Գրադարան

Անհատականության դիսոցիատիվ խանգարում (անձի երկատում)

Անհատականության դիսոցիատիվ խանգարում (անձի երկատում)

Time Read 3 րոպե

Անհատականության դիսոցիատիվ խանգարումը բնորոշվում է մարդու` իր անհատականության զգացման կոպիտ խեղաթյուրմամբ, երբ տվյալ անձն ինքն իրեն զգում է կամ այլ մարդկանց կողմից դիտարկվում է որպես երկու կամ ավելի առանձին անհատականություններ:​

Անհատականության դիսոցիատիվ խանգարումը դիսոցիատիվ խանգարման մի տեսակ է, որը հանրության լայն շրջանակներում առավել հայտնի է որպես անձի երկատում, քանի որ շրջապատի մարդկանց համար ստեղծվում է տպավորություն, որ հոգեական այս խանգարմամբ մարդու մարմնում միաժամանակ ապրում են տարբեր «ես»-եր, որոնք ժամանակ առ ժամանակ փոխարինում են միմյանց:

Անհատականության դիսոցիատիվ խանգարման ախտանիշները

Իր մեկ մարմնում «պահելով» երկու կամ ավելի անհատականություններ, այս մարդիկ կարող են տարբեր ժամանակ դրսևորել վարքագծերի, արտաքին դրսևորման և խոսքի տարբեր առանձնահատկություններ: Ընդ որում, այսպես կոչված մի անհատականությունից մյուսը «հերթափոխից» հետո տվյալ պահին ակտիվ «ես»-ը կարող չհիշել, թե «ով է եղել» նա և ինչ է կատարվել նախկինում, երբ ակտիվ են եղել մյուս «ես»երը:

Անձը մեկ անհատականությունից փոփոխվում և վերածվում է մեկ այլ անհատականության կամ զգում է, թե ինչպես են իր գլխի ներսում «ապրում» երկու և ավելի մարդիկ: Ընդ որում, այդ անհատականություններից յուրաքանչյուրը կարող է ունենալ իր սեփական անունը և բնութագրիչները, օրինակ՝ սեռ, ձայն, շարժուձև, ազգություն, խառնվածք, մտավոր կարողություններ, աշխարհընկալում և այլն: Հաճախ անհատականություններից յուրաքանչյունը «հայտնվում է», որպեսզի իրականացնի կոնկրետ դեր, օրինակ՝ դիմակայի զայրույթին կամ վախին:

Անհատականության դիսոցիատիվ խանգարման հիմնական բնութագրիչներն են՝

  • անհատականության «տրոհում», երբ մարդն ունի երկու կամ ավելի անհատականության վիճակներ, որը կարող է շրջապատի մարդկանց կողմից գնահատվել որպես կտրուկ կերպարանափոխություն
  • անհատականության «հերթափոխը» ներառում է փոփոխված վարքագծերը, հույզերը, մտածողությունը, հիշողություններն ու ընկալումները, որը կարող է դիտարկվել շրջապատի մարդկանց կամ կամ նշվել տվյալ անձի կողմից
  • առօրյա դեպքերի, կարևոր անձնական տեղեկատվության, մանկական տարիքի կամ տրավմատիկ իրադարձությունների մասին հիշողության կրկնվող և խորը կորուստներ
  • հանկարծակի ի հայտ եկող «տրանսի» վիճակ, երբ մարդը սևեռվում է հայացքը կամ սկսում խոսել ինքն իր հետ, ինչպես նաև անցյալ վերապրումներ և ցնորքներ (հալյուցինացիա)
  • ֆիզիկական ախտանիշներ, օրինակ՝ գլխացավեր, ցավեր կրծքավանդակի կամ որովայնի շրջանում:

Անհատականության դիսոցիատիվ խանգարմամբ մարդկանց մոտ կարող են զարգանալ այլ հոգեկան հիվանդություններ ևս, օրինակ՝ տագնապային խանգարումներ, դեպրեսիա, տրամադրության շեղումներ, սնման խանգարումներ կամ ինքնասպանության զգացումներ:

Անհատականության դիսոցիատիվ խանգարման պատճառները

Անհատականության դիսոցիատիվ խանգարման հիմնական պատճառը վաղ մանկական տարիքում (հաճախ՝ մինչև 7 տարեկան հասակը) ծանր հուզական տրավմաներն են կամ պարբերաբար կրկնվող ֆիզիկական, վերբալ (խոսքային), սեքսուալ կամ հուզական բնույթի բռնությունները, անուշադրության և անտեսման արժանանալը: Չնայած տարածված կարծիքին՝ դիսոցիատիվ խանգարումը շիզոֆրենիայի հետ որևէ կապ չունի:

Անհատականության դիսոցիատիվ խանգարման ախտորոշումը

Անհատականության դիսոցիատիվ խանգարման ախտորոշումը բարդ գործընթաց է և պահանջում է մարդու երկարատև դիտարկում և նրա հոգեկան վիճակի խորացված գնահատում: Որպես կանոն, ախտորոշումը հաստատվում է հոգեբույժի կողմից: Այս հիվանդության ախտորոշման որևէ առանձնահատուկ հետազոտություն գոյություն չունի:

Անհատականության դիսոցիատիվ խանգարման բուժումը

Անհատականության դիսոցիատիվ խանգարման հիմնական բուժումը երկարատև հոգեթերապիան է (փսիխոթերապիա), որը կարող է տևել երկար տարիներ: Այս խանգարման որևէ հատուկ դեղորայքային բուժում գոյություն չունի, սակայն որոշ մարդիկ կարող են ունենալ այլ խնդիրներ ևս, օրինակ՝ տագնապ կամ դեպրեսիա, որոնք իրենց հերթին պահանջում են համապատասխան դեղերի ընդունում:

Հոդվածը տեղադրվել է՝ 16-04-2020 վերանայվել է՝ 08-05-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը: