Skip to main content

Օվուլյացիայի նշանները - Կանանց առողջություն

Եթե ​փորձում եք հղիանալ, ձեր շանսերը կարող են բարձրանալ, եթե դուք սեռական հարաբերություն ունենք ձեր ցիկլի որոշակի ժամանակահատվածում:

Իմանալով, թե երբ է ձեզ մոտ ձվազատումը (օվուլյացիան) տեղի ունենում՝ ձվարանից ազատվում է ձվաբջիջ, դուք կարող եք հասկանալ, թե որն է ձեր հղիանալու համար ճիշտ ժամանակը:

Երբ դուք հղիանալուն լավագույնս պատրաստ եք

Ձվազատումից հինգ օր առաջ ձեր ձվազատման օրվա հետ միասին այն օրերն են, երբ ձեր հղիանալու հավանականությունը դառնում է ամենաբարձրը: Սպերմատոզոիդները կարող են ձեր օրգանիզմում կենսունակ մնալ մինչև հինգ օր, ուստի, եթե դուք սեռական հարաբերություն ունենաք ձվազատումից մինչև հինգ օր առաջ, ապա կարող եք հղիանալ: Ձվազատումից հետո ձվաբջիջը կենսունակ է մնում միայն 12-24 ժամ, որից հետո ձեր հղիանալու ժամանակը սպառվում է, և դուք ստիպված եք սպասել մինչև մյուս ամսվա ձվազատման նախորդող օրերը:

Հղիանալու ձեր շանսերն ամենաբարձրն են ձվազատմանը նախորդող երեք օրերի ընթացքում՝ ներառյալ բուն ձվազատման օրը:

Ինչպե՞ս կանխատեսել ձվազատումը

Ձվազատումը սովորաբար տեղի է ունենում ձեր դաշտանային ցիկլի կեսին՝ ձեր հաջորդ դաշտանի առաջին օրվանից մոտ 14 օր առաջ: Թեև ձվազատումը սկսվելու նշանները կարող են ձեզ թվալ անորոշ, սակայն կան բաներ, որոնց ուշադրություն դարձնելը կարող են օգնել, որպեսզի կանխատեսեք ձեր «հղիացման օրերը»:

Լորձի փոփոխություններ

Դաշտանային ցիկլի ժամանակ ձեր հեշտոցային արտադրուկի փոփոխություններին ուշադրություն դարձնելը հանդիսանում է այսպես կոչված Բիլինգի ձվազատման մեթոդի հիմքը: Ձվազատման օրվա մոտակայքում դուք կարող եք զգալ, որ ձեր հեշտոցային արտադրուկը թափանցիկ, առաձգական և լպրծուն է՝ նման հում ձվի սպիտակուցին: Ձվազատումից հետո, երբ հղիանալու հավանականությունն ընկնում է, լորձային արտազատուկը դառնում է պղտոր, թանձր (մածուցիկ) և կպչուն կամ ընդհանրապես անհետանում:

Մարմնի ջերմաստիճանի փոփոխություններ

Բժիշկը ձեզ կարող է նաև բացատրել այսպես կոչված մարմնի հիմնական (բազալ) ջերմաչափման հմտությունները, որը կարող է ավելի զգայուն դառնալ ձվազատման օրերը կանխատեսելու համար: Դուք պետք է չափեք ձեր մարմնի ջերմաստիճանը բերանում, ուղիղ աղիքում կամ հեշտոցում, ամեն առավոտ, նույն ժամին, մինչև անկողնուց վեր կենալը։ Ձվազատման ժամանակաշրջանում ջերմությունը բարձրանում է 0,2–0,5°C-ով՝ կանանց մեծ մասի մոտ դաշտանային ցիկլի մոտավորապես մեջտեղում։

Ջերմաստիճանային օրական գրանցումներին հետևելիս դուք կարող եք ժամանակի ընթացքում հասկանալ, թե ինչպես է ձեր մարմնի ջերմաստիճանը ցիկլի ընթացքում փոփոխվում: Հղիանալու համար ամենահավանական ժամանակը ջերմաստիճանի բարձրացմանը նախորդող 2-3 օրերն են:

Այլ նշաններ

Կան նաև ձվազատման մոտավոր ժամանակը կանխատեսելուն օգնող այլ նշաններ ևս, օրինակ՝ որովայնային թույլ կծկանքներ, կրծքագեղձերի պնդացում և գերզգայունություն կամ սեռական ցանկության բարձրացում: Սակայն այս նշանները կարող են վկայել մոտալուտ ձվազատման մասին ավելի ցածր հավաստիությամբ:

Օրացուցային (ռիթմային) մեթոդ և այլ գործիքներ

Ձվազատման օրացույցները և հաշվիչները նույնպես կարող են օգնել ձվազատման կանխատեսմանը: Զրուցեք այս մասին ձեր բժշկի հետ:

Ձվազատման օրվա կանխատեսման համար հազվադեպ կարող են օգտագործվել նաև այլ մեթոդներ, օրինակ՝

  • մեզում լյուտեինացնող հորմոնի (LH) չափում (որը սկսում է բարձրանալ ձվազատումից մի քանի օր առաջ), որը մատչելի է որպես տնային պայմաններում կիրառելի թեստ-հավաքածու
  • արյան մեջ պրոգեստերոն հորմոնի չափում (PROG):

Հիշե՛ք նաև

Եթե ցանկանում եք հղիանալ, կան բազմաթիվ այլ կարևոր հարցեր, որոնց շուրջ քայլեր ձեռնարկելը կարող է օգնել ձեր պտղաբերության բարելավմանը և հղիության ընթացքում տարբեր խնդիրներից զերծ մնալուն:

Օրինակներից են՝

  • ֆոլատի ընդունում
  • առողջ սննդակարգի պահպանում
  • ժամանակին պատվաստումների ստացում
  • ծխախոտից և ալկոհոլից խուսափում:

Հոդվածը հրապարակվել է՝ 17-05-2020
Վերջին վերանայում՝ 08-04-2024