Գրադարան

Տագնապը երեխաների մոտ

Տագնապը երեխաների մոտ

Time Read 3 րոպե

Տագնապը կյանքի նորմալ բաղադրիչներից մեկն է և կարող է ազդել բոլորի, այդ թվում՝ երեխաների վրա։

Սակայն, ծնողների կամ խնամողների համար երբեմն շատ դժվար է լինում երեխայի մոտ նորմալ անհանգստությունը տարբերել ավելի լուրջ՝ «հիվանդագին» տագնապից։

Տագնապը մանկական տարիքում

Տագնապը մանկության նորմալ բաղադրիչներից մեկն է։ Մեծամասամբ, երեխաների մոտ տագնապը կարճատև կյանք ունի և որոշ ժամանակ անց անհետանում է։ Երեխայի մոտ նորմալ անհանգստության օրինակներից են՝

  • ամաչելը կամ անհանգստանալը, որ իր վրա կծիծաղեն կամ կծաղրեն
  • մսուր-մանկապարտեզում կամ նախակրթարանում ծնողից բաժանվելուց առաջ կամ հետո տխրելը
  • դպրոցում հանձնարարված տնային աշխատանքի համար անհանգստանալը։

Սակայն որոշ երեխաների մոտ տագնապի վիճակը լինում է ավելի բուռն կամ ավելի հաճախակի, քան մյուսների մոտ, որի պատճառով նրանց մանկությունը դառնում է լարված և սթրեսային։

Երեխաների մոտ տագնապի նշանները

Եթե երեխան հաճախակի տագնապած է, նա կարող է՝

  • փորձել խուսափել այն իրավիճակից կամ խնդրից, որից անհանգստանում է
  • հաճախ ունենալ գլխացավեր և ստամոքսի ցավեր, հատկապես տնից հեռու գտնվելիս
  • ունենալ քնի հետ կապված դժվարություններ կամ գիշերային «վատ» երազներ
  • հաճախակի և անառիթ անհանգստանալ
  • պահանջել բազմաթիվ երաշխիքներ կամ բազմաթիվ մարդկանց համոզող խոսքեր։

Տագնապով երեխաների աջակցությունը

Դուք կարող եք աջակցել ձեր երեխային հետևյալ հնարքներով՝

  • ցույց տվեք երեխային, որ հասկանում եք նրա վախը և մի անտեսեք կամ արհամարհեք նրա անհանգստությունները
  • նրբանկատորեն քաջալերեք ձեր երեխային, որ նա անի բաներ, որից վախենում է
  • համբերեք, մինչև ձեր երեխան իրոք հասնի տագնապի մակարդակ, նոր սկսեք նրան օգնել (թույլ տվեք, որ ինքնուրույն փորձի և համոզվի իր վախերի անհիմն լինելու մեջ)
  • գովեք ձեր երեխային, երբ նա անում է բաներ, որից նախկինում վախենում և խուսափում էր
  • մի պիտակավորեք ձեր երեխային («ամոթ քեզ», «վախկոտ»)։

Երեխաների մոտ տագնապի բուժումը

Երեխաների հոգեկան առողջությունը կարևոր է այնքան, որքան ֆիզիկականը։ Եթե դուք անհանգստացած եք ձեր երեխայի մոտ հոգեկան առողջության հավանական որևէ խնդրից, դիմեք ձեր բժշկին, հոգեբանին կամ հոգեկան առողջության ծառայությանը։ Որոշ երեխաների մոտ կարող է ախտորոշվել որևէ տագնապային խանգարում, օրինակ՝

  • ֆոբիաներ
  • գեներալիզացված տագնապի խանգարում
  • բաժանման տագնապ։

Ծանր տագնապով երեխաների համար կարող են օգտակար լինել հոգեբանական բուժումները (հոգեթերապիա), օրինակ՝ կոգնիտիվ-վարքաբանական թերապիան կամ, հազվադեպ, դեղերը։

Հոդվածը տեղադրվել է՝ 08-05-2019 վերանայվել է՝ 25-03-2024

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով