Տղամարդու մոտ սեռական հակման (լիբիդոյի) կորուստ

Տղամարդու մոտ սեռական հակման (լիբիդոյի) կորուստ
Անգլերեն անվանումը՝ Loss of Мale Libido

Տղամարդկանց մոտ սեռական ցանկությունը ժամանակի ընթացքում աճում և թուլանում է առանց որևէ տեսանելի պատճառի։

Եվ դա նորմալ է, երբ տղամարդիկ երբեմն կորցնում են սեռական հարաբերություն ունենալու նկատմամբ հետաքրքրությունը կամ «լիբիդոն»։ Սակայն լիբիդոյի նվազելը կամ կորուստը դառնում է խնդիր, երբ կրում է մշտական բնույթ և բերում սեռական զուգընկերուհու հետ սեռական և առօրյա շփումներում տարբեր անախորժությունների։

Ձեր լիբիդոն կարող է աճել այնպիսի իրավիճակներում, ինչպիսիք են փոխհարաբերություններից և շփումներից հաճույք ստանալը, մարմնական և հոգեկան առողջ վիճակը, սոցիալական բարեկեցիկությունը, արձակուրդները և մարմինն ու մտքերը «թուլացնող» երևույթները։

Հակառակը, ձեր լիբիդոն կարող է նվազել կյանքի տարբեր իրավիճակներում՝ փոխհարաբերություններում և շփումներում տարբեր խնդիրների ու հակասությունների առկայություն, երեխայի ծնունդ, սթրես, ֆիզիկական և մտավոր գերծանրաբեռնվածություն կամ անձնական խնդիրներ։

Սեռական հակումը կարող է նվազել նաև այլ գործոնների ազդեցությամբ, ինչպիսիք են՝

  • քրոնիկ հիվանդության առկայություն
  • դեպրեսիա, հիասթափություն և հուսալքություն
  • արական սեռական հորմոնի՝ տեստոստերոնի ցածր մակարդակ
  • որոշ դեղերի ընդունում, օրինակ՝ տագնապամարիչներ, քնաբերներ և հակադեպրեսանտներ
  • առողջական որոշ խնդիրների առկայություն, օրինակ՝ քնի օբստրուկտիվ ապնոէ։

Եթե սեռական հարաբերությունների նկատմամբ ձեր հետաքրքրությունը նվազել է սթրեսի, անձնական կամ փոխհարաբերությունների հետ կապված խնդիրների պատճառով, օգտակար կարող է լինել այս թեմայով ձեր զուգընկերուհու հետ զրուցելը և նրան ձեր զգացողությունները և խնդիրները ներկայացնելը։ Նման զրույցից խուսափելը կարող է ավելի խորացնել առկա խնդիրները՝ սեռական նորմալ փոխհարաբերության վերականգնումը դարձնելով ավելի դժվար։

Եթե դուք դժվարանում եք նման զրույց սկսելը, փորձեք ձեր զուգընկերուհուն հարցնել, թե ձեզ հետ սեռական հարաբերության ժամանակ ինչպիսի զգացողություններ կամ խնդիրներ է նա ունենում, ինչն է հավանում և ինչը՝ ոչ։ Բոլոր դեպքերում ձեր զուգընկերուհուն վստահեցրեք, որ դուք շարունակում եք սիրել նրան և նրա հետ ինտիմ շփումներից հաճույք եք ստանում։

Եթե ձեր սեռական հակումը նվազում է առանց որևէ տեսանելի պատճառի, առավել ևս, որ և՛ դուք, և՛ ձեր սեռական զուգընկերուհին անհանգստացած եք նման իրավիճակից, զրուցեք այդ մասին ձեր բժշկի կամ տարբեր մասնագետների՝ սեռախտաբանի (սեքսոպաթոլոգ) և հոգեթերապևտի հետ։

Հիշեք, որ սեռական հարաբերությունը միայն բուն սեռական ակտը չէ։ Եթե ձեր լիբիդոն նվազել է, դուք կարող եք փորձել սեռական գրգռման ցանկալի վիճակին հասնելու որոշ, ավելի զգայական մեթոդներ։ Օրինակ՝

  • մեկմեկու մարմինները շոյելը
  • միասին լոգանք կամ ցնցուղ ընդունելը
  • միմյանց մերսելը
  • միմյանց ավելի դանդաղ համբուրելը
  • միմյանց մարմնի զգայուն շրջանները համբուրելը
  • միմյանց հագուստը հանելը։

Հոգ տարեք ձեր մասին

Առողջ ապրելակերպը կարող է բարելավել ձեր սեռական կյանքը։ Դուք կարող եք՝

  • կարգավորել ձեր մարմնի զանգվածը, եթե ունեք հավելյալ կիլոգրամներ
  • կրճատել օգտագործվող ալկոհոլի քանակները
  • խուսափել ապօրինի թմրամիջոցներից
  • դառնալ ֆիզիկապես ակտիվ (քայլք, լող, հեծանիվի վարում, մարզանքներ և այլն)
  • դադարեցնել ծխելը, եթե ծխող եք։

Հոդվածը վերանայվել է՝ 10-05-2019