Կաթնախտ. բուժում

Կաթնախտ. բուժում

Բերանի խոռոչի կանդիդոզի բուժման նպատակը կանդիդա սնկիկների արագ տարածումն արգելակելն է, սակայն լավագույն մոտեցումը կարող է կախված լինել ձեր տարիքից, ընդհանուր առողջական վիճակից և վարակի պատճառից:

Հնարավորության դեպքում վերացնելով կանդիդոզի պատճառը կարելի է կանխարգելել վարակի կրկնությունները:

  • Առողջ չափահասներ և երեխաներ. բժիշկը կարող է խորհուրդ տալ հակասնկային դեղամիջոցներ: Դրանք վաճառվում են տարբեր դեղաձևերով՝ լուծույթներ, հաբեր կամ հեղուկ, որով ողողում եք բերանը և հետո կուլ տալիս: Եթե այս տեղային ազդեցության դեղամիջոցները արդյունավետ չեն, բժիշկը կարող է նշանակել ընդհանուր ազդեցության հակասնկային դեղամիջոցներ (ազդում են ամբողջ օրգանիզմի վրա):
  • Նորածիններ և կերակրող մայրեր. եթե դուք կրծքով կերակրող մայր եք և ձեր նորածին երեխան ունի բերանի խոռոչի կանդիդոզ, վարակը կարող է ձեր միջև «շրջագայել»: Բժիշկը կարող է ձեր երեխային նշանակել որևէ թույլ հակասնկային դեղամիջոց, իսկ ձեզ՝ կրծքերն օծելու հակասնկային կրեմ:
  • Թուլացած իմունային համակարգով չափահասներ. ավելի հաճախ բժիշկը խորհուրդ կտա ընդհանուր ազդեցության հակասնկային դեղամիջոցներ:

Կաթնախտը կարող է «վերադառնալ» նույնիսկ բուժվելուց հետո, եթե դրա առաջացման պատճառը, օրինակ՝ վատ ախտազերծվող ատամնապրոթեզի կամ ներշնչման ստերոիդների օգտագործումը չի դադարեցվել:

Հոդվածը վերանայվել է՝ 06-04-2021