Սինթետիկ կանաբիս («սփայս»)

2 րոպե

Սինթետիկ կանաբիսը հոգեներգործուն նյութ է, որն ի սկզբանե ստեղծվել է որպես կանաբիսի սինթետիկ փոխարինող։

Ի՞նչ է սինթետիկ կանաբիսը

Սինթետիկ կանաբիսի մասին աշխարհն իմացավ սկսած 2004-ից, երբ առցանց վաճառքում դրանք հայտնվեցին որպես կանաբիսի սինթետիկ փոխարինողներ։ Սակայն հետագայում պարզվեց, որ այս թմրամիջոցն իրականում չի կրկնօրինակում կանաբիսի (մարիխուանա) ազդեցությունները։

Ավելի ուշ հետազոտություններով պարզվեց, որ սինթետիկ կանաբիսն, ի տարբերություն բնականի, ունի լրացուցիչ բացասական ազդեցություններ։

Սինթետիկ կանաբիսն իրենից ներկայացնում է փոշի, որը խառնվում է լուծիչի հետ և ավելցվում բույսերին՝ սև շուկայում հայտնվելով տարբեր գույնի բրենդային փաթեթներում։ Ընդ որում, տարբեր արտադրողներ արտադրում են տարբեր ազդեցության սինթետիկ կանաբիս։ Նմանատիպ փաթեթում կարող է լինել տարբեր ուժգնության թմրամիջոց։

Սինթետիկ կանաբիսը սովորաբար ծխում են, երբեմն՝ թեյի պես խմում։

Այլ անուններ

Սինթետիկ կանաբիսը տարբեր երկրների սև շուկայում հայտնվում է տարբեր անվանումների ներքո՝ «սփայս», «կրոնիկ», «հյուսիսային լույսեր», «մոջո», «լուսավոր ոսկի», «կապույտ լոտուս», «կնքահայր» և այլն։

Սինթետիկ կանաբիսի ազդեցությունները

Գոյություն չունի սինթետիկ կանաբիսի օգտագործման որևէ անվանգ եղանակ։ Ցանկացած թմրամիջոցի օգտագործումը կրում է որոշակի ռիսկ։

Սինթետիկ կանաբիսը տարբեր մարդկանց վրա ազդում է տարբեր ձևով։ Ազդեցությունը կախված է մի շարք գործոններից, այդ թվում՝ օգտագործող մարդու ընդհանուր առողջական վիճակից ու մարմնի քաշից, նախկինում նմանատիպ թմրամիջոց օգտագործելու փորձից, օգտագործած թմրամիջոցի չափից, թմրաբեր ազդեցության ուժեղացման համար օգտագործված քիմիական նյութի տեսակից և այլն։

Սինթետիկ կանաբիսի ընդհանուր ազդեցությունը նման է մարիխուանային, սակայն օժտված է լրացուցիչ բացասական և ավելի վնասակար ազդեցություններով, օրինակ՝

• հաճախացած և անկանոն սրտազարկ
• «վազող» մտքեր
• հոգեշարժական գրգռվածություն (աժիտացիա), տագնապ և պարանոյա
• փսիխոզ
• ագրեսիվ վարք և բռնություն
• կրծքավանդակի ցավեր
• փսխում
• սուր երիկամային անբավարարություն
• ցնցումներ
• ինսուլտ
• մահ։

Ամենայն հավանականությամբ «սփայսի» կանոնավոր օգտագործումը առաջացնում է տոլերանտություն և կախվածություն։

Սինթետիկ կանաբիսից զրկանքը

Երկար ժամանակ կանոնավոր կերպով և մեծ չափով սինթետիկ կանաբիս ծխող մարդկանց մոտ թմրամիջոցի օգտագործման կտրուկ դադարեցումը կարող է առաջացնել՝

• անքնություն
• պարանոյա
• խուճապի (պանիկ) նոպա
• աժիտացիա և դյուրագրգռություն
• տագնապ
• տրամադրության կտրուկ փոփոխություններ
• հաճախասրտություն (տախիկարդիա):

Արտակարգ իրավիճակներ

Անհապաղ զանգեք 1-03 և կանչեք շտապ օգնություն, եթե սինթետիկ կանաբիս («սփայս») օգտագործած մարդու մոտ ի հայտ են գալիս՝

• խիստ հաճախացած կամ անկանոն սրտազարկ
• հետկրծոսկրային կամ կրծքավանդակի ձախ կեսի ցավեր
• օդի սուր պակասի զգացում կամ վտանգավոր հևոց
• զառանցական վարքագիծ։