Դեղերի զուգակցումն ալկոհոլի հետ - Դեղամիջոցներ

Ալկոհոլը կարող է փոխազդեցության մեջ մտնել բազմաթիվ, այդ թվում՝ առանց դեղատոմսի վաճառվող դեղամիջոցների հետ:

Այս փոխազդեցությունը կարող է լինել վնասակար և վտանգավոր: Այլ դեպքերում ալկոհոլը կարող է խախտել օրգանիզմի վրա դեղամիջոցի ազդեցության մեխանիզմները՝ նվազեցնելով կամ վերացնելով բուժական արդյունքները կամ ուժգնացնելով կողմնակի ազդեցությունները: Ուստի, կարևոր է իմանալ, թե երբ կարող է այս երկուսի միաժամանակյա ընդունումը դառնալ վտանգավոր:

Ինչպե՞ս են դեղամիջոցները և ալկոհոլը ենթարկվում նյութափոխանակության

Լյարդը հանդիսանում է ամենամեծ մարսողական գեղձը և այստեղ են սննդի միջոցով ստացված բազմաթիվ նյութեր ենթարկվում նյութափոխանակության: Մեծաթիվ դեղամիջոցները և ալկոհոլը նույնպես քայքայվում են լյարդում: Բջջային մակարդակում ընթացող այս գործընթացը տեղի է ունենում տարաբնույթ քիմիական ռեակցիաների միջոցով:

Բջիջներում ընթացող քիմիական ռեակցիաները հաճախ պահանջում են այլ քիմիական նյութեր, որոնք կոչվում են ֆերմենտներ կամ էնզիմներ: Ֆերմենտները հանդես են գալիս որպես կատալիզատոր՝ արագացնելով քիմիական ռեակցիաները:

Որոշ դեպքերում դեղամիջոցները և ալկոհոլը կարող են օգտագործել նույն ֆերմենտները, որի արդյունքում որոշ դեղամիջոցներ կարող են դառնալ ավելի նվազ արդյունավետ, իսկ մյուսները նույնիսկ կարող են դրսևորել թունավոր ազդեցություններ:

Ռիսկային է նաև այն իրավիճակը, երբ ալկոհոլն ուժեղացնում է որոշ դեղամիջոցների անցանկալի կամ կողմնակի ազդեցությունները: Նման դեպքերում որևէ դեղամիջոցի հնարավոր թույլ կողմնակի ազդեցությունը ալկոհոլի հետ զուգակցելիս կարող է վերածվել իրական վտանգ ներկայացնող և անհետաձգելի բուժօգնություն պահանջող վիճակի:

Ալկոհոլի և դեղերի փոխազդեցության առաջացրած առողջական խնդիրները

Առողջական խնդիրներ կարող են զարգանալ տարբեր դեղամիջոցների և ալկոհոլի զուգակցման ժամանակ, սակայն ավելի հաճախ վնասակար փոխազդեցություն են դրսևորում հակաբիոտիկները, հակադեպրեսանտները, քնաբեր հաբերը, ցավազրկողները, հատկապես ուժեղ ազդեցության թմրաբեր ցավազրկողները, ինչպես նաև հազի ու ալերգիայի դեմ նշանակվող հակահիստամինային դեղամիջոցները:

Ալկոհոլի և դեղամիջոցների փոխազդեցությունը կարող է ընթանալ անկանխատեսելի ախտանիշներով և ընթացքով: Եթե միաժամանակ օգտագործում եք ալկոհոլ և որևէ կամ մի քանի դեղամիջոցներ, կարող են զարգանալ բազմաթիվ ախտանիշներ, այդ թվում՝

• սրտխառնոց և փսխում
• գլխացավ
• շփոթվածություն, շշմածություն կամ քնկոտություն
• գլխապտույտ և ուշագնացություն
• արյան ճնշման տատանումներ
• անսովոր վարք
• հավասարակշռության և կորդինացիայի խանգարումներ
• դժբախտ պատահարներ:

Ինչպես ալկոհոլի, այնպես էլ դեղամիջոցների նյութափոխանակությունը տևում է որոշակի ժամանակ, ուստի պարտադիր չէ, որ այս ախտանիշները զարգանան միայն այն դեպքում, երբ դուք ճշգրտորեն նույն ժամերին եք օգտագործել ալկոհոլ և դեղամիջոց:

Հնարավոր բարդություններ

Դեղամիջոցների և ալկոհոլի միաժամանակյա օգտագործումը կարող է ավարտվել որոշ բարդություններով, այդ թվում՝

• լյարդի վնասում
• սրտային խնդիրներ
• ներքին արյունահոսություն
• շնչառության ընկճում
• դեպրեսիա:

Ովքե՞ր են ավելի բարձր ռիսկի խմբում

Դեղամիջոցների և ալկոհոլի միաժամանակյա օգտագործման ժամանակ վտանգավոր փոխազդեցության դրսևորման տեսանկյունից ավելի ռիսկային խմբում են կանայք, մեծ տարիքով տղամարդիկ և բոլոր նրանք, ովքեր ունեն լյարդային խնդիրներ: Դուք նույնպես կարող եք հայտնվել ռիսկի խմբում, եթե՝

• օգտագործում եք ալկոհոլի մեծ քանակներ
• դեռահաս եք
• ունեք առողջական որևէ խնդիր:

Դեղամիջոցների և ալկոհոլի անվնաս օգտագործում

Միշտ ծանոթացեք դեղամիջոցի պիտակին կամ ներդիրին: Ուշադրություն դարձրեք, թե արդյոք հատուկ հրահանգ կա, որ տվյալ դեղամիջոցն ալկոհոլի հետ չի կարելի զուգակցել: Եթե վստահ չեք, զրուցեք բժշկի հետ: Հիշեք նաև, որ որոշ թուրմեր, օշարակներ և այլ միջոցներ կարող են պատրաստված լինել սպրիտային հիմքի վրա: