Իգական տիպի ճաղատացում - Մաշկային հիվանդություններ

Մազաթափությունը և մասնակի կամ լրիվ ճաղատությունը միայն տղամարդկանց հատուկ խնդիր չէ, և կանայք նույնպես կարող են որոշակի տարիքում առնչվել այս վիճակի հետ:

Կանանց մոտ մազաթափության ամենահաճախ հանդիպող տեսակը կանացի տիպի մազաթափությունն է:

Ի՞նչ է կանացի տիպի մազաթափությունը

Կանացի տիպի մազաթափությունը տերմին է, որն օգտագործվում է նկարագրելու կանանց մոտ մազերի նոսրացման և կորստի վիճակը: Այն հայտնի է նաև կանանց մոտ անդրոգենետիկ ալոպեցիա:

Կանանց մոտ այս խնդիրը նման է տղամարդկային տիպի մազաթափությանը, սակայն մազերի նոսրացումը և կորուստն ընթանում է որոշակի տարբերությամբ: Մազերը սովորաբար սկսում են նոսրանալ ամբողջ գանգամաշկի շրջանում և միայն հազվադեպ է, որ ճաղատացումը սկսվում է ճակատաքունքային մազագծից կամ գլխի գագաթից:

Կանացի տիպի մազաթափությունը կարող է ի հայտ գալ ցանկացած տարիքում: Այն սովորաբար զարգանում է դանդաղորեն, սակայն կարող է ի հայտ գալ նաև հանկարծակի:

Կանանց մոտ մազաթափությունը հաճախ զգալի դրսևորում է ստանում դաշտանադադարից հետո: Կանանց գրեթե կեսը մազաթափության խնդրին առնչվում են 50 տարեկանի շրջակայքում:

Կանացի տիպի մազաթափության պատճառները և տեսակները

Կանացի տիպի մազաթափության մեջ, անկասկած, ժառանգականությունն ունի իր դերը: Մազաթափության նկատմամբ հակվածության գեները կարող են ժառանգվել ինչպես ծնողներից մեկնումեկից, այնպես էլ երկուսից: Հնարավոր է, որ հորմոնները նույնպես նպաստում են խնդրի զարգացմանը:

Կանացի տիպի մազաթափությունը տարբերվում է օջախային մազաթափությունից, որը զարգանում է որպես աուտոիմուն խանգարման հետևանք և դրսևորվում ոչ միայն գլխի մազածածկ շրջանի, այլ նաև մարմնի այլ շրջանների մազերի կորստով:

Կանացի տիպի մազաթափության ախտորոշումը

Զրուցեք ձեր բժշկի հետ, եթե նկատել եք, որ ձեր վարսերը նոսրացել կամ կորցրել են որակը: Որևէ խնդիր կասկածելու դեպքում նա ձեզ կուղեգրի մաշկաբանի խորհրդատվության:

Եթե ունեք ակնե (կորյակ), անկանոն դաշտան կամ մարմնի ավելցուկային մազակալում (հիսուդիզմ), բժիշկը հավանաբար կառաջարկի հորմոնների ստուգում կամ կբացառի պոլիկիստոզային ձվարանների համախտանիշի առկայությունը:

Որոշ դեպքերում կարող է առաջանալ նաև գանգամաշկից փոքր քսուք վերցնելու և հետազոտելու կարիք:

Կանացի տիպի մազաթափության բուժումը

Բուժման գլխավոր նպատակը մազաթափության ընթացքը դանդաղեցնելն է կամ լավագույն դեպքում մազերի կորուստը կանխելը: Բուժումը նաև կարող է խթանել մազերի աճը, սակայն որոշակի արդյունավետություն է դրսևորում ոչ բոլոր կանանց մոտ:

Բժիշկը կարող է նշանակել Մինօքսիդիլ կամ այս դեղամիջոցը պարունակող նրբաքսուք (կրեմ): Մինօքսիդիլ պարունակում են նաև մազաթափության դեմ արտադրվող տարբեր լոսյոններում: Կարևոր է, որ մինչև նման միջոցներ օգտագործելը խորհրդակցեք ձեր բժշկի հետ:

Մինչ օրս մազաթափության լազերային բուժման, շիճուկի ներակման, «մազի տոնիկների» և սննդանյութային հավելումների արդյունավետության վերաբերյալ բավարար տվյալներ չկան:

Ինչպե՞ս առերեսվել մազաթափության փաստի հետ

Որոշ կանանց համար մազաթափությունը կարող է դառնալ մեծ ողբերգության և ինքնագնահատականի անկման պատճառ: Մյուսները կարող են ընդունել, որ այդ վիճակն անշրջելի է, հարմարվեն իրականության հետ և շարունակեն իրենց կյանքն այնպես, ինչպես մինչև մազաթափության խնդրի ի հայտ գալը կամ խորանալը:

Որոշ կանանց համար կեղծամ, գլխաշոր կամ գլխարկ կրելը բավարար է: Մյուսները կարող են օգտագործել նոսրացող, բարակող կամ անորակ մազերի խնամքի միջոցներ կամ պարագաներ: