Գրադարան

Ցնորքներ (հալյուցինացիա)

Ցնորքներ (հալյուցինացիա)

Time Read 3 րոպե

Ցնորքը կամ հալյուցինացիան իրականում գոյություն չունեցող առարկաների և երևույթների ընկալումն է այնպես, որ մարդուն թվում է, որ դրանք իրականում կան:

Ի տարբերություն պատրանքների, երբ մարդը գոյություն ունեցող առարկան կամ երևույթն ընկալում է աղավաղված, ցնորքի ժամանակ ընկալման առարկան կամ երևույթը գոյություն չունի: Օրինակ, ցնորքի ժամանակ մարդը կարող է տեսնել բաներ, որոնք շրջապատում չկան կամ լսել ձայներ, որոնք իրականում գոյություն չունեն:

Ցնորքներն այլ կերպ անվանում են զգայապատրանք, զգայախաբություն, մտապատրանք, մտատեսիլք և այլն:

Ցնորքները սովորաբար առաջանում են մարդու արթուն վիճակում, ինքնաբերաբար և կապված են մարդու զգայարաններից որևէ մեկի կամ մի քանիսի հետ:

Ցնորքների տեսակները

Ըստ զգայարանի ներգրավվածության և ընկալման տիպի տարբերում են ցնորքների հետևյալ տեսակները՝

  • տեսողական (վիզուալ)՝ տեսնում է առարկաներ, որոնք իրականում գոյություն չունեն
  • լսողական (աուդիալ)՝ լսում է ձայներ, որոնք իրականում գոյություն չունեն (կոչվում է «վերբալ», եթե լսողական ցնորքը կազմված է հասկանալի բառերից կամ խոսքից)
  • համի՝ զգում է իրականում գոյություն չունեցող համեր
  • հոտի՝ զգում է հոտեր, որոնք իրականում գոյություն չունեն
  • շոշափելիքի՝ զգում է հպման և այլ մաշկային զգացողություններ, որոնք իրականում գոյություն չունեն
  • ջերմաստիճանի՝ զգում է ջերմաստիճանային փոփոխություններ, որոնք իրականում գոյություն չունեն:

Երբեմն ցնորքը կարող է հանդիպել նաև առողջ մարդկանց մոտ, հատկապես գերհոգնած վիճակում (օրինակ, թվում է, թե կանչել են՝ տալով իր անունը, մինչդեռ նրան ոչ ոք չի կանչել): Սակայն ցնորքները գլխավորապես առաջանում են հոգեկան տարբեր խանգարումների ժամանակ, ինչպես նաև ալկոհոլի կամ որոշ թմրամիջոցների ազդեցությամբ: Օրինակ, շիզոֆրենիայով տառապող կամ ՄԴՄԱ կուլ տված մարդը կարող է լսել գոյություն չունեցող մարդկանց ձայներ (վերբալ ցնորք):

Ցնորքները տարբերվում են նաև ըստ դրանց առաջացմանը մասնակցած զգայարանների քանակի: Ըստ այդմ, տարբերում են՝

  • հասարակ ցնորքներ, որոնք սահմանափակվում են միայն մեկ զգայարանի սահմաններում (օրինակ՝ միայն տեսողական կամ միայն լսողական)
  • բարդ ցնորքներ, որոնք ընդգրկում են երկու և ավելի զգայարաններ (օրինակ՝ նույն մարդու մոտ տեսողական և լսողական ցնորքներ):

Ըստ քնի հետ կապվածության, տարբերում են նաև՝

  • հիպնոգոգիկ ցնորքներ, որոնք առաջանում են քնի մեջ խորասուզվելիս
  • հիպնոպոնպիկ, որոնք առաջանում են քնից արթնալու ընթացքում։

Կեղծ ցնորքներ

Սրանք այն ցնորքներն են, երբ մարդը համոզված է, որ այն ընկալում է միայն ինքը:

Ի տարբերություն դրանց, իսկական ցնորքները ընկալվում են որպես իրականություն, և մարդուն ոչ մի կերպ հնարավոր չէ համոզել, որ, օրինակ, իր տեսած առարկան իրականում գոյություն չունի։

Հալյուցինացիայի պատճառները

  • Շիզոֆրենիա. հիվանդների շուրջ 70%-ի մոտ առաջանում են տեսողական, իսկ 60-90%-ի մոտ՝ լսողական ցնորքներ: Հիվանդ մարդիկ կարող են նաև զգալ գոյություն չունեցող հոտեր և համեր:
  • Պարկինսոնի հիվանդություն․ այս հիվանդությամբ մարդկանց շուրջ կեսի մոտ երբեմն ի հայտ են գալիս տեսողական ցնորքներ։
  • Ալցհեյմերի հիվանդություն և դեմենցիայի այլ ձևեր․ այս հիվանդությունների ժամանակ գլխուղեղում ընթացող փոփոխությունները կարող են բարձրացնել ցնորքների հավանականությունը։
  • Միգրեններ․ մարդկանց մեկ երրորդը, ովքեր ունեն գլխացավի այս տեսակը, նշում են «աուրա», որը տեսողական ցնորքի մի տեսակ է։ Այն կարող է դրսևորվել որպես բազմագույն լուսային կիսաշրջան։
  • Գլխուղեղի ուռուցքներ․ կախված նրանից, թե որտեղ է տեղակայված ուռուցքը, կարող են առաջանալ տարբեր տեսակի ցնորքներ։ Օրինակ, եթե այն ուղեղի տեսողական դաշտերում է, ուրեմն կառաջանան տեսողական ցնորքներ։
  • Էպիլեպսիա. այս հիվանդության ժամանակ զարգացող ցնցումները բարձրացնում են ցնորքների հավանականությունը։ Ցնորքի տեսակը կախված է «էպիլեպտիկ օջախի» տեղակայումից։

Բուժում

Ցնորքի բուժումը կախված է առաջանցման պատճառից։ Այն կարող է ներառել հետևյալը՝

  • շիզոֆրենիայի դեղեր, եթե պատճառը շիզոֆրենիան է
  • դեմենցիայի դեղեր, եթե պատճառը դեեմենցիան է, օրինակ՝ Ալցհեյմերի հիվանդություն
  • էպիլեպսիայի բուժման մեջ կիրառվող հակացնցումային դեղեր
  • մակուլյար դեգեներացիայի, գլաուկոմայի և կատարակտի բուժում
  • ուռուցքների վիրահատական հեռացում կամ այլ բուժում
  • միգրենով հիվանդերի բուժում տրիպտաններով, բետա պաշարիչներով կամ հակացնցումային դեղերով։

Հոդվածը տեղադրվել է՝ 24-05-2019 վերանայվել է՝ 25-03-2024

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը: