Կրծքով կերակրում

2 րոպե

Բազմաթիվ կանայք մայրանալուց հետո առնչվում են կրծքով կերակրման հետ կապված տարբեր խնդիրների հետ:

Առավել ևս, առաջին անգամ մայր դարձած կանայք կրծքով կերակրման նախնական փորձերի ժամանակ կարող են իրենց զգալ խիստ անօգնական, հուսահատվեն կամ նույնիսկ ընկճվեն։ Ոչ հազվադեպ սա կարող է բերել անցանկալի մի իրավիճակի, երբ կինն ինքնակամ հրաժարվում է իր նորածին բալիկին մայրական կաթով կերակրելուց և անցնում է արհեստական կերին:

Երբեք մի՛ դադարեցրեք ձեր մանկիկին կրծքով կերակրել, քանի դեռ իրականում չեք ուզում այդպես վարվել, չկա դրան խանգարող որևէ լուրջ պատճառ կամ ձեր բժիշկը խորհուրդ չի տվել անցնելու արհեստական կաթին: Հիշեք, որ կրծքով կերակրելու հետ կապված խնդիրների մեծ մասը լուծելի են:

Կրծքով կերակրումը կարելի է դիտարկել որպես հատուկ ժամ՝ հատկացված ձեր և ձեր մանկիկի անմիջական շփմանը, իսկ կրծքի կաթը՝ որպես ձեր նորածնի առողջությունն ապահովող լավագույն սնունդ: Կրծքի կաթը պարունակում է ձեր երեխայի կյանքի առնվազն առաջին 6 ամսվա համար նախատեսված բոլոր սննդանյութերը: Այն հատուկ արտադրվում է ձեր երեխայի համար և պարունակում է բազմաթիվ անհրաժեշտ բնական նյութեր, որոնք դուք չեք գտնի որևէ արհեստական կաթի բաղադրության մեջ։

Օգուտները ձեր բալիկի համար

• Կրծքի կաթը ձեր երեխայի համար լիարժեք սնունդ է։ Այն իր բաղադրությամբ նմանակը չունի:
• Կրծքի կաթն անվտանգ է և հեշտ մարսվող։
• Կրծքի կաթը պարունակում է ձեր երեխայի կարիքներին լիարժեք համապատասխանող բոլոր հեղուկները և սննդանյութերը (առնվազն՝ մինչև նրա 6 ամսական դառնալը):
• Այլ հավելյալ սննդի հետ միասին, կրծքի կաթը կարող է բավարարել ձեր երեխայի սնվելու հետ կապված բոլոր պահանջները հաջորդ 6 ամսվա համար և ավելի երկար։
• Կրծքի կաթը միշտ պատրաստի վիճակում է, երբ ձեր բալիկը ցանկանա սնվել։
• Կրծքի կաթով մեծացող երեխան ավելի քիչ հավանական է, որ հիվանդանա վարակային, ալերգիկ և այլ հիվանդություններով։
• Կրծքի կաթով սնվող երեխաներն աճում և զարգանում են ավելի լավ:

Կրծքով կերակրումը լավ է նաև ձեզ համար

• Կրծքի կաթը չի պահանջում գումարի ծախս, իսկ պատրաստման համար՝ նաև ժամանակի կորուստ։
• Կրծքով կերակրելը հիանալի առիթ է՝ սերտորեն շփվելու ձեր երեխայի հետ, զգալու մեկդ մյուսին և զարգացնելու փոխադարձ հոգեկան և հուզական կապվածություն։
• Կրծքով կերակրումն օգնում է, որ վերականգնեք ձեր մարմնի նորմալ կառուցվածքն ավելի արագորեն։
• Կրծքով կերակրումը ձեզ պաշտպանում է որոշ հիվանդություններից, ինչպիսիք են կրծքագեղձի քաղցկեղը կամ ձվարանի քաղցկեղը։