Կրծքով կերակրումը և դաշտանը

Կրծքով կերակրումը և դաշտանը

Եթե երեխային կուրծք եք տալիս, ապա ձեր դաշտանային ցիկլերը կարող են ծննդաբերությունից հետո մի քանի ամիս բացակայել:

Ծննդաբերությունից հետո ցիկլերի վերսկսման այսպիսի հապաղումը բացատրվում է կաթնատվության հորմոնի՝ պրոլակտինի բարձրացած մակարդակով, որը կաթի արտադրությունն ապահովելուց բացի նաև արգելակում է ձվազատումը (օվուլյացիա), հետևաբար՝ դաշտանը: Եթե դուք կրծքով կերակրում եք ցերեկները և գիշերները, ապա դաշտանային ցիկլի վերսկսումը կարող է հետաձգվել մինչև մեկ տարի:

Կան բազմաթիվ գործոններ, որոնք կանխորոշում են, թե կրծքով կերակրելիս ձեր դաշտանը երբ կվերսկսվի: Դրանցից են՝

  • որքա՞ն հաճախ եք ձեր երեխային կերակրում շշիկով (արհեստական կեր)
  • ինչպե՞ս է ձեր օրգանիզմը պատասխանում հորմոնային փոփոխություններին
  • ի՞նչ հաճախականությամբ և որքա՞ն երկար ժամանակի ընթացքում եք երեխային կրծքով կերակրում:

Եթե երեխան սնվում է միայն շշիկով` արհեստական կերով, ապա դաշտանային ցիկլերը ծննդաբերությունից շատ չանցած կվերականգնվեն:

Նկատի ունեցեք, որ նույնիսկ եթե ձեր դաշտանները բացակայում են կամ կանոնավոր չեն, ապա դա բնավ չի նշանակում, որ դուք չեք կարող հղիանալ:

Ծննդաբերությունից հետո դաշտանային ցիկլի վերականգնումը տեղի է ունենում աստիճանաբար: Սկզբում դրանք կարող են լինել անկանոն, հատկապես, եթե կաթնատվությունը դեռ պահպանված է: Ցիկլի և դաշտանի տևողությունը նույնպես կարող են փոփոխվել, երբեմն՝ բացակայել (նույնիսկ՝ մի քանի ամսվա ընթացքում):

Երբ սկսեք ավելի քիչ ժամանակ հատկացնել կրծքով կերակրմանը, ձեր դաշտաններն աստիճանաբար կվերադառնան նախկին «գրաֆիկին»: Առաջին անգամները գուցե նկատեք թույլ արյունահոսություն:

Դաշտանի վերսկսումը քիչ է ազդում կաթնատվության վրա, ուստի, ցանկության դեպքում դուք կարող եք շարունակել կրծքով կերակրումը: Նման դեպքերում որոշ կանայք կարող են նշել, որ հերթական դաշտանը սկսվելուց մի քանի օր առաջ կաթի քանակը ժամանակավորապես քչանում է, որից հետո վերականգնվում է, երբ հորմոնները վերադառնում են իրենց նախկին մակարդակներին:

Լրացուցիչ օգտակար խորհուրդներ կարող եք ստանալ ձեր մանկաբարձուհուց կամ բժշկից:

Հոդվածը վերանայվել է՝ 27-02-2021