Հեշտոցային չորությունը կարող է խնդիր լինել ցանկացած տարիքի կանանց համար, սակայն այն ավելի հաճախ է հանդիպում տարեց կանանց մոտ, հատկապես դաշտանադադարից հետո:
Հեշտոցի լորձաթաղանթի խոնավությունն ապահովվում է արգանդի վզիկի կողմից արտադրվող բնական քսանյութով։ Վերջինս անգույն և թափանցիկ թույլ թթվային հեղուկ է, որը հեշտոցի լորձաթաղանթը պաշտպանում է տարբեր վարակներից, օրինակ՝ կանդիդայից։
Երբ կինը սեռական հարաբերություն է ունենում, մեծ սեռական շուրթերի մեջ գտնվող զույգ բարթոլինյան գեղձերն արտադրում են լրացուցիչ խոնավացնող և օծող նյութեր, որոնք որպես բնական քսանյութ ապահովում է սահուն և անցավ սեռական հարաբերությունը։ Սակայն, երբ սեռական հարաբերության ժամանակ այս նյութերի արտադրությունը պակասում է, սեռական հարաբերությունը դառնում է անհարմարավետ և ցավոտ։
Հեշտոցի չորության պատճառները
Նման բնական քսանյութերի արտադրությունը կարող է ընկճվել տարբեր պատճառներով, այդ թվում՝
- սեռական հարաբերությանը նախորդող սիրախաղի պակաս կամ բացակայություն
- սեռական գրգռման թուլություն կամ բացակայություն
- սեռական զուգընկերոջ հետ փոխհարաբերություններում առկա խնդիրներ
- հոգեհուզական լարվածություն (սթրես), վախ և անհանգստություն կամ մեղքի զգացում
- սեռական հարաբերություն կրծքով կերակրելու փուլում, երբ հեշտոցի խոնավությունն ապահովող էստրոգենների քանակը ցածր է։
Հեշտոցի չորությունը կարող է պատճառվել նաև այլ պատճառներից՝
- որոշ հիգիենիկ արտադրանքների օգտագործում, օրինակ՝ կանացի սփրեյներ կամ ուժեղ (խիտ) օճառներ և լվացման միջոցներ
- քլորացված լողավազաններ
- բեղմնականխիչ միջոցների որոշ տեսակներ
- որոշ դեղերի ընդունում, ինչպիսիք են հակադեպրեսանտները
- քաղցկեղի դեմ բուժում (քիմիոթերապիա)։
Բազմաթիվ կանանց մոտ հեշտոցի չորությունը խնդիր է դառնում դաշտանադադարից հետո, և սա բացատրվում է իգական սեռական հորմոններից էստրոգենի մակարդակի աստիճանական նվազեցմամբ, որի արդյունքում հեշտոցը կորցնում է իր առաձգականությունը (էլաստիկություն), իսկ լորձաթաղանթը դառնում է բարակ և ավելի չոր։ Միևնույն ժամանակ, հեշտոցային միջավայրը դառնում է ավելի պակաս թթվային՝ նպաստավոր դառնալով վարակների զարգացման համար։ 51-60 տարեկան կանանց կեսի մոտ առկա է հեշտոցի չորություն։
Հեշտոցի չորության դեմ միջոցներ
Հեշտոցի չորությունը կարելի է մեղմացնել՝ օգտագործելով հեշտոցային քսանյութեր (լուբրիկանտներ)։ Ջրային հիմքով լուբրիկանտները կարելի է օգտագործել սեռական հարաբերության ժամանակ։ Դրանք առանց դեղատոմսի վաճառվում են դեղատներում։ Սակայն, նկատի ունեցեք, որ ոչ ջրային հիմքով լուբրիկանտները կարող են վնասել պահպանակը։
Հոդվածը հրապարակվել է՝ 13-04-2018
Վերջին վերանայում՝ 08-04-2024