Գիշերային անմիզապահությունը մեծ տարիքի երեխաների մոտ

Մինչև 6 տարեկան երեխաների մոտ գիշերային անմիզապահությունը կամ գիշերամիզությունը բավականին տարածված երևույթ է, սակայն ավելի մեծ տարիքի երեխաները նույնպես կարող են «թրջել» անկողինը:

Եթե ձեր երեխայի 6 տարեկանը լրացել է և նրա գիշերային անմիզապահությունը շարունակվում է, կան բաներ, որոնք ձեռնարկելով դուք կարող եք օգնել ձեր երեխային, որ նա գիշերներն անցկացնի «չոր»:

Ի՞նչ է գիշերային անմիզապահությունը

Գիշերային անմիզապահությունը կամ գիշերամիզությունը տեղի է ունենում, երբ երեխան չի կարողանում գիշերային քնից արթնանալ, երբ կա միզելու կարիք: Այն կարող է կրկնվել յուրաքանչյուր գիշեր կամ ավելի հազվադեպ: Բժիշկները գիշերային անմիզապահությանն անվանում են նաև «նոկտուրիալ էնուրեզ»:

Որոշ երեխաների մոտ գիշերամիզությունը կարող է շարունակվել՝ սկսած նրանց ծնվելուց, իսկ մյուսների մոտ ի հայտ գալ ավելի ուշ տարիքում:

Գիշերային անմիզապահությունը կարող է լինել խիստ հիասթափեցնող ինչպես երեխայի, այնպես էլ ծնողների համար: Սակայն դրա պատճառը ձեր անհաջողությունը կամ սխալը չէ, և գիշերամիզությունը ձեր պահվածքի հետ որևէ ընդհանուր բան չունի:

Պատճառներ

Որոշ երեխաներ քնում են շատ խորը և չեն կարողանում արթնանալ, երբ առաջանում է միզելու կարիք:

Այլ դեպքերում երեխան կարող է ունենալ իր տարիքից ավելի փոքր միզապարկ: Կամ գիշերային ժամերին կարող է արտադրվել համեմատաբար մեծ քանակությամբ մեզ:

Խիստ հազվադեպ երեխաների մոտ գիշերամիզության պատճառ կարող է հանդիսանալ «հակադիուրետիկ հորմոն» անվանումն ունեցող հորմոնի ցածր մակարդակը, որի պատճառով գիշերային ժամերին արտադրվող մեզի ծավալները մեծանում են և միզապարկը չի կարողանում պահել ավելցուկային մեզը:

Գիշերային անմիզապահության առաջացման մեջ դեր ունի նաև ժառանգական գործոնը, և եթե ծնողների կամ նրանցից մեկնումեկի մանկական տարիքում գրանցվել է գիշերամիզություն, նրանց երեխաների մոտ նույն վիճակի հավանականությունը բարձրանում է:

Երեխաների գիշերամիզության մեջ նշանակություն ունեն նաև հուզական գործոնները, օրինակ՝ սթրեսային միջադեպ կամ վախ:

Խիստ հազվադեպ երեխաների մոտ գիշերային անմիզապահության պատճառ կարող են հանդիսանալ ֆիզիկական խնդիրները:

Եթե անհանգստացած եք երեխայի մոտ գիշերամիզության շարունակությամբ կամ երեխան խիստ հիասթափված է նման վիճակից, դիմեք ձեր բժշկին:

Ախտորոշում

Բժիշկը կզննի ձեր երեխային և կտա հարցեր՝ կապված նրա նախկին և ներկա առողջական վիճակի հետ: Նա նաև կարող է հետաքրքրվել ձեր և մյուս ծնողի առողջությամբ:

Որոշ դեպքերում բժիշկը կառաջարկի որոշ հետազոտություններ, որոնք դեպքերի մեծ մասի ժամանակ որևէ խնդրի առկայություն չեն նախանշում: Սակայն, բժիշկին այդ հետազոտությունների պատասխանները պետք են, որ ժխտի այլ, ավելի լուրջ առողջական խնդիրների առկայությունը:

Ոչ հազվադեպ կարիք է զգացվում նաև ներգրավել այլ մասնագետներին, օրինակ՝ հոգեթերապևտ, մանկաբույժ, նյարդաբան և այլն:

Բուժում

Կան գիշերային անմիզապահությամբ մեծ տարիքով երեխաներին օգնող մի շարք միջոցառումներ:

• Մի՛ պատժեք կամ մի՛ ծաղրեք ձեր երեխային, եթե նա միզել է գիշերային քնի ընթացքում:
• Հոգ տարեք, որ օրվա ընթացքում նա ստանա բավարար քանակի հեղուկներ, սակայն նրա անկողին մտնելուց առաջ սահմանափակեք հեղուկների, այդ թվում՝ գազալցված և կոֆեին պարունակող ըմպելիքների օգտագործումը:
• Եղե՛ք համբերատար, ձեր երեխային հասկացող և նրան քաջալերող: Դուք կարող եք երեխային ներգրավել իր իսկ խնդրի հաղթահարման գործընթացին:

Ժամանակի ընթացքում գիշերամիզությունը սովորաբար անհետանում է: Եթե, այնուամենայնիվ, այն շարունակվում է երեխայի ավելի բարձր տարիքում, զրուցեք բժշկի հետ այս թեմայով և հետևեք նրա խորհուրդներին: