Բալանիտ - Տղամարդկանց առողջություն

Կանդիդոզը կամ կաթնախտը վարակային հիվանդություն է, որը հարուցվում է կանդիդա խմորասնկիկով։

Կանդիդիա սունկը նորմայում առկա է ձեր մարմնի վրա, հատկապես տաք և խոնավ շրջաններում, օրինակ՝ բերանի խոռոչում և սեռական օրգաններում։ Այն սովորաբար որևէ առողջական խնդիր չի առաջացնում, քանի որ այն վերահսկվում է իմունային համակարգի և այլ բակտերիաների կողմից։

Սակայն, որոշ գործոնների ազդեցությամբ, ինչպիսիք են մաշկի գրգռվածությունը, հակաբիոտիկների երկարատև ընդունումը, վատ հսկվող շաքարային դիաբետը, խմորասնկիկները կարող են արագորեն աճել և առաջացնել վարակ։

Տղամարդկանց մոտ առնանդամի կանդիդոզի առավել հաճախ հանդիպող ախտանիշներն են՝

• առնանդամի գլխիկի կարմրություն և բորբոքում, ուժեղ քոր և երբեմն կարմրած բծեր
• միզուկից արտադրուկի առկայություն
• միզարձակմանն ուղեկցող ցավեր կամ միզուկի շրջանի այրոցի զգացում (դիզուրիա)
• առնանդամի գլխիկը բացելու դժվարություն
• առնանդամի գլխիկի վրա պանրին նմանվող և բնորոշ հոտով նյութ, որը նաև կարող է հավաքվել մաշկային ծալքի տակ։

Որոշ տղամարդկանց մոտ խմորասնկիկները կարող են առաջացնել առնանդամի եզրային թլիպի այտուց և ճաքեր, որը հավանաբար սնկերի նկատմամբ ալերգիայի դրսևորում է։

Կանդիդոզը կարող է հազվադեպ փոխանցվել սեռական մեկ զուգընկերոջից մյուսին։ Սակայն այն չի համարվում սեռական ճանապարհով փոխացվող վարակ, քանի որ այս սնկիկները նորմայում առկա են ձեր մարմնի տարբեր շրջաններում։ Այնուամենայնիվ, խորհուրդ է տրվում սեռական հարաբերությունները ժամանակավորապես դադարեցնել, քանի դեռ կանդիդոզը և առնանդամի գլխիկի բորբոքումը չեն վերացել։

Առնանդամի կանդիդոզը կարող է բուժվել հակասնիկային քսուքներով կամ միանվագ դեղաչափ պարունակող հակասնկիկային հաբերով։ Մինչև նման դեղամիջոցներ օգտագործելը խոսեք ձեր բժշկի հետ: Նաև ծանոթացեք դեղատուփում առկա տեղեկատվական թերթիկին և խստորեն հետևեք դեղի օգտագործման ցուցումներին։ Անհանգստացնող ցավերի դեպքում կարող եք օգտագործել սովորական ցավամոքիչ դեղեր։