Ռելաքսացիան մի վիճակ է, երբ դուք ձեզ զգում եք հանգիստ և թուլացած։
Ռելաքսացիան կամ «թուլացումը» ձեր հոգեկան և ֆիզիկական առողջության վրա կարող է թողնել մի շարք բարերար ազդեցություններ, օրինակ՝ օգնել, որ ճիշտ կառավարեք ձեր ամենօրյա կյանքը։ Այս մեթոդը կարող է կիրառվել գրեթե ամենուրեք՝ տանը, աշխատավայրում, հասարակական տրանսպորտում, հանրային միջավայրերում և այլն։
Ի՞նչ է ռելաքսացիան
Ռելաքսացիան մի վիճակ է, երբ դուք ձեզ զգում եք հանգիստ ու խաղաղ և կարողանում եք կառավարել ձեր սթրեսը կամ անհանգստությունն ու տագնապը։
Ինչպե՞ս կարող է ռելաքսացիան բարելավել ձեր հոգեկան առողջությունը
Ռելաքսացիան մեղմացնում է սթրեսը և հոգեկան առողջության այնպիսի խնդիրներ, ինչպիսք են դեպրեսիան, անհանգստությունը և շիզոֆրենիան։
Ռելաքսացիան նաև ունի ընդհանուր առողջական այլ օգտակար ազդեցություններ, որոնցից են՝
- ձեր սրտազարկի (պուլս), արյան ճնշման և շնչառության հաճախականության նվազեցում և նորմալացում
- մկանային լարվածության և քրոնիկ ցավի մեղմացում
- տրամադրության և ուշադրության կենտրոնացման բարելավում
- ընդհանուր հոգնածության մեղմացում
- զայրույթի և հիասթափության մեղմացում, ինչպես նաև ինքնատիրապետման բարելավում
- խնդիրները լուծելու նկատմամբ վստահության խթանում։
Ռելաքսացիայի տարբերակները
Որպես կանոն, ռելաքսացիայի մեթոդները վերաբերվում են մկանների թուլացմանը կամ շնչառությանը։ Օրինակներից է մկանների հարաճուն թուլացումը, երբ դուք սկզբից ձգում, հետո թուլացնում եք ձեր մարմնի տարբեր մկանախմբերը՝ փորձելով հասկանալ այդ վիճակներին ուղեկցող զգացողությունները։
Ռելաքսացիայի այլ մեթոդներից են՝
- վիզուալիզացիա, երբ ստեղծում եք ձեզ հանգիստ ու խաղաղություն պարգևող որևէ վայրի մտապատկեր
- խոր շնչառություն, երբ կտրվում եք ամեն ինչից և ձեր ուշադրությունը կենտրոնացնում միայն ձեր շնչառության վրա
- հիպնոս
- մեդիտացիա
- գիտակցականություն
- այլ վարժանքներ։
Ռելաքսացիան ձեր կյանքում ներառելու ուղիները
Գտեք ռելաքսացիայի այն մեթոդը, որը լավագույն կերպով է համապատասխանում ձեր խառնվածքին կամ առօրյա կյանքին և դարձրեք այն ձեր կյանքի մի մասը, նույնիսկ եթե ձեր ընտրած մեթոդը տևում է օրական 5-10 րոպե։
Հոդվածը հրապարակվել է՝ 09-05-2018
Վերջին վերանայում՝ 23-04-2024