Լեյկոզ. բուժում

Լեյկոզ. բուժում

Լեյկոզի բուժմամբ սովորաբար զբաղվում են արյունաբանները (հեմատոլոգ), ովքեր կարող են ներգրավել նաև այլ այլ բժիշկ-մասնագետների։

Լեյկոզի բուժումը կախված է հիվանդի տարիքից, ընդհանուր առողջական վիճակից, լեյկոզի տեսակից, ախտանիշների արտահայտվածությունից և կլինիկական ընթացքից։

Սուր լեյկոզով մարդկանց մեծ մասի բուժումը սկսվում է անմիջապես ախտորոշումից հետո, մինչդեռ քրոնիկ լեյկոզով մարդիկ տարիներ շարունակ կարող են և բուժման կարիք չունենալ։

Սուր լեյկոզի բուժումները

Սուր լեյկոզի բուժման մեջ օգտագործվում են մի շարք ժամանակակից մոտեցումներ, որոնցի ավելի հաճախ կիրառվում են հետևյալ մեթոդները՝

  • քիմիոթերապիա, երբ նշանակվում են քաղցկեղային բջիջները ոչնչացնող դեղեր (ներերակային, ենթամաշկային ներարկումներ կամ հաբեր)
  • «թիրախային բուժում», երբ դեղերը «գրոհում» են քաղցկեղային բջիջները՝ հնարավորինս քիչ ազդելով առողջ բջիջների վրա, որի շնորհիվ ստացվում են ավելի քիչ կողմնակի ազդեցություններ, քան քիմիոթերապիայի դեպքում
  • ճառագայթային բուժում, երբ քաղցկեղային բջիջները ոչնչացվում են ճառագայթման միջոցով
  • ցողունային բջիջների կամ ոսկրածուծի փոխպատվաստում, երբ քիմիոթերապիայից հետո ոսկրածուծում ներդրվում են ցողունային բջիջներ
  • ռետինոիկ թթու, որը հանդիսանում է վիտամին A-ի տարատեսակը և նշանակվում է սուր պրոմիեոցիտային լեյկոզի բուժման մեջ։

Քրոնիկ լեյկոզի բուժումները

Քրոնիկ լեյկոզի բուժումը կարող է ներառել սուր լեյկոզի բուժման տարբերակները, ինչպես նաև՝

  • հիվանդության հսկողություն և բուժման հետաձգում, մինչև դրա անհրաժեշտությունը կառաջանա
  • անհրաժեշտության դեպքում փայծաղի հեռացում
  • կենսաբանական բուժում, օրինակ՝ հակաքաղցկեղային ազեդեցությամբ ինտերֆերոնային բուժում
  • «թիրախային» բուժում, որն ազդում է քաղցկեղային բջիջների վրա, օրինակ՝ Imatinib և Dasatinib:

Բուժման կողմնակի ազդեցություններ

Լեյկոզի բուժումները կարող են առաջացնել տարբեր անցանկալի ազդեցություններ։ Օրինակ, քիմիոթերապիան կարող է առաջացնել նողկանք և փսխում, ընդհանուր հոգնածություն, մազաթափություն, լուծ, փորկապություն և ստոմատիտ։ Ինտերֆերոնը կարող է զարգացնել գրիպանման ախտանիշներ կամ այլ կողմնակի ազդեցություններ՝ մկանացավեր և ախորժակի անկում, իսկ ռետինոիկ թթուն՝ գլխացավ, մաշկի և բերանի խոռոչի չորություն, ոսկրացավեր։ Ցողունային բջիջների փոխպատվաստումը նույնպես կարող է առաջացնել անցանկալի ազդեցություններ՝ մաշկային կապտուկների հեշտ առաջացումից սկսած մինչև արյունահոսություններ, ընդհանուր թուլություն և բերանի խոռոչի վարակային հիվանդություններ։

Նման դեպքերում բժիշկը կարող է նշանակել լեյկոզի բուժման կողմնակի ազդեցությունները մեղմացնող դեղեր։

Հոդվածը վերանայվել է՝ 21-04-2019