Հեշտոցային արյունահոսություն սեռական ակտից հետո

1 րոպե

Բազմաթիվ կանայք կարող են նկատել, որ սեռական հարաբերությունից հետո ի հայտ է գալիս հեշտոցային արյունահոսություն:

Արյունը սովորաբար հոսում է արգանդի պարանոցից, սակայն կարող են ներգրավված լինել ձեր վերարտադրողական համակարգի այլ շրջաններ ևս:

Եթե դուք նախադաշտանադադարի շրջանում եք և հարաբերությունից հետո արյունահոսությունը ոչ հաճախ է ձեզ անհանգստացնում կամ առատ չէ, ապա հավանաբար անհանգստանալու որևէ լուրջ պատճառ չկա: Սակայն միշտ էլ ցանկալի է, որ այդ մասին տեղեկացնեք ձեր բժշկին կամ այցելեք ընտանիքի պլանավորման ծառայություն, հատկապես, եթե արյունահոսություն նկատում եք ավելի, քան մեկ անգամ: Հիշեք նաև, որ արյունահոսության պատճառ կարող է դառնալ դեռևս չհայտնաբերված որևէ սեռավարակը:

Դաշտանադադարից հետո ի հայտ եկող արյունահոսությունը պետք է ստուգվի ձեր բժշկի կամ գինեկոլոգի կողմից:

Սեռական հարաբերությունից հետո սկսված հեշտոցային արյունահոսությունը կարող է ունենալ տարբեր պատճառներ։

Նման արյունահոսության ամենատարածված պատճառներից են՝

• արգանդի պարանոցի բորբոքում (հայտնի է նաև որպես պարանոցի էրոզիա), որը հաճախ հանդիպում է երիտասարդ կանանց, հղիների և հակաբեղմնավորիչ հաբ խմող կանանց մոտ
• վագինիտ (հեշտոցի լորձաթաղանթի բորբոքում)
• արգանդի պարանոցի մակերեսի փոքր պոլիպներ, որոնք շատ հաճախ բարորակ (ոչ քաղցկեղային) փոքր նորագոյացություններ են
• սեռական ճանապարհով փոխանցվող հիվանդություններ (ՍՃՓՀ), օրինակ՝ քլամիդիա, սեռական հերպես կամ սիֆիլիս
• արգանդի պարանոցի բջջային փոփոխություններ
• հեշտոցի չորություն
• հեշտոցի պատռվածք կամ կտրվածք
• փոքր կոնքի օրգանների բորբոքային հիվանդություն (ՓԿՕԲՀ)
• սեռական հարաբերության ժամանակ հեշտոցի լորձաթաղանթի հարում կամ ոչ բավարար լուբրիկացիա
• քաղցկեղ (խիստ հազվադեպ, սեռական ակտից հետո արնահոսող 100 կնոջից 1-ի մոտ)։

Եթե սեռական հարաբերությունից հետո հեշտոցային արյունահոսությունը առատ է և ուղեկցվում է ընդհանուր թուլությամբ, անհապաղ զանգահարեք 1-03 և կանչեք շտապբուժօգնություն։