերմություն (տենդ)՝ 38ºC կամ ավելի բարձր
• պարանոցի ավշային գեղձերի այտուցվածություն
• ըմպանում ցավեր
• ընդհանուր հոգնածության զգացում։

Սակայն, ի տարբերություն այլ վիրուսային ըմպանաբորբերին, վարակային մոնոնուկլեոզի ժամանակ գանգատները ոչ թե մի քանի օրվա ընթացքում աստիճանաբար մեղմանում են, այլ շարունակվում են 2-3 շաբաթ, իսկ պարանոցային ավշագեղձերի այտուցվածությունը և ընդհանուր հոգնածությունը՝ ավելի երկար (2-3 ամիս կամ ավելի)։

Վարակային մոնոնուկլեոզը կարող է ուղեկցվել նաև այլ գանգատներով, այդ թվում՝

• նուրբ վարդագույն ցան, հատկապես հակաբիոտիկներ ընդունելուց հետո
• փայծաղի մեծացում (սպլենոմեգալիա)
• լյարդի այտուցվածություն և ցավոտություն (հեպատոմեգալիա), որը կարող է բերել նաև դեղնուկի։

Մարդկանց մեծ մասի մոտ վարակային մոնոնուկլեոզը լիարժեքորեն անհետանում է։

Ե՞րբ դիմել բժշկին

Եթե հիվանդության գանգատները երկարաձգվում են և առկա է ինքնազգացողության անհանգստացնող վատթարացում, առանց ուշացնելու այցելեք ձեր բժշկին։ Վարակային մոնոնուկլեոզի ախտորոշումը սովորաբար հաստատվում է արյան հետազոտությամբ։