Հղիությունը 35-ից հետո - Հղիություն

Մտածում եք 35-ից հետո հղիանալու մասի՞ն: Հասկացեք հնարավոր խնդիրները և իմացեք, թե ինչ քայլեր ձեռնարկել առողջ հղիություն ունենալու համար:

Եթե 35 տարեկանից անց եք և ցանկանում եք հղիանալ, ուրեմն կայացրել եք հրաշալի որոշում: Բազմաթիվ ընտանիքներ հղիությունը հետաձգում են մինչև 30-ն անց տարիքը և դրանից հետո ունենում առողջ երեխաներ: Կան որոշակի քայլեր, որոնք կարող են օգնել, որ ձեր երեխային իր կյանքի լավագույն սկիզբը տաք:

Հասկացեք ռիսկերը

Կենսաբանական ժամացույցը մեր վերահսկողությունից դուրս փաստ է: Բայց 35 տարեկանի համար որևէ մոգական բան գոյություն չունի: Սա պարզապես մի տարիք է, երբ ռիսկերին պետք է արժանացնել ավելի մեծ ուշադրություն: Ահա մի քանի օրինակ:

• Հղիանալու համար կարող է ավելի երկար ժամանակ պահանջվել. դուք ծնվել եք սահմանափակ քանակությամբ ձվաբջիջներով: Երբ հասնում եք 35-ի կողմերը, ձեր ձվաբջիջների քանակը և որակը նվազում է: Բացի այդ, երբ մեծանում եք, ձեր ձվաբջիջներն այնքան հեշտությամբ չեն բեղմնավորվում, որքան ավելի երիտասարդ տարիքում: Եթե 35 տարեկանից բարձր եք և չեք կարողացել հղիանալ վեց ամիս, մտածեք ձեր բժշկից խորհրդատվություն ստանալու մասին:
• Բազմապտուղ հղիությունն ավելի հավանական է. երկվորյակներ ունենալու հավանականությունը մեծանում է տարիքին զուգընթաց։ Սա պայմանավորված է նրանով, որ հորմոնային փոփոխությունները կարող են առաջացնել ձվազատման ընթացքում միաժամանակ մեկից ավելի ձվաբբջջի ազատում: Բացի այդ, օժանդակ վերարտադրողական տեխնոլոգիաները, ինչպիսին է արտամարմնային բեղմնավորումը, նույնպես կարող են դեր խաղալ:
• Հղիության (գեստացիոն) դիաբետի ռիսկն ավելի մեծ է. այս տեսակի դիաբետը հանդիպում է միայն հղիության ընթացքում։ Այն ավելի տարածված է մեծ տարիքում: Հղիության դիաբետով կանայք պետք է խստորեն վերահսկեն արյան շաքարը սննդակարգի և ֆիզիկական ակտիվության միջոցով, սակայն երբեմն անհրաժեշտ է նաև դեղորայք: Չբուժվելու դեպքում հղիության դիաբետը կարող է հանգեցնել պտղի միջինից ավելի աճին: Ավելի խոշոր երեխա ունենալը մեծացնում է ծննդաբերության ընթացքում վնասվածքների ռիսկը: Գեստացիոն դիաբետը նաև կարող է մեծացնել վաղաժամ ծննդաբերության, հղիության ընթացքում բարձր արյան ճնշման (պրեէկլամպսիա) և ծննդաբերությունից հետո ձեր երեխայի համար բարդությունների ռիսկը:
• Հղիության ընթացքում բարձր արյան ճնշման զարգացման ռիսկն ավելի մեծ է. հետազոտությունները ցույց են տալիս, որ հղիության ընթացքում զարգացող բարձր արյան ճնշումը (պրեէկլամպսիա) ավելի հաճախ հանդիպում է մեծ տարիքում: Ձեր չծնված երեխայի աճի և զարգացման հետ մեկտեղ բժիշկը նաև կվերահսկի ձեր արյան ճնշումը: Եթե հղիության ընթացքում բարձր արյան ճնշում ունեք, պետք է ավելի հաճախ այցելեք ձեր բժշկին: Բացի այդ, ձեզ կարող է անհրաժեշտ լինել ծննդաբերել մինչև ծննդաբերության նախատեսված ժամկետը՝ բարդություններից խուսափելու համար:
• Վաղաժամ ծննդաբերության և ցածր քաշով երեխա ունենալու ռիսկն ավելի մեծ է. վաղաժամ ծնված երեխաները հաճախ ունենում են բարդացած խնդիրներ։
• Կեսարյան հատման հավանականությունն ավելի բարձր է. 35 տարեկանից հետո մեծանում է հղիության հետ կապված բարդությունների ռիսկը, որոնք կարող են հանգեցնել կեսարյան հատման միջոցով ծննդալուծման:
• Քրոմոսոմային խանգարումների ռիսկն ավելի մեծ է. ավելի մեծ տարիքով մայրերից ծնված երեխաներն ունեն որոշակի քրոմոսոմային խանգարումների բարձր ռիսկ, ինչպիսին է Դաունի համախտանիշը:
• Հղիության կորստի ռիսկն ավելի մեծ է. տարիքի հետ մեծանում է ինքնաբուխ վիժման և մեռելածնության ռիսկը։ Սա կարող է պայմանավորված լինել նախկինում գոյություն ունեցող առողջական խնդիրներով կամ երեխայի քրոմոսոմային խանգարումներով: Հետազոտությունները ցույց են տալիս, որ վիժման մեծ ռիսկը կարող է պայմանավորված լինել ինչպես մեծ տարիքում ձվաբջջի որակի նվազմամբ, այնպես էլ քրոնիկ հիվանդությունների բարձր ռիսկով: Քրոնիկ խնդիրներից են բարձր արյան ճնշումը կամ շաքարային դիաբետը:

