«Սպիդը» և հոգեկան առողջությունը -

«Սպիդը» ամֆետամինային շարքի խթանիչ թմրամիջոց է, որն արագացնում է դեպի ուղեղ և հակառակ ուղղությամբ նյարդային ազդանշանների հաղորդումը:

«Սպիդը» առաջացնում է երջանկության զգացում և ներուժի «վերելք», սակայն՝ նաև պարանոիդ, տագնապ կամ փսիխոզ։

Բժիշկները կարող են նշանակել որոշ ամֆետամինային օրինական դեղեր, օրինակ՝ ուշադրության պակասի գերակտիվության խանգարման (ՈւՊԳԽ) բուժման մեջ։ Մյուս ամֆետամինները, օրինակ՝ «սպիդը» և «սառույցը», արտադրվում և վաճառվում են միայն ապօրինի ճանապարհով։

«Սպիդը» սև շուկայում հայտնվում է որպես փոշի, հաբ կամ պատիճ, որը կարելի է կուլ տալ, ներարկվել, ծխել կամ քթով ներս քաշել։

«Սպիդի» ազդեցությունները

«Սպիդը» թիրախավորում է ձեր գլխուղեղի «պարգևատրման համակարգը» և առաջացնում երջանկության, ինքնավստահության և ներուժի «վերելքի» զգացումներ։ Բազմաթիվ մարդկանց մոտ կանոնավոր օգտագործելիս զարգանում է այս ազդեցությունների նկատմամբ հակում։

Հոգեկան առողջության խնդիրներ

Կան «սպիդի» հետ կապված հոգեկան առողջության բազմաթիվ խնդիրներ։ Դրանց մեծ մասը պայմանավորված է թմրամիջոցի ազդեցության թուլացմանն ուղեկցող զրկանքի կամ երկարատև օգտագործման հետ։ Դրանցից են՝

• դեպրեսիա և տագնապ
• քնի դժվարացում
• պարանոյա, ցնորքներ և գիտակցության խառնաշփոթ վիճակ
• դյուրագրգռություն, տրամադրության շեղումներ և խուճապի նոպա
• հիշողության և ուշադրության հետ կապված խնդիրներ
• բռնություններով ուղեկցվող վարքագիծ։

Մեծ դեղաչափերը և հաճախակի օգտագործումը կարող է առաջացնել ամֆետամինային փսիխոզ, որը շատ նման է պարանոիդ շիզոֆրենիային՝ ցնորքներ, անսովոր բռնարարքներ և ագրեսիվ վարքագիծ։

«Սպիդային հարբածությունը» կապված է նաև անխոհեմ և ագրեսիվ վարքագծի հետ։

Ֆիզիկական և հոգեկան առողջության խնդիրներից բացի թմրամիջոցը բարձրացնում է նաև սոցիալական, աշխատանքային և ֆինանսական խնդիրների ռիսկը։

«Սպիդից» զրկանքը

Թմրամիջոցի օգտագործման կտրուկ դադարեցումը դժվար է, սակայն զրկանքի ախտանիշները սովորաբար սկսում են մեղմանալ մի քանի շաբաթվա ընթացքում։ Այս ընթացքում դուք կարող եք զգալ հետևյալ նշանները՝

• թմրամիջոցն օգտագործելու մեծ ցանկություն
• խիստ քաղցի զգացում
• շփոթվածություն և դյուրագրգռություն
• անուժության զգացում
• քնի խանգարումներ
• անհանգստություն ու տագնապ, դեպրեսիա և պարանոիդ վիճակ
• ողջ մարմնով տարածվող տարաբնույթ ցավեր։