Վարժանքները և հոգեկան առողջությունը -

​Ֆիզիկական վարժանքներն ունեն բազմաթիվ օգուտներ, ընդ որում, այդ օգուտները վերաբերում են ոչ միայն ֆիզիկական, այլ նաև հոգեկան առողջությանը։

Վարժանքները ձեր գլխուղեղում խթանում են այնպիսի նյութերի արտադրությունը, որոնք բարելավում են ձեր տրամադրությունը և գլխուղեղի այն մասերի գործունեությունը, որոնք պատասխանատու են հիշողության և սովորելու գործընթացների համար։

Ֆիզիկական վարժանքների օգուտները

Վարժանքները կարող են օգնել, որ դուք ձեզ զգաք ավելի լավ, նույնիսկ եթե ինքնազգացողության հետ կապված որևէ խնդիր չունեք։

Վարժանքները կարող են նվազեցնել այնպիսի ծանր հիվանդությունների զարգացման ռիսկը, ինչպիսիք են՝

• սրտի իշեմիկ հիվանդություն
• թոքային հիվանդություններ
• բարձր արյան ճնշում (հիպերտենզիա)
• շաքարային դիաբետ (շաքարախտ)
• ավելորդ քաշ կամ գիրություն
• քաղցկեղ
• դեմենցիա (թուլամտություն) և Ալցհեյմերի հիվանդություն
• Պարկինսոնի հիվանդություն։

Վարժանքները նաև օգնում են ինսուլտից և տարբեր այլ հիվանդություններից ու վիճակներից վերականգնմանը։ Դրանք օգտակար են, եթե ցանկանում եք նվազեցնել ձեր մարմնի քաշը, ինչը բարերար ազդեցություն է թողնում ձեր ընդհանուր առողջության վրա և բարելավում է ձեր ինքնագնահատականը։

Ֆիզիկական վարժանքների օգուտները հոգեկան առողջության համար

Վարժանքները լավացնում են ձեր ինքնազգացողությունը, քանի որ գլխուղեղում խթանվում է տրամադրությունը բարելավող էնդորֆինների և սերոտոնինի արտադրությունը։ Վարժանքները նաև ձեզ կտրում են հոգեկան լարվածություններից և օգնում, որ մեղմացնեն միայնակության և մեկուսացման զգացումները, ինչպես նաև ձեռք բերեք նոր ծանոթություններ։

Վարժանքներ կատարելիս գիտակցվածության սենասը կարող է օգնել սթրեսի կրճատմանը և բարելավել ձեր հոգեկան գործունեությունը։

Վերջապես, վարժանքներն օգնում են ձեր քնի կարգավորմանը, որի օգտակարությունը դրսևորվում է տարբեր մեխանիզմներով։

Վարժանքները և գլխուղեղը

Վարժանքները մեծացնում են դեպի գլխուղեղ արյան հոսքը, որի շնորհիվ ձեր մտածողությունը կարող է դառնալ ավելի պարզ։ Կանոնավոր վարժանքները նաև մեծացնում են գլխուղեղի ծովաձի (հիպոկամպ) կոչվող շրջանը, որը պատասխանատու է հիշողության համար։

Վարժանքները նաև մեծացնում են գլխուղեղի նյարդաբջիջների (նեյրոնների) միջև կապերը, որը բարելավում է ձեր հիշողությունը և օգնում վնասվածքի կամ հիվանդությունների դեմ ուղեղի պաշտպանվածությանը։

Ինչքա՞ն վարժանքի կարիք դուք ունեք

Միջազգային հանրահայտ ուղեցույցները չափահաս մարդկանց խորհուրդ են տալիս շաբաթվա բոլոր օրերին օրական առնվազն 30 րոպե զբաղվել չափավոր ծանրաբեռնվածության վարժանքներով։ Դուք կարող եք այս 30 րոպեն լրացնել նաև ավելի կարճատև վարժանքներով, օրինակ՝ երկու անգամ 15-ական կամ երեք անգամ 10-ական րոպե տևող այլ զբաղմունքներով։

Կարելի է վարժանք համարել նաև ձեր առօրյա կյանքում ֆիզիկական ծանրաբեռնվածություն պահանջող գործերով զբաղվելը՝ այգեգործություն, հեծանիվով աշխատանքի մեկնում, լող և այլն։

Զուգակցեք ձեր վարժանքները առողջ սննդակարգի հետ, որ բարձրացնեք վարժանքներին օգնող շարժառիթները և էներգիան։