Վայր ընկնելու կանխարգելում - Տարեցների առողջություն

Ընկնելը ձեզ ենթարկում է լուրջ վնասվածքներ ստանալու վտանգին: Կանխեք ընկնելը այս պարզ միջոցներով՝ սկսած ձեր դեղերի վերանայումից մինչև ձեր տունն ընկնելու վտանգներից պաշտպանելը:

Ընկնելու կանխարգելումը կարևոր թեմա է, որն էլ արդիական է դառնում, երբ տարիք եք առնում: Ֆիզիկական (մարմնական) փոփոխությունները և առողջական խնդիրները, և երբեմն այդ խնդիրները բուժելու համար օգտագործվող դեղամիջոցները, տարիքի հետ ավելի հավանական են դարձնում վայր ընկնելը: Ըստ էության, ընկնելը տարեցների շրջանում վնասվածքների հիմնական պատճառն է: Այնուամենայնիվ, ընկնելու վախը չպետք է ձեր կյանքը դարձնի վախերով լի կամ կաշկանդված: Դրա փոխարեն, հաշվի առեք ընկնելու կանխարգելման հետևյալ վեց պարզ մոտեցումները:

1. Պայմանավորվեք և հանդիպեք ձեր ընտանեկան բժշկին

Սկսեք՝ այցելելով ձեր բժշկին: Ձեր ռիսկը գնահատելու և ընկնելու կանխարգելման մեթոդները քննարկելու համար ձեր բժիշկը կարող է խոսել հետևյալի մասին:

• Ձեր դեղերը. կազմեք ձեր դեղատոմսով և առանց դեղատոմսով դեղերի և հավելումների ցանկը կամ բերեք դրանք ձեզ հետ բժշկի հետ հանդիպմանը: Բբժիշկը կարող է ստուգել ձեր դեղերը կողմնակի ազդեցությունների և փոխազդեցությունների համար, որոնք կարող են մեծացնել ընկնելու ձեր ռիսկը: Ընկնելը կանխարգելելու համար ձեր բժիշկը կարող է վերանայել և փոփոխել այն դեղամիջոցները, որոնք առաջացնում են թուլություն կամ ազդում են ձեր մտածողության վրա, ինչպիսիք են հանգստացնողները (սեդատիվներ), հակահիստամինային դեղամիջոցները և հակադեպրեսանտների որոշ տեսակները:
• Նախկինում ընկնելու դրվագնար․ գրի առեք մանրամասները, այդ թվում՝ երբ, որտեղ և ինչպես եք ընկել։ Պատրաստ եղեք քննարկելու այն դեպքերը, երբ քիչ էր մնում ընկնեիք, բայց ինչ-որ մեկը ձեզ բռնեց կամ կարողացաք ժամանակին ինչ-որ բանից բռնվել: Նման մանրամասները կարող են օգնել ձեր բժիկին, որ ընտրի ձեր ընկնելու կանխարգելման հատուկ տարբերակներ:
• Ձեր առողջական վիճակը. աչքի և ականջի որոշակի խանգարումներ կարող են մեծացնել ընկնելու ռիսկը: Պատրաստ եղեք քննարկելու ձեր առողջական խնդիրները և թե որքան հարմարավետ եք զգում քայլելիս, օրինակ՝ քայլելիս ունենո՞ւմ եք գլխապտույտ, հոդացավ, հևոց կամ թմրածություն ոտնաթաթերում և ոտքերում: Ձեր բժիշկը նաև կարող է գնահատել ձեր մկանային ուժը, հավասարակշռությունը և քայլելու բնույթը (քայլքը):

2. Շարունակեք տեղաշարժվել

Ֆիզիկական ակտիվությունը կարող է զգալիորեն նպաստել վայր ընկնելու կանխարգելմանը: Եթե ձեր բժիշկը թույլ է տալիս, մտածեք այնպիսի գործողությունների մասին, ինչպիսիք են քայլելը, ջրային զբաղմունքները կամ թայ-չին՝ նուրբ վարժանք, որը ներառում է դանդաղ և ճկուն պարային շարժումներ: Այս միջոցառումները նվազեցնում են ընկնելու ռիսկը՝ բարելավելով ձեր ուժը, հավասարակշռությունը, կորդինացիան և ճկունությունը:

3. Հագեք հարմարավետ կոշիկներ

Մտածեք ձեր կոշիկները փոխելու մասին՝ որպես ընկնելու կանխարգելման ծրագրի մաս: Բարձրակրունկները, փափուկ հողաթափերը և հարթ ներբաններով կոշիկները կարող են դառնալ սայթաքելու, անհաջող քայլքի և ընկնելու պատճառ: Նույնը վերաբերվում է միայն գուլպա հագած վիճակում քայլելուն: Դրա փոխարեն կրեք պատշաճ հարմարվետ, պինդ, հարթ և չսայթաքող ներբանով կոշիկներ: Հարմարավետ կոշիկները նաև կարող են նվազեցնել հոդացավը:

4. Վերացրեք տան վտանգավոր գործոնները

Զննեք ձեր տան բոլոր տարածքները հնարավոր վտանգները գտնելու համար: Ձեր տունն ավելի անվտանգ դարձնելու համար՝

• հեռացրեք հատակից, հատկապես այն վայրերից, որտեղով քայլում եք բոլոր մանր ու մեծ իրերը, թերթերը, էլեկտրական  և հեռախոսի լարերը
• ավելի հաճախ տեղաշարժման ուղիներից հեռացրեք սուրճի սեղանիկները, գրքերի կամ ամսագրերի դարակները և ծաղկամանները
• ամրացրեք սայթաքող գորգերը կամ գորգիկները երկկողմանի կպչուն ժապավենով կամ հեռացրեք դրանք ձեր տան քայլուղիներից
• առանց ուշացնելու վերանորոգեք շարժուն կամ թուլացած մանրահատակները
• պահպեք հագուստը, սպասքը, սնունդը և այլ անհրաժեշտ իրերը հեշտ հասանելի տեղերում
• անմիջապես մաքրեք թափված հեղուկները, քսուքները կամ սնունդը
• օգտագործեք միայն չսահող գորգիկներ ձեր լոգարանում
• օգտագործեք լոգանքի աթոռ, որը թույլ է տալիս նստել ցնցուղ ընդունելիս:

5. Լուսավորեք ձեր բնակելի տարածքը

Պահպանեք ձեր տունը բավարար լուսավորված՝ դժվար տեսանելի առարկաների պատճառով սայթաքելուց խուսափելու համար: Նաև՝

• տեղադրեք գիշերային լամպեր ձեր ննջասենյակում, լոգարանում և միջանցքում
• տեղադրեք լամպ ձեր անկողնու մոտ
• համոզվեք, որ լույսի անջատիչները հեշտ հասանելի են և ունեն գիշերները տեսանելի լինելու հատկություն
• միացրեք լույսերը՝ աստիճաններով բարձրանալուց կամ իջնելուց առաջ
• պահեք լապտերները հեշտ գտնելու տեղերում՝ հոսանքազրկման դեպքում օգտագործելու համար։

6. Օգտագործեք օժանդակող հարմարանքներ կամ պարագաներ

Ձեր բժիշկը կարող է խորհուրդ տալ, որ օգտագործեք ձեռնափայտ կամ քայլակ՝ ձեզ կայուն պահելու համար: Այլ օժանդակ հարմարանքները նույնպես կարող են օգտակար լինել: Օրինակներից են՝

• բռնակներ սանդուղքների երկու կողմերի համար
• բարձրացված զուգարանակոնք
• բռնակներ զուգարանում և լոգարանում
• պլաստիկ ամուր աթոռ ցնցուղից օգտվելու համար: