Տագնապ - Դեռահասների առողջություն

Անհանգստությունը և տագնապը կյանքի նորմալ մասն են և կարող են առաջանալ յուրաքանչյուր մարդու, առավել ևս՝ դեռահասի մոտ:

Սակայն, երբեմն տագնապի զգացումը դառնում է գերիշխող և մշտական, ինչը հավանաբար վկայում է ոչ թե պարզապես անհանգստության դրվագի, այլ ավելի լուրջ վիճակի՝ տագնապային խանգարման մասին:

Այնուամենայնիվ, բուժման, ընտանիքի ու ընկերների օգնությամբ տագնապը կարող է դառնալ կառավարելի:

Ի՞նչ է տագնապային խանգարումը

Տագնապը զգացում է, որն առաջանում է, երբ դուք զգում եք ներքին լարվածություն, շնչում եք քիչ ավելի արագ և ձեր սրտազարկերը սկսում են հաճախանալ, և երբ դուք խիստ անհանգստացած եք այն իրավիճակից, որում հայտնվել եք կամ կարող եք շուտով հայտնվել:

Ժամանակ առ ժամանակ ի հայտ եկող անհանգստության դրվագը նորմալ երևույթ է, հատկապես դեռահաս տարիքում: Այն կարող է օգնել, որ տղան կամ աղջիկը դպրոցի, սպորտի կամ աշխատանքի նկատմամբ լցվեն լրացուցիչ շարժառիթներով: Տագնապի ու վախի զգացումը նաև կարող է դեռահասներին (և բոլորին) հեռու պահել վտանգավոր իրավիճակներից և վարքագծերից:

Սակայն, երբ վախով ու տագնապով լի զգացումը չի անհետանում, կարող է դեռահասներին խանգարել նրանց կյանքի գրեթե բոլոր ոլորտներում՝ ընտանիք, դպրոց և ուսումնառություն, ընկերական շրջապատ, շփումներ և փոխհարաբերություններ:

Իմացե՛ք ավելին տագնապային խանգարման մասին:

Ինչպե՞ս է տագնապն ազդում դեռահասների վրա

Երեխաների և դեռահասների մոտ տագնապային խանգարումները կարող են առանձնահատուկ լուրջ ընթացք ստանալ, քանի որ նրանք դեռևս գտվում են աճի և զարգացման փուլում: Ուշադրությունից և բուժումից դուրս թողնելիս տագնապային խանգարումը կարող է դեռահասի վրա թողնել երկարատև հետևանքներ, որոնք շարունակվում և հասնում են մինչև հասուն տարիք:

Տագնապային խանգարման նշաններն են՝

• մշտական աժիտացիայի (հոգեշարժական գրգռվածության), լարվածության կամ անհանգստության զգացումներ
• ֆիզիկական նշաններ, օրինակ՝ մկանային ցավեր, սրտխփոց, քրտնարտադրություն, գլխացավեր կամ ստամոքսի ցավ
• քննադատության նկատմամբ զգայուն վիճակ կամ չափից դուրս ամաչկոտություն
• ինչ-որ մոտալուտ վատ դեպքի կամ լուրի մշտական սպասում
• դժվարությունից կամ նոր իրավիճակներից խուսափում
• բոլորից մեկուսացում
• ուշադրության կենտրոնացման հետ կապված խնդիրներ, օրինակ՝ տնային աշխատանքը սկսելու կամ ավարտին հասցնելու դժվարություն
• քնի հետ կապված դժվարություններ:

Տագնապային խանգարման բուժումը դեռահասների մոտ

Գոյություն ունեն դեռահասների մոտ տագնապային խանգարման բուժման տարբեր մոտեցումներ՝ սկսած նրա ապրելակերպի որոշ շտկումներից մինչև խորհրդատվական մեթոդները:

Թույլից մինչև չափավոր տագնապի բուժումը կարող է ներառել՝

• առողջ ապրելակերպ՝ ֆիզիկական վարժանքներ, առողջ և բավարար սնունդ, բավարար քուն
• տագնապ առաջացնող պատճառների վերհանում և հաղթահարում (օրինակ՝ ուսում, փոխհարաբերություններ, սեռական ոլորտ)
• սթրեսի մակարդակի նվազեցում (գիտակցվածություն, մեդիտացիա կամ ռելաքսացիա)
• այլ մեթոդներ:

Ավելի ծանր տագնապը բուժելիս կարող են առաջարկվել՝

• հոգեբանական բուժումներ (հոգեթերապիա), օրինակ՝ կոգնիտիվ վարքաբանական թերապիա կամ խորհրդատվություն
• դեղորայքային բուժում, օրինակ՝ տագնապամարիչներ և հակադեպրեսանտներ:

Ծանր տագնապային խանգարումը կարող է պահանջել հիվանդանոցային բուժում: