Ձեռքերի լվացման հմտություններ

Ձեռքերի լվացման հմտություններ

Գոլ օճառախառը ջուրը տեսանելի կեղտոտ ձեռքերը լվանալու լավագույն տարբերակն է։

Ձեռքերի լվացումը ձեր անձնական հիգիենային անբաժանելի մասն է։

Ձեռքերը մեր մարմնի ամենաօգտագործվող մասն են: Նույնիսկ արտաքինից ձեռքերի մաքուր թվալու պարագայում օրվա ընթացքում դրանց մակերեսին կուտակվում են բազմատեսակ և անհամրելի թվով բակտերիաներ (մանրէներ կամ միկրոբներ)։

Ձեռքերը չլվանալու խնդիրն անհամեմատ ավելի լուրջ է, քան շատերին կարող է թվալ: Հենց չլվացված ձեռքերի միջոցով են մի շարք վարակների հարուցիչներն օրգանիզմ ներթափանցում (օրինակ՝ ՍՇՎՎ և գրիպ, սնկային հիվանդություններ, դիֆտերիա, աղիքային վարակներ, հեպատիտ А և այլն):

Օճառով և հոսող գոլ ջրով լվանալն ապահովում է ձեռքերի աղտոտվածության և մաշկի մակերեսային շերտի մարէների մեխանիկական հեռացումը: Ձեզ ենք ներկայացնում ձեռքերի ճիշտ հիգիենայի մի շարք հմտություններ։

Ձեր ձեռքերը լվանալիս`

  • հեռացրեք ձեր ձեռքերի վրա առկա արդուզարդի բոլոր առարկաները, մատանիները, ժամացույցը, որ լվանալիս հասանելի լինի ձեռքերի և նախադաստակի ամբողջ մակերեսը
  • թրջեք ձեր ձեռքերը հոսող ջրով (գերադասելի է գոլ, բայց` ոչ շատ տաք)
  • օճառեք ձեր ձեռքերը (գերադասելի է, որ օճառը լինի հեղուկ և հակաբակտերիալ (հակամիկրոբային) ազդեցությամբ)
  • ձեռքերի մատներով օգնելով միմյանց օճառոտեք և տրորեք ձեր երկու ձեռքերի ողջ մակերեսները, ներառյալ դրանց դրսային մակերևույթները, եղունգների տակը և մատների արաքները
  • շփեք միմյանց և տրորեք երկու ձեռքերը ևս 20 վայրկյան
  • ողողեք (պարզաջեք) ձեռքերն այնպես, որ օճառաջուրը և փրփուրը լիարժեքորեն հեռացվեն և օճառոտ մակերեսներն ամբողջովին մաքրվեն
  • լավ և լիարժեք չորացրեք ձեր ձեռքերը (ցանկալի է թղթե անձեռոցիկով (սրբիչով), կամ կտորից մաքուր ձեռքի սրբիչով)։

Ալկոհոլի վրա հիմնված ձեռքերի «մաքրիչները» (հականեխիչներ) կարելի է օգտագործել, եթե տվյալ պահին ձեռքի տակ օճառ կամ ջուր չկա։ Հականեխիչների միջոցով ձեռքերի մշակումը նպաստում է ձեռքերի մաշկի վրա մանրէների նվազագույն քանակի հասցնելուն և կարճ ժամանակում դրանց ակտիվ աճը կասեցնելուն:

Ձեռքերի ճիշտ հիգիենայի այլ հմտություններ

  • Ձեզ մոտ միշտ պահեք ձեռքերի հականեխիչ «մաքրիչներ» («թաց անձեռոցիկ») և օգտագործեք դրանք ըստ անհրաժեշտության, օրինակ՝ հասարակական տրանսպորտից օգտվելուց հետո
  • հազացեք կամ փռշտացեք թաշկինակի կամ ծայրահեղ դեպքում ձեր նախաբազկի, այլ ոչ թե ձեռքերի ափերի վրա
  • կեղտոտ ներքնաշորերին, անդրավարտիքներին, մանկական տակդիրներին ու փամփերսներին դիպչեք, ինչպես նաև արյան կամ օրգանիզմի այլ հեղուկները կամ կենսաբանական արտազատուկները (փսխման մասսա, մեզ, կղանք) մաքրեք միայն միանվագ օգտագործման ձեռնոցների միջոցով
  • ձեր երեխաների համար դարձեք «օրինակելի». աջակցեք ու խրախուսեք, որ նրանք իրենց ձեռքերը լվանան ճիշտ և հաճախակի
  • եթե օգտագործում եք կտորից սրբիչներ, ամեն անգամ ձեռքերը չորացնելուց հետո կախեք դրանք կախիչից, որ չորանան և հաճախակի լվացեք այդ սրբիչները։

Հոդվածը վերանայվել է՝ 16-05-2020