Հերոին

Հերոին

Հերոինը հակում առաջացնող ուժեղ ազդեցությամբ թմրամիջոց է, որն օժտված է տարբեր լուրջ կողմնակի ազդեցություններով, այդ թվում՝ պատահական և կյանքին սպառնացող գերդոզավորում։

Եթե դուք կանոնավոր կերպով օգտագործում եք հերոին, ձեզ մոտ զարգանում է հակում և կախվածություն՝ առաջ բերելով ֆիզիկական, հոգեբանական, իրավական, ֆինանսական և սոցիալական տարաբնույթ խնդիրներ։

Ի՞նչ է հերոինը

Հերոինը պատրաստվում է քնաբեր կակաչից։ Այն պատկանում է ափիոնատիպ նյութերի (օփիոիդներ) ընտանիքին և համարվում է կիսասինթետիկ օփիոիդ։ Նույն խմբին մեջ են մտնում դեղատոմսով դուրս գրվող մի շարք ուժեղ ցավազրկողներ՝ մորֆին, կոդեին, պետիդին և մեթադոն (կոչվում են նաև «թմրաբեր ցավազրկողներ»)։

Հերոինը սև շուկայում վաճառվում է որպես մանր սպիտակ փոշի, սպիտակավուն հատիկներ կամ փոքր շագանակագույն «քարեր»:

Հերոինի ազդեցությունները

Հերոինն ընկճող թմրամիջոց է, այսինքն, դանդաղեցնում է դեպի գլխուղեղ և հակառակ ուղղությամբ նյարդային ազդանիշների հաղորդումը։ Նյարդային այդ ազդանիշներից մեկն էլ շնչելն է, ուստի հերոինը կարող է ընկճել ձեր շնչաությունը։

Հերոինն օգտագործելուց անմիջապես հետո առաջացնում է արագ «վերելքի» զգացողություն, որին հաջորդում է երանության և անհոգության զգացումը (էյֆորիա) ու հաճելի թմբիրը՝ թուլությունն ու քնկոտությունը։ Հերոինը նաև բթացնում է ֆիզիկական և հոգեբանական ցավը։

Հերոին օգտագործած մարդու խոսքը դառնում է քիչ աղավաղված, շնչառությունը՝ դանդաղած ու մակերեսային, իսկ կորդինացիան՝ թուլացած։

Բարձր դեղաչափ ընդունելիս կարող են առաջ գալ անկանոն սրտխփոց և խիստ դանդաղած շնչառություն։ Նման դեպքերում մարդու շրթունքները ստանում են կապտավուն երանգավորում, իսկ մաշկը դառնում է սառը և պատվում կպչուն քրտինքով։

Կանոնավոր կերպով հերոին օգտագործող մարդկանց մոտ հավանական է, որ առաջանան մաշկի, սրտի և թոքերի վարակներ, տղամարդկանց մոտ՝ սեռական հակման անկում, կանանց մոտ՝ դաշտանի և պտղաբերության հետ կապված խնդիրներ։ Հերոինի ներարկումը համատեղ օգտագործման պարագաներով (ասեղ, ներարկիչ, գդալ և այլն) բարձրացնում է նաև ՄԻԱՎ վարակով և հեպատիտ C-ով վարակվելու կամ մյուսներին վարակելու ռիսկը։

Ժամանակի ընթացքում հերոին օգտագործող մարդկանց մոտ զարգանում է տոլերանտություն, որի պատճառով նրանք ստիպված են ավելի մեծ դեղաչափ ընդունել, որպեսզի զգան նույն երանելի «ներհոսը»։ Ի վերջո, գալիս է այնպիսի պահ, երբ ցանկացած դեղաչափ դանում է անբավարար։

Հերոինի նկատմամբ հակումը

Հերոինը խիստ ադիկտիվ, այսինքն՝ հակում առաջացնող թմրամիջոց է, որի որոշ ժամանակ կանոնավոր օգտագործումից հետո դադարեցումը դառնում է խիստ դժվար։ Հերոինից ձերբազատվելը տևում է երկար ժամանակ և կարող է ներառել այնպիսի դեղեր, ինչպիսիք են մեթադոնը (դեղատոմսով նշանակվող օփիոիդային խմբի դեղ), որը զուգակցվում է խորհրդատվության և օժանդակության ծրագրերի հետ։

Հերոինից զրկանքի ախտանիշները սկսվում են վերջին դեղաչափը ստանալուց 6-24 ժամ անց և տևում մինչև մեկ շաբաթ։ Հերոինից զրկանքն ընթանում է թմրամիջոցն ընդունելու սաստիկ մեծ ցանկությամբ, անհանգստությամբ, դեպրեսիայով, հաճախակի հորանջոցով, մկանային ցավերով ու կծկանքներով, փսխումներով և մաշկային տհաճ զգացողություններով։

Հերոինային գերդոզավորում

Հերոինային գերդոզավորումը տարածված բարդություն է, քանի որ օգտագործողները ոչ միշտ են տեղյակ, թե ինչ «մաքրության» հերոին են օգտագործում։ Հերոինի փաթեթները հաճախ պարունակում են նաև այլ՝ թունավոր նյութեր։

Գերդոզավորումը հաճախ տեղի է ունենում, երբ հերոինի չափից դուրս մեծ քանակ է ներարկվում երակի մեջ կամ երբ հերոինն օգտագործվում է ալկոհոլի կամ այլ թմրամիջոցների հետ միասին։ Հերոինի գերդոզավորումը կարող է բերել կոմայի և մահվան։

Հերոինի ազդեցությունը կարող է հանվել «նալոքսոն» կոչվող դեղով, որը համարվում է հերոինային գերդոզավորման բուժման կարևոր միջոցներից մեկը։

Հոդվածը վերանայվել է՝ 02-02-2021