Մեթամֆետամիններ - Հոգեկան առողջություն

«Սառույցը» մետամֆետամինի ժարգոնային անվանումն է, որը խթանիչ ազդեցությամբ թմրամիջոց է:

Մեթամֆետամինն արագացնում է դեպի գլխուղեղ և հակառակ ուղղությամբ նյարդային ազդանիշների հաղորդումը և կապված է գլխուղեղի և հոգեկան առողջության տարբեր խնդիրների ռիսկի բարձրացման հետ, այդ թվում՝ ինսուլտ, տագնապ, դեպրեսիա, բռնարարքային վարքագիծ և փսիխոզ:

Մեթամֆետամինը պատկանում է ամֆետամինային թմրամիջոցների խմբին: «Սառույցը» կարող է ունենալ թափանցիկ «քարերի» (այստեղից էլ «սառույց» անվանումը) կամ սպիտակից մինչև շագանակագույն բյուրեղանման փոշու տեսք: Այն կարող է օգտագործվել ներարկման, ծխելու, քթով ներքաշելու կամ կուլ տալու եղանակով:

Մեթամֆետամինի ազդեցությունները

Մեթամֆետամինն առաջացնում է ուժեղ հուզական «վերելք», ինքնավստահության և ներուժի բարձրացում:

Ժամանակի ընթացքում մարդիկ ստիպված են օգտագործել մեթամֆետամինի ավելի մեծ քանակներ, որ զգան նախկին ազդեցությունը, և սա առաջացնում է ուժեղ հակում: Որոշ օգտագործողների մոտ կարող է նաև զարգանալ թմրամիջոցի պահանջ, որ կարողանան անել առօրյա գործերը:

Հոգեկան առողջության խնդիրներ

Մեթամֆետամին օգտագործող մարդիկ կարող են տառապել պարանոյայից, ցնորքներից (հալյուցինացիա), հիշողության կորստից և քնի դժվարացումից:

Հաճախակի օգտագործվող բարձր դեղաչափերը կարող են առաջացնել մեթամֆետամինային փսիխոզներ՝ պարանոիդ զառանցանքներ, ցնորքներ և արտասովոր, ագրեսիվ կամ բռնությամբ լի վարքագծեր, որը կարող է շարունակվել մի քանի օր:

Թմրամիջոցի օգտագործման դադարեցումն ուղեկցվում է տագնապի, դեպրեսիայի և պարանոյայի ախտանիշներով, որոնք կարող են շարունակվել օրեր:

Կանոնավոր օգտագործողները կարող են զգալ, որ առօրյա գործերը դարձել են քիչ հաճույք պատճառող: Նրանց տրամադրությունը դառնում է անկայուն՝ դեպրեսիայի և հեշտությամբ սթրեսին ենթարկվելու գերակշռությամբ: Մարդիկ դառնում են սոցիալական, աշխատանքային և ֆինանսական խնդիրների նկատմամբ ավելի խոցելի:

Մեթամֆետամին օգտագործելու անհագուրդ ցանկությունը կարող է բերել ագրեսիվ և բռնությամբ լցված վարքագծերի, և նման մարդիկ կարող են խաթարել իրենց ընտանիքի և ընկերների կյանքը:

Մեթամֆետամինից զրկանքը

Մեթամֆետամինի տևական օգտագործումն առաջացնում է ուժեղ հակում: Զրկանքի ախտանիշները կարող են ներառել՝ գերգրգռվածություն, անուժություն և հյուծվածություն, պարանոյա, դեպրեսիա, անհանգստություն և տագնապ: Մարդիկ կարող են զգալ մի քանի շաբաթ շարունակվող թմրամիջոց օգտագործելու մեծ ցանկություն, խուճապի նոպաներ և գիշերային մղձավանջներ: