Լողի առողջական օգուտները

Լողի առողջական օգուտները

Լողն առողջարար ցածր աստիճանի ֆիզիկական ծանրաբեռնվածություն է, որը բազմակողմանի բարվոք ազդեցություն է թողնում ձեր մարմնական և հոգեկան առողջության վրա:​

Ինչո՞ւ է լողն ինձ օգուտ

Լողը ցածր ֆիզիկական բեռնվածության վարժանք է, որով կարող են զբաղվել բոլոր տարիքի մարդիկ: Այն ձեր սրտանոթային համակարգը և ձեր մարմինը՝ ոսկրամկանային համակարգը, հատկապես՝ ձեռքերը, մեջքը և ուսագոտին մարզելու հիանալի միջոց է:

Լողը նաև ինքնին ֆիզիկական ակտիվություն է, որը կարող է օգնել ասթմայով ցանկացած տարիքի մարդկանց: Սակայն, եթե ունեք ֆիզիկական լարումից առաջացող ասթմայի նոպա, պետք է նախապես խորհրդակցել ձեր բժշկի հետ, որ ընտրեք ձեզ ամենահամապատասխան ծանրաբեռնվածության աստիճանը:

Երեխաների ո՞ր տարիքում կարող եմ լող սովորեցնել

Այս հարցի վերաբերյալ կան փոքրաթիվ մոտեցումներ, սակայն ընդունված սկզբունքն այն է, որ դուք կարող եք երեխային ընդգրկել լողի համապատասխան ծրագիր սկսած նրա 4 ամսական տարիքից: Այս 4 ամիսների ընթացքում նորածնի իմունային համակարգը հասցնում է որոշակիորեն ամրապնդվել, իսկ դուք հնարավորություն եք ստանում հասկանալու նրա ընդհանուր առողջական վիճակը և գնահատելու վաղ նորածնային աճն ու զարգացումը:

Լողալը և «ջրին» սովորելը կարևոր է յուրաքանչյուր մարդու համար: Լողալու տարրական հմտություններն տիրապետելը, հատկապես երեխաների համար, խիստ կարևոր է, որպեսզի ապահովվի «ջրի հետ շփման» ժամանակ նրանց անվտանգությունը:

Մինչև 14 տարեկան երեխաների համար լող սովորելու լավագույն վայրը ջրավազանն է: Հետազոտությունները վկայում են, որ վաղ տարիքում լողալ սովորած երեխաները կյանքի ընթացքում տիրապետում են հմտությունների ավելի լայն շրջանակի, քան մյուսները:

Ինչ վերաբերվում է հատուկ կարիք ունեցող երեխաներին, նրանք կարող են լողից միայն շահել: Օրինակ, տեսողության խանգարումներով երեխաներին լողը կարող է պարգևել զգայական և զգացմունքային հզոր խթանում:

Ո՞րն է լողի ուսուցչի և մարզիչի միջև տարբերությունը

Լողի ուսուցիչը սովորեցնում է լողալու հետ կապված ամենասկզբնական՝ հիմնարար գիտելիքներն ու հմտությունները: Պատկերավոր ասած, ուսուցիչը սովորեցնում է, թե ինչպես ջրային տարածքում հայտնվելիս «չխեղդվել»: Ուսուցիչը նաև կարող է սովորեցնել լողի հիմնական տեսակները և լողալու ճիշտ մեթոդաբանությունը:

Լողի մարզիչն աշխատում է արդեն լողալ իմացող մարդկանց հետ և զարգացնում է նրանց մարզական ցուցանիշները:

Ինչպե՞ս մասնակցեմ մրցույթային լողին

Մրցույթներին մասնակցելու համար պետք է անդամագրվել լողի որևէ ակումբի: Նման ակումբները սովորաբար ունեն շաբաթական 6-օրյա պարապմունքների ծրագիր՝ կազմված առավոտյան և երեկոյան մարզումներից: Մարզումների ժամանակը կախված է մարդու լողալու հմտություններից և տարիքից:

Լողի ակումբին անդամակցելու օգուտներից են նոր մարդկանց հետ շփումներ և փոխհարաբերություններ հաստատելը, մարզական մարմնակառուցվածք ձեռք բերելը, կազմակերպչական, ժամանակի կառավարման և ձեր առջև դրված խնդիրների լուծման հմտությունները զարգացնելը:

Ի՞նչ անել, եթե չեմ ցանկանում «ձախողվել» լողի մրցույթներում

Բոլորից շուտ «ֆինիշին» հասնելը ձեր միակ հնարավորությունը չէ: Կան լողի հետ կապված այլ զբաղմունքներ ևս, օրինակ՝ ջրային աերոբիկա, ջրային մարզաձևեր, խաղեր և այլն:

Ի վերջո, դուք կարող եք պարզապես հաճախել ջրավազան և լողալ՝ ինքներդ ձեզ համար սահմանելով «անհատական ռեկորդներ» և աստիճանաբար զարգացնել լողի հետ կապված նորանոր հմտություններ:

Ինչպե՞ս սկսել և շարունակել լողը

Պարզապես կապ հաստատեք նախընտրելի որևէ լողավազանի մենեջերի հետ և պայմանավորվեք ձեզ հարմար ժամերի և այցելությունների հաճախականությունների վերաբերյալ: Հիշեք, որ դուք պետք է ձեր լողի ժամանակը երկարացնեք աստիճանաբար՝ մինչև կհասնեք ձեր «անհատական» նորմային:

Ի՞նչ պետք է իմանալ ծովերում կամ բնական այլ ավազաններում լողալու մասին

Բնական ավազաններում լողալիս հիշեք հետևյալ հնարավոր ռիսկերի մասին՝

  • վտանգավոր ալիքներ
  • հոսանքի կողմից «բռնվելու» վտանգ
  • ափ «շպրտող» կամ ափից հեռացնող հոսանքներ (մակընթացություն և տեղատվություն)
  • անհաջող շարժումներ և վնասվածքներ:

Նման դեպքերից խուսափելու համար խորհուրդ է տրվում՝

  • երբեք չանցնել անվտանգության ցուցանակները
  • ուշադիր լինել նախազգուշական բոլոր նշանների նկատմամբ
  • եթե ափին հանդիպում եք փրկարարի, հարցրեք անվտանգության վերաբերյալ խորհուրդներ
  • միայնակ ջուրը մի մտեք
  • եթե զգում եք, որ օգնության կարիք ունեք, խուճապի մի մատնվեք և օգնություն կանչեք:

Հոդվածը վերանայվել է՝ 28-04-2021