Հետազոտությունները նաև ցույց են տալիս, որ բեղմնավորման պահին տղամարդկանց տարիքը նույնպես կարող է առողջական ռիսկեր ներկայացնել ապագա երեխայի առողջության համար:

Կատարեք առողջ ընտրություններ

Առողջության մասին հոգ տանելը ձեր երեխայի լավ առողջությանը նպաստելու լավագույն միջոցն է: Հատուկ ուշադրություն դարձրեք հետևյալի վրա:

• Այցելեք ձեր բժշկին մինչև հղիանալը. նախքան հղիանալը, խոսեք բժշկի հետ ձեր ընդհանուր առողջության մասին: Քննարկեք ապրելակերպի փոփոխությունները, որոնք կարող են բարելավել առողջ հղիության և երեխայի ձեր հնարավորությունները: Լուծեք պտղաբերության կամ հղիության հետ կապված խնդիրները: Հարցրեք, թե ինչպես բարձրացնել բեղմնավորման հավանականությունը: Հարցրեք նաև հղիացման տարբերակների մասին, եթե բեղմնավորման դժվարություններ ունեք:
• Հետևեք նախածննդյան (պրենատալ) կանոնավոր այցերի ժամանակացույցին. երբ արդեն հղիացել եք, բաց մի՛ թողեք ձեր նախածննդյան այցերը: Դրանք թույլ են տալիս բժշկին, որ վերահսկի ձեր և ձեր երեխայի առողջությունը: Տեղեկացրեք ձեզ անհանգստացնող ցանկացած ախտանիշի մասին: Բժշկի հետ խոսելը, ամենայն հավանականությամբ, կփարատի ձեր մտահոգությունները:
• Անցեք առողջ սննդակարգի. հղիության ընթացքում ձեզ անհրաժեշտ կլինի ավելի շատ ֆոլաթթու, կալցիում, երկաթ, վիտամին D և այլ կարևոր սննդանյութեր: Եթե արդեն առողջ սննդակարգ եք ընդունում, շարունակեք նույն կերպ: Նախածննդյան շրջանում ամենօրյա վիտամինը կարող է օգնել լրացնել ցանկացած բացը: Ձեր բժշկի իմացությամբ, սկսեք վիտամինային հավելում ընդունել հղիանալուց մի քանի ամիս առաջ:
• Քաշ հավաքեք խելամիտ ձևով. ճիշտ չափի քաշ հավաքելը կարող է օժանդակել ձեր երեխայի առողջությանը: Այն նաև կարող է հեշտացնել ծննդաբերությունից հետո ավելորդ կիլոգրամներից ազատվելը: Աշխատեք ձեր բժշկի հետ՝ ձեզ համար ճիշտ ծրագիր կազմելու համար:
• Մնացեք ակտիվ. կանոնավոր ֆիզիկական ակտիվությունը կարող է օգնել հղիության ընթացքում անհանգստության մեղմացմանը, կենսաուժի բարձրացմանը և ընդհանուր առողջության բարելավմանը: Այն նաև կարող է օգնել տոկունության և մկանային ուժի բարձրացմանը, որը հետագայում կօգնի ավելի հեշտ ծննդաբերությանը: Ստացեք ձեր բժշկի համաձայնությունը նախքան վարժանքների ծրագիրը սկսելը կամ շարունակելը: Սա առանձնակի կարևոր է, եթե ունեք որևէ հիվանդություն:
• Խուսափեք վտանգավոր նյութերից. ալկոհոլը, ծխախոտը և ապօրինի թմրամիջոցներն ընդհանուր առմամբ, իսկ հղիության ընթացքում՝ առավել ևս արգելված են: Նախքան որևէ դեղամիջոց կամ հավելում ընդունելը, հարցրեք ձեր բժշկի կարծիքը:
• Իմացեք քրոմոսոմային խանգարումների նախածննդյան թեստավորման մասին. հարցրեք ձեր բժշկին նախածննդյան սքրինինգի և թեստավորման մասին: Հաճախ օգտագործվող հետազոտությունը պրենատալ բջիջ-ազատ պտղի ԴՆԹ-ի (cffDNA) սքրինինգն է: Սա զարգացող երեխայի որոշակի քրոմոսոմային խանգարումների, օրինակ՝ Դաունի համախտանիշի հայտնաբերման մեթոդ է: Սքրինինգի ժամանակ մոր և պտղի ԴՆԹ-ն վերցվում է մոր արյունից, որը ստուգվում է քրոմոսոմային խնդիրների հավանականության մեծացման համար, ինչպիսիք են Դաունի համախտանիշը, տրիսոմիա 13-ը և տրիսոմիան 18-ը: Ախտորոշիչ թեստերը, ինչպիսիք են թավիկային նմուշառումը և ամնիոցենտեզը, կարող են տեղեկատվություն տրամադրել առանձնահատուկ քրոմոսոմային խանգարումների ռիսկի մասին: Այս թեստերը պարունակում են վիժման փոքր վտանգ: Բժիշկը կարող է ձեզ օգնել՝ գնահատելու հնարավոր ռիսկերն ու օգուտները:

Նայեք դեպի ապագա

Ընտրությունները, որոնք անում եք հիմա, նույնիսկ նախքան հղիանալը, կարող են երկարատև ազդեցություն ունենալ ձեր ապագա երեխայի վրա: Դիտարկեք հղիությունը որպես ձեր երեխային դաստիարակելու և սպասվող հետաքրքիր փոփոխություններին պատրաստվելու հնարավորություն: