Հիվանդ երեխայի խնամքը

Հիվանդ երեխայի խնամքը
Անգլերեն անվանումը՝ Sick Child Care

Երբ երեխան հիվանդ է, ձեր ամենակարևոր գործը պետք է լինի նրան լսելը։

Եթե նա ասում է, որ անկողնում մնալ չի ցանկանում, գուցե իրոք դրա կարիքը չկա։ Միգուցե ավելի ճիշտ կլինի նրան բազմոցին պառկեցնելը՝ թեթև վերմակով կամ ծածկոցով։

Անկախ նրանից, ձեր երեխան ննջարանում է թե սենյակներից մեկում բազմոցին պառկած, կան բաներ, որոնք կարող են օգնել նրա ինքնազգացողության բարելավմանը։

  • Սենյակը պահեք լավ օդափոխվող վիճակում։ Չափից դուրս տաք ջերմաստիճանը կարող է ավելի վատացնել երեխայի ինքնազգացողությունը։
  • Մի թողեք, որ ձեր տանը ծխեն։
  • Երեխային տվեք առատ հեղուկներ։ Ուշադրություն դարձրեք, որ այդ օրերին երեխան ստանա օրական հասանելիք հեղուկները։
  • Հիշեք, որ ջերմող երեխան նաև շատ ջուր է կորցնում։ Ուստի, եթե երեխայի մոտ կա ջերմության բարձրացում, ուրեմն նա պետք է ստանա սովորականից ավելի շատ հեղուկներ։
  • Առաջին մի քանի օրը սնունդ տալու համար մի անհանգստացրեք նրան։ Երբ ախորժակ ունենա, ինքը կասի այդ մասին։ Դրա փոխարեն, կարող եք ժամանակ առ ժամանակ հիշեցնել թարմ մրգերի կամ կաթ խմելու մասին։
  • Երեխային ավելի շատ ժամանակ տվեք հանգստանալու, հանգիստ խաղերով զբաղվելու և հարմարավետ միջավայրում գտնվելու համար։ Հիվանդ երեխան սովորաբար ունի հոգնածության զգացում, ուստի՝ հանգստի և քնի ավելի շատ կարիք։ Օգնեք նրա ննջելուն՝ պատմելով հեքիաթներ կամ միացնելով աուդիոգրքեր։
  • Երբեք մի քնեք ձեր երեխայի հետ միասին նույն անկողնում կամ նույն բազմոցին։ Նման դեպքերում դուք ոչ թե օգնում, այլ խանգարում եք միմյանց։ Նորածինների դեպքում նույն անկողնում քնելը բերում է հանկարծակի մահվան հավանականության բարձրացման։
  • Հոգ տարեք այն մասին, որ ձեր հիվանդ երեխան առանձնանա տան մյուս երեխաներից և ընտանիքի «ռիսկի խմբի» անդամներից՝ նորածիններ, հղիներ, բարձր տարիքով մարդիկ։ Հիշեք, որ երեխայի հիվանդությունը կարող է լինել վարակիչ, իր համար՝ անվտանգ, սակայն «ռիսկի խմբի» մարդկանց համար՝ վտանգավոր։
  • Սա նշանակում է նաև, որ հիվանդության և լավացման ընթացքում պետք է ժամանակավորապես ընդհատել երեխայի մսուր-մանկապարտեզ կամ դպրոց հաճախելը։
  • Երեխայի խնամքը նաև ձեզ համար խիստ հոգնեցուցիչ է։ Ուստի ժամանակ գտեք և հանգստացեք ինքներդ, հատկապես, եթե գիշերը ստիպված եք եղել արթուն անցկացնել։ Նման դեպքերում կարելի է կազմակերպել «տնային հերթապահություն», երբ ընտանիքի անդամներով հերթով փոխարինում եք մեկդ մյուսին։
  • Բոլոր դեպքերում, երեխայի վիճակի մասին տեղեկացրեք ձեր բժշկին և հետևեք նրա խորհուրդներին։

Ե՞րբ անհանգստանալ

Շտապ դիմեք բուժօգնության, եթե երեխան ունի բարձր ջերմություն և այս նշաններից մեկը կամ մի քանիսը՝

  • խիստ հիվանդ տեսք
  • շնչառության հետ կապված խնդիրներ, օրինակ՝ շնչարգելություն կամ հևոց
  • պարանոցի լարվածություն
  • լույսն ազդում է աչքերի վրա
  • նորածին երեխայի գաղթունը «փքվել» կամ «ներս է ընկել»
  • անսովոր քնկոտություն և քնից դժվարությամբ արթնացում
  • առկա են ցնցումներ կամ ցնցումային հիվանդությամբ երեխայի մոտ ջղաձգումները շարունակվում են ավելի քան 5 րոպե։

Անհետաձգելի բուժօգնության համար զանգեք 1-03 և կանչեք շտապբուժօգնություն։

Հոդվածը վերանայվել է՝ 12-05-2019