Միայնակություն - Տարեցների առողջություն

Տարեց մարդիկ առանձնակի խոցելի են միայնության և շրջապատից մեկուսացման առումով, և սա կարող է լուրջ ազդեցություն թողնել նրանց առողջության վրա: Սակայն, կան մենակության հաղթահարման ուղիներ, նույնիսկ եթե դուք միայնակ եք ապրում և դժվարանում եք տնից դուրս գալ:

Բազմաթիվ տարեցներ միայնակ ու հասարակությունից կտրված են, հատկապես նրանք, ովքեր 75 տարեկանից բարձր են:

Օրինակ, համաձայն Age UK-ի տվյալների, Անգլիայում 75 տարեկանից բարձր ավելի քան 2 միլիոն մարդ ապրում է միայնակ, և ավելի քան մեկ միլիոն տարեց մարդիկ ասում են, որ մեկ ամսից ավելի են անցնում առանց ընկերոջ, հարևանի կամ ընտանիքի անդամի հետ շփվելու:

Մարդիկ կարող են սոցիալապես մեկուսացված լինել տարբեր պատճառներով, ինչպիսիք են ծերանալը կամ թուլանալը, այլևս ընտանիքի ուշադրության կենտրոնում չլինելը, աշխատավայրը լքելը, ամուսինների և ընկերների մահը, հաշմանդամությունը կամ հիվանդությունը:

Ինչ պատճառ էլ որ լինի, մշտապես միայնակ և խոցելի վիճակում լինելը ահռելի ազդեցություն է թողնում անձի վրա և կարող է հանգեցնել դեպրեսիայի և ֆիզիկական առողջության և բարեկեցության լուրջ անկման:

Եթե որևէ մեկը միայնակ է, հավանաբար, նաև ունի շփման խնդիրներ: Մենակությունը պարուրում է մարդկանց խարանով, և տարեց մարդիկ հակված են օգնության չդիմել, քանի որ չափազանց մեծ հպարտություն ունեն:

Կարևոր է նաև նկատի ունենալ, որ մենակությունը կարող է և ազդում է ցանկացած տարիքի ցանկացած մարդու վրա:

Ահա տարեցների համար այլ մարդկանց հետ շփվելու և կրկին օգտակար և գնահատված զգալու մի շարք ուղիներ:

• Ժպտացեք, նույնիսկ եթե դժվարանում եք դա անել. оգտվեք այլ անձանց ժպտալու կամ զրույց նախաձեռնելու բոլոր հնարավորություններից, օրինակ՝ խանութի վաճառողուհուն կամ ձեր բժշկի սպասասրահում գտնվող այլ մարդկանց տեսնելիս: Եթե ​​ամաչկոտ եք կամ վստահ չեք, թե ինչ ասել, փորձեք մարդկանց հարցնել իրենց մասին: 
• Հրավիրեք ընկերներին թեյելու. եթե ​​ձեզ տխուր և միայնակ եք զգում, գուցե կարծեք, որ ոչ ոք չի ցանկանում այցելել ձեզ: Սակայն, ընկերները, ընտանիքը և հարևանները հաճախ դրականորեն կպատասխանեն ձեզնից հրավեր ստանալուն, կայցելեն ձեզ և որոշակի ժամանակ կանցկացնեն ձեզ հետ: Նույն կերպ, կարող եք ձեր մտերիմներին և ընկերներին հրավիրել որևէ սրճարան կամ այլ վայր:
• Պահպանեք կապը հեռախոսի միջոցով. ընկերոջ կամ բարեկամի հետ հեռախոսային զրույց ունենալը նույնպես կարող է օգնել, որ չկորցնեք ձեր նախկին կապերն ու փոխհարաբերությունները:
• Սովորեք համակարգչով կամ բջջայինով շփման ուղիները. եթե ձեր ընկերները կամ ընտանիքը ձեզնից հեռու են, նրանց հետ կապը պահպանելու հիանալի միջոցներ են համակարգիչը, սմարտֆոնը կամ պլանշետը: Այս սարքերը թույլ են տալիս կատարել տեսազանգեր (Զում, Սկայփ, Վայբեր և այլն), ստեղծել նոր առցանց կապեր, կիսվել լուսանկարներով կամ տեսանյութերով կամ մասնակցել ձեր նախընտրած թեմայի շուրջ առցանց քննարկումներին:
• Ներգրավվեք տեղային համայնքային միջոցառումներին. օրինակներից են փոխօգնության խմբերը, համայնքային սոցիալական ծրագրերը, տարբեր միջոցառումները և այլն:
• Պահեք ձեր օրագիրը. միայնակությունը հաղթահարելուն կարող է օգնել ձեր ապագա գործերը նախատեսելը և դրանց վերաբերյալ գրառումներ կատարելը:
• Դուրս եկեք փողոց. մի՛ սպասեք, որ մարդիկ գան և տեսնեն ձեզ, այլ ինքներդ նախաձեռնեք այցելություններ և հանդիպումներ:
• Օգնեք մյուսներին. օգտագործեք ձեր գիտելիքներն ու կյանքի ընթացքում կուտակած փորձը՝ այլ մարդկանց օգնելու և բարի խորհուրդ տալու համար: Լավ միտք է նաև կամավոր բարեգործական ծրագրերին մասնակցելը: