Հորմոնային դեղեր և դաշտան

Հորմոնային դեղեր և դաշտան

Դաշտանային ցիկլի ընթացքում կնոջ օրգանիզմում ընթանում են հորմոնային «վերադասավորումներ», ուստի կարևոր է հասկանալ, թե ինչպես կարող են հորմոնային դեղերն ազդել այս շրջանի վրա։

Հորմոնային բեղմնականխման միջոցներ

Հորմոնային հակաբեղմնավորիչները կարող են ազդել ձեր դաշտանային ցիկլի վրա։ Օրինակ, դրանք կարող են փոփոխել ձեր դաշտանների հաճախականությունը կամ արյունահոսության բնույթը։

Հակաբեղմնավորիչ հորմոնային հաբերը սովորաբար դաշտանի ընթացքը դարձնում են ավելի մեղմ։ Դուք կարող եք նկատել նաև դաշտանների անկանոնություն և արյունահոսության բնույթի փոփոխություններ, քանի որ ձեր ցիկլը սկսում է հարմարվել «արտաքին» հորմոնային միջամտությանը։ Սակայն, կանանց մեծ մասը նշում է, որ բեղմնականխման հաբերի շուրջ 6 ամիս շարունակ ընդունման պայմաններում դաշտանները սկսում են կարգավորվել։ Երբեմն լինում են դեպքեր, երբ հակաբեղմնավորիչ հաբերի ընդունումից հետո դաշտաններն իսպառ անհետանում են։

Հորմոնային ներարկումները նույնպես կարող են առաջացնել անկանոն դաշտաններ՝ մինչև ձեր օրգանիզմը կհարմարվի հորմոնային փոփոխություններին։ Որոշ կանայք կարող են նշել դաշտանի առատացում, սակայն ավելի հաճախ դրանք քչանում են։

Ներարգանդային միջոցները նույնպես կարող են ազդել դաշտանի վրա։ Ներարգանդային պարույրը տեղադնելուց հետո առաջին վեց ամսվա ընթացքում կարող են ի հայտ գալ անկանոն արյունահոսություններ, որից հետո բազմաթիվ կանանց մոտ դաշտաններն իսպառ անհետանում են, իսկ մյուսների մոտ՝ դառնում քչացած կամ անկանոն։ Վերոնշյալ տեղաշարժերը շատ հաճախ զարգանում են, երբ պարույրը արգանդում մնում է երկարատև ժամանակ և, եթե այլ գանգատներ չկան, ապա դաշտանի նման շեղումները չեն վկայում առողջական լուրջ խնդիրների մասին։

Հորմոնային փոխարինող բուժում

Հորմոնային փոխարինող բուժումը (ՀՓԲ) կարող է նշանակվել որոշ կանանց նրանց դաշտանադադարի վաղ շրջաններում։ ՀՓԲ էությունը դաշտանադադարին ուղեկցող բնական հորմոնների մակարդակի նվազեցումը դեղի միջոցով ստացվող հորմոններով փոխարինելն է, ինչը թույլ է տալիս մեղմացնել այս շրջանում զարգացող գանգատները։

Հոդվածը վերանայվել է՝ 02-02-2021