Առողջական խնդիրներ
Հեշտոցի գրգռվածություն, բորբոքում և վարակ
5 րոպե
Հեշտոցի և հարհեշտոցային մակերեսների բորբոքումը կանանց շրջանում տարածված, սակայն հեշտ վերացող երևույթ է:
Եթե բորբոքումն ունի վարակային ծագում, պետք է դիմել բժշկին:
Հեշտոցի կամ աճուկի շրջանի գրգռում և բորբոքում
Հեշտոցը, դրան հարող մակերեսները և աճուկային շրջանները խիստ զգայուն են: Սա նշանակում է, որ այդ շրջանները կարող են հեշտությամբ գրգռվել և բորբոքվել՝ շփվելով հետևյալ նյութերի կամ պարագաների հետ՝
- լուբրիկանտներ (քսուքներ) և սպերմիցիդներ (տղամարդկանց սերմնահեղուկում սպերմատոզոիդները ոչնչացնող նյութեր, որոնք օգտագործվում են որպես հակաբեղմնավորիչ միջոցներ)
- ռետինե արտադրանքներ, օրինակ՝ պահպանակ
- օճառ, բաղնիքի գել, շամպուն, դեզադորանտներ կամ հիգիենիկ սփրեյներ
- մանրէազերծող (դեզինֆեկտանտ) կամ հականեխիչ (անտիսեպտիկ) նյութեր, այդ նյութերը պարունակող քսուքներ
- լվացքի փոշիներ կամ հեղուկներ (եթե լվացվող ներքնազգեստը լավ չի պարզաջրվում)
- նոր ներքնազգեստ, հատկապես, եթե այն բամբակյա չէ
- ցայլքի մազերի հեռացման մեթոդներ, օրինակ՝ սափրում կամ մազերը հեռացնող քսուքներ
- հոտավետ հավելանյութեր պարունակող զուգարանի թուղթ
- հակաքրտինքային և մարմնի այլ հեղուկներ
- հիգիենիկ միջադիրներ կամ տամպոններ
- քլորացված ջուր (օրինակ՝ ջրավազանում)
- հեշտոցի խոռոչը լվանալու միջոցառումներ («ներքին լվացում»):
Հարհեշտոցային և աճուկային շրջանները կարող են գրգռվել և բորբոքվել նաև հիգիենայի խնամքի բացակայության պայմաններում, տվյալ շրջանը կոպիտ (օրինակ՝ խոզանակով) լվանալուց կամ դրանից հետո ոչ լիարժեք չորացնելուց:
Վերոնշյալ պատճառներից բացի, հեշտոցի և աճուկի շրջանների բորբոքումը կարող է ունենալ նաև վարակիչ ծագում, օրինակ՝ հեշտոցային կանդիդոզ և սեռական (գենիտալ) հերպես: Վարակի առկայության հավանականությունը մեծանում է, եթե առկա է անսովոր հեշտոցային արտադրուկ:
Աճուկային շրջանի վարակներ
Սնկային վարակները կարող են (բայց ոչ միշտ) մեկ անձից փոխանցվել մյուսին: Սնկերը սովորաբար հայտնվում են մարմնի խոնավ և տաք շրջաններում, ինչպիսիք հանդիսանում են մաշկային ծալքերը: Աճուկային շրջանի սնկային ախտահարումը կարող է գրգռել և բորբոքել այս շրջանի մակերեսները՝ հարուցելով խիստ ցավոտ քոր: Սնկային վարակներից խուսափելու համար անհրաժեշտ է աճուկային շրջանները պահել չոր և մաքուր, ինչպես նաև օգտագործել միայն ձեզ համար նախատեսված սրբիչներ, անկողնային պարագաներ, հագուստ և ներքնազգեստ:
Ինքնօգնություն
Հեշտոցի, հարակից և աճուկային շրջանների բորբոքում
- Ցավը կարելի է մեղմացնել սառեցնող միջոցներով: Եթե օգտագործելու եք սառույց, ապա խուսափեք այն անմիջապես սեռական օրգաններին հպելուց, դրա փոխարեն սառույցը փաթաթեք մաքուր սավանի կտորով: Դուք կարող եք կրկնել սառեցնող միջոցառումները, սակայն յուրաքանչյուր «սեանսը» պետք է տևի 20 րոպեից ոչ ավել:
- Եթե ցավեր ունեք, դիմեք ձեր բժշկին, ով կընտրի ձեզ և ձեր վիճակին համապատասխանող լավագույն ցավազրկող դեղը։
- Սեռական օրգանների լվացումները կատարեք միայն ջրով կամ աղաջրով: Երկրորդ դեպքում չմոռանաք պարզաջրումը։
- Մի փորձեք լվանալ ձեր հեշտոցի խոռոչը ցնցուղով կամ որևէ այլ կերպ («ներքին լվացում»):
- Համոզվեք, որ հարհեշտոցային շրջանը չի շփվում հոտավետ հավելանյութերով օճառի, ցնցուղի գելի կամ դեզադորանտների հետ, որոնք կարող են ավելի խորացնել գրգռվածությունը և բորբոքումը:
- Խուսափեք քլորացված լողավազաններ մտնելուց, ծայրահեղ դեպքում ջրից դուրս գալուց հետո անմիջապես ցնցուղ ընդունեք և փոխեք ձեր լողազգեստը:
- Կրեք ոչ կիպ հարող և բամբակե ներքնազգեստ:
- Ձեր ներքնազգեստը լվացեք հիպոալերգիկ օճառով և վերջում լավ պարզաջրեք:
- Խուսափեք ստրինգ, զուգագուլպա կամ կիպ ջինս կրելուց:
- Խորհրդակցեք ձեր բժշկի հետ և դեղատներից գնեք հանգստացնող քսուքներ և յուղեր:
- Օգտագործեք 100% բամբակե միջադիրներ կամ տամպոններ: Հարհեշտոցային շրջանի բորբոքման դեպքում դաշտանի ընթացքում գուցե անհրաժեշտություն ծագի օգտագործել տամպոններ (դաշտանային արյան շփումը մակերեսների հետ բացառելու համար):
- Միզելիս քիչ թեքվեք առաջ՝ մեզի շփումը հարհեշտոցային շրջանների մակերևույթի հետ նվազեցնելու համար:
Հեշտոցի, հարհեշտոցային և աճուկային շրջանների վարակ
- Լվացեք այս շրջանները գոլ (սակայն՝ ոչ տաք) ջրով օրական առնվազն երկու անգամ: Մակերեսները չորացրեք լիարժեք, սակայն նուրբ կերպով, որից հետո միայն օգտագործեք ձեր բժշկի նշանակած քսուքը:
- Սեռական օրգանները լվանալուց առաջ և հետո օճառաