Առնանդամի մաշկի բորբոքում - Տղամարդկանց առողջություն

Տղամադու սեռական օրգանների շրջանի մաշկը, լինելով զգայուն, կարող է հեշտությամբ գրգռվել և բորբոքվել:

Ե՞րբ կարող են գրգռվել սեռական օրգանների մակերեսները

Առնանդամի մաշկը և գլխիկի լորձաթաղանթը կարող են գրգռվել շփման պատճառով, որի պատճառներ կարող են դառնալ հետևյալ իրերը և նյութերը՝

• պահպանակներ և ռետինե թաղանթներ
• քսանյութեր (լուբրիկանտներ) և սպերմատոզոիդները ոչնչացնող նյութերս (պերմիցիդներ)
• գրգռիչ օճառ, բաղնիքի գել և շամպուն
• դեզադորանտներ
• մանրէազերծող (դեզինֆեկտանտ) և հականեխիչ (անտիսեպտիկ) նյութեր, ինչպես նաև դրանք պարունակող քսուքներ
• լվացքի փոշի, եթե ներքնազգեստը լավ չի պարզաջրվել
• նոր ներքնազգեստ, հատկապես՝ ոչ բամբակյա:

Սեռական օրգանների մաշկը և լորձաթաղանթները կարող են գրգռվել նաև քրտինքից, մեզից և միզասեռական արտադրությունից:

Աճուկափոշտային վարակներ

Մաշկային սնկիկները սիրում են խոնավ և տաք պայմաններ, օրինակ՝ մաշկային ծալքերը: Սա նշանակում է, որ սնկիկային վարակները կանխարգելելու համար աճուկափոշտային շրջանը պետք է պահել մաքուր և չոր:

Աճուկափոշտային շրջանի սնկիկային վարակը կարող է առաջացնել մաշկի գրգռվածություն, քոր կամ ցավ: Վարակը կարող է փոխանցվել մի մարդուց մյուսը, նույն կերպ, աճուկափոշտային ծալքերից սնկիկները կարող են տարածվել դեպի առնանդամի գլխիկ:

Դիմեք ձեր բժշկին, եթե կարծում եք, որ ձեզ մոտ առկա է աճուկափոշտային շրջանի սնկիկային վարակ:

Օգտակար խորհուրդներ

• Սեռական օրգանների գերգրգռված մաշկը լվացեք գոլ ջրով օրական առնվազն երկու անգամ: Հատուկ ուշադրություն դարձրեք առնանդամի գլխիկի և ծայրային թլիպի տակ ընկած չերևացող ծալքերի մաքրությանը: Լվացած տեղամասերը չորացրեք մաքուր սրբիչը հպելով թաց մաշկին կամ առնանդամի գլխիկին, այլ ոչ թե քսելով կամ տրորելով:
• Մի՛ օգտագործեք օճառ, գել կամ մաշկն ու լորձաթաղանթները գրգռող այլ միջոցներ, այլ լվացումը կատարեք մաքուր ջրով: Ծայրահեղ դեպքում կարելի է փորձել օճառ չպարունակող «քլինզերներ»։
• Սեռական օրգանների լվացումը կրկնեք յուրաքանչյուր միզելուց հետո:
• Եթե առկա է ցավ, կարելի է դիմել սառեցնող միջոցներին: Նման դեպքերում օգտագործեք մաքուր բարակ սրբիչով փաթաթված սառույցի կտորներ:
• Աղային բաղնիքը կարող է մեղմացնել քորը կամ անհարմարավետությունը, որից հետո պետք է լավ պարզաջրել սեռական օրգանները:
• Խուսափեք սեռական շփումներից մինչև ձեր սեռական օրգանների մաշկի գերգրգռվածության նշանների լիարժեք վերանալը:

Ինչպե՞ս կանխարգելել առնանդամի մաշկի գերգրգռումը

• Սեռական օրգանների շրջանի մաշկը պահեք չոր և մաքուր։
• Ամեն օր փոխեք ներքնազգեստը։
• Կրեք միայն լավ արդուկած և չոր ներքնազգեստ։
• Խուսափեք այնպիսի ներքնազգեստից, որն ըստ ձեզ կարող է գրգռել արտաքին սեռական օրգանները կամ աճուկները:
• Միզելուց առաջ և հետո լավ լվացեք ձեռքերը:
• Սեռական հարաբերության ժամանակ օգտագործեք միայն հիպոալերգիկ պահպանակներ:
• Յուրաքանչյուր սեռական հարաբերությունից առաջ և հետո լվացեք ձեր սեռական օրգանները: