Գերձայնային հետազոտությունը հղիության ընթացքում

2 րոպե

Հղիության ընթացքում գերձայնային հետազոտությունն օգտագործում է գերձայն (ուլտրաձայն), որ ստացվի ձեր արգանդում զարգացող երեխայի սոնոգրաֆիկ պատկերը:

Այդ պատկերը ցուցադրվում է սարքի էկրանին, որը դուք ևս կարող եք տեսնել:

Գերձայնային հետազոտությունը կամ սոնոգրաֆիան անցկացվում է բժիշկ–մասնագետի՝ սոնոգրաֆիստի կողմից: Գերձայնային հետազոտությունն անցավ է և որևէ վտանգ չի ներկայցնում ոչ ձեզ, ոչ էլ ձեր երեխային: Այն թույլ է տալիս հսկել երեխայի ներարգանդային զարգացումը նրա աճի և զարգացման տարբեր փուլերում:

Մինչև հղիության ընթացքում գերձայնային հետազոտության տեսակների նկարագրության անցնելը ընդգծենք, որ սոնոգրաֆիան կարող է հաստատել հղիության փաստը և հայտնաբերել (կամ հերքել) արտաարգանդային հղիությունը:

Որո՞նք են հղիության ընթացքում գերձայնային հետազոտության տեսակները

Հղիության ընթացքում ըստ օգտագործման նպատակի կարելի է առանձնացնել գերձայնային հետազոտության երեք հիմնական տեսակ:

• Ժամկետի սքանավորումը կարող է օգտագործվել հղիության ժամկետը հաստատելու համար, եթե դուք համոզված չեք ձեր վերջին դաշտանային ցիկլի կամ բեղմնավորման օրվա վերաբերյալ: Այս հետազոտությունը սովորաբար իրականացվում է հղիության 10-ից մինչև 13-րդ շաբաթվա ընթացքում, սակայն կարող է անցկացվել նաև 6-րդ շաբաթականից սկսած ցանկացած ժամանակ: Ընդունված է, որ գերձայնային հետազոտությամբ հղիության ժամկետը որոշելն ավելի ճշգրիտ է, քան դաշտանային վերջին ցիկլով հաշվարկը:
• Օձիքային տարածության սքանավորումը կարող է առաջարկվել, որ գնահատվի ձեր երեխայի մոտ քրոմոսոմային արատի առկայության ռիսկը: Այս նպատակի համար չափվում է սոնոգրաֆիական ցուցանիշ հանդիսացող «օձիքային գործակիցը» (հեղուկի կուտակում պտղի պարանոցի հետին մակերեսի մաշկի տակ): Այս հետազոտությունը կարող է անցկացվել ժամկետի սքանավորման հետ միաժամանակ:
• Մորֆոլոգիական (կառուցվածքաբանական) կամ անատոմիական սքանավորումը կատարվում է, որպեսզի մանրակրկիտ ուսումնասիրվի երեխայի մարմինը, նկարագրվի ընկերքի դիրքը, զննվի պորտալարը, երեխային շրջապատող ամնիոտիկ հեղուկը, ձեր արգանդը և պարանոցը: Սոնոգրաֆիայի այս տեսակը սովորաբար անցկացվում է հղիության 18-22 շաբաթականում և կարող է ուղեկցվել դոպլերոգրաֆիայով, երբ գնահատվում է արգանդային արյան հոսքը, պտղի և պորտալարի արյան շրջանառության վիճակը: Այս հետազոտությունները թույլ են տալիս վաղ հայտնաբերել պտղի թթվածնաքաղցը:

Երբեմն հղիության ընթացքում գերձայնային հետազոտությունները կարող են անցկացվել ավելի հաճախակի: Օրինակներից են՝

• դուք ունենալու եք երկվորյակ կամ եռորյակ երեխաներ
• դուք ունեք հղիության որևէ բարդություն
• բժիշկն անհանգստացած է ձեր երեխայի առողջությամբ:

Ինչպե՞ս է իրականացվում հետազոտությունը

Հղիության 10-րդ շաբաթից հետո անցկացվող գերձայնային հետազոտությունների մեծ մասը կատարվում է որովայնային մոտեցմամբ, երբ սոնոգրաֆիստը ձեր որովայնի ստորին շրջանի պատին օծում է քիչ քանակով գել (ժելեանման անվնաս նյութ) և տվիչով (датчик) սկսում է մեղմ շփել կամ տրորել ձեր մաշկը, որ էկրանին տեսնի անհրաժեշտ սոնոգրաֆիկ պատկեր:

Ձեր հղիության առաջին եռամսյակում անցկացվող որովայնային գերձայնային հետազոտությունից առաջ սոնոգրաֆիստը կարող է խնդրել, որ խմեք մի քանի բաժակ ջուր: Սա լցնում է ձեր միզապարկը և արգանդը կոնքահատակից բարձրացնում վերև՝ թույլ տալով ստանալ երեխայի և արգանդի ավելի հստակ սոնոգրաֆիկ պատկեր:

Երբեմն սոնոգրաֆիստը կարող է առաջարկել հեշտոցային (վագինալ) սոնոգրաֆիա, որի ժամանակ բարակ գլանաձև տվիչը տեղադրվում է ձեր հեշտոցի խոռոչում: Հեշտոցային սոնոգրաֆիան կարող է խորհուրդ տրվել, եթե՝

• ձեր հղիությունը 8 շաբաթականից ցածր է
• դուք ունեք ավելցուկային քաշ կամ գեր եք
• ձեր երեխան որովայնում ունի խոր ընկած դիրք:

Իմացե՛ք ավելին պտղի գերձայնային հետազոտության մասին: