Բալանիտ (ծեփուկաբորբ) -

Բալանիտն առնանդամի գլխիկի բորբոքումն է, որն առաջացնում է կարմրություն և քոր:

Բալանիտը կարող է վերանալ ախտահարված շրջանը լավ լվանալով և չորացնելով: Հատուկ բուժում խիստ հազվադեպ է պահանջվում: Բալանիտը հաճախ հանդես է գալիս թլիպի բորբոքման` պոստիտի հետ միասին: Նման դեպքերում բժիշկն ախտորոշում է բալանոպոստիտ (ծեփուկաթլիպաբորբ):

Բալանիտի ախտանիշները

Բանալիտ ունենալիս կարող եք նշել՝

• առնանդամի գլխիկի կարմրություն և այտուցվածություն
• նույն շրջանում՝ քոր և (կամ) ցավ
• հավանաբար՝ տհաճ հոտ և միզուկային արտադրություն:

Ե՞րբ դիմել բժշկին

Պայմանավորվեք և այցելեք ձեր բժշկին, եթե ձեր առնանդամի գլխիկը մերկացնելու համար թլիպը դժվարությամբ է ետ քաշվում կամ ուղեկցվում է ցավերով: Մի՛ փորձեք ուժ գործադրել: Հիշեք, որ երեխաների մոտ թլիպի ետ քաշելը հեշտանում է միայն ավելի մեծ տարիքում:

Բալանիտի պատճառները

Բորբոքումը կարող է պատճառվել միկրոօրգանիզմների, օրինակ՝ նորմայում առնանդամի գլխիկի վրա ապրող կանդիդա սնկիկի գերաճից: Եթե թլպատված չեք, թլիպի տակ առկա տաք խոնավությունն իդեալական պայմաններ է ստեղծում կանդիդայի բազմացման համար: Նման իրավիճակը թլպատված տղաների և տղամարդկանց շրջանում ավելի հազվադեպ է հանդիպում:

Բալանիտի պատճառ նաև կարող են դառնալ ալերգիան, քոսը և երեխաների մոտ՝ տակաշորերից կամ տակդիրներից պատճառված շփաբորբը։ Ֆիմոզը (երբ թլիփը հետ չի ձգվում) և շաքարային դիաբետը կարող են նպաստել բալանիտի առաջացմանը:

Անտեսվելու կամ սեռական անմաքրության պայմաններում բալանիտը կարող է բարդանալ բակտերիալ վարակով:

Բալանիտը սեռական ճանապարհով չի փոխանցվում:

Բալանիտի կանխարգելումը

Առնանդամի գլխիկը մաքուր և չոր պահելը բալանիտի առաջնային կանխարգելման ամենաարդյունավետ մեթոդն է:

Դուք կարող եք նաև կանխարգելել բալանիտի առաջացումը՝

• սեռական հարաբերությունից անմիջապես հետո առնանդամը լվանալով (եթե ձեր բալանիտն ունի սեռական ակտից հետո սրանալու հակում)
• ձեր առնանդամին և գլխիկին դիպչելուց առաջ ձեռքերը ոչ քիմիական օճառով լվանալով:

Բալանիտի բուժումը

Բալանիտը սովորաբար անհետանում է առնանդամի հիգիենիկ խնամքով:

Օրական առնվազն մեկ անգամ սառը կամ գոլ ջրով զգուշորեն լվացեք առնանդամի գլխիկը, ներառյալ՝ թլիպի տակ ընկած ակոսն ու ծալքերը և զգուշությամբ չորացրեք նույն մասերը: Եթե թլպատված չեք, գլխիկը լվանալուց այն ետ քաշեք:

Դուք պետք է խուսափեք օճառից, տաք ջրից և նշված շրջաններն ուժեղ տրորելուց, որոնք կարող են ավելի գրգռել մաշկը և սաստկացնել բորբոքումը: Դեղատնից կարող եք գնել օճառ չպարունակող լվացող միջոցներ:

Եթե լվանալը և չորացնելը չեն օգնում, տեղեկացեք ձեր բժշկից, թե ինչպիսի թույլ ստերոիդային կամ հակասնկիկային քսուք կարող եք օգտագործել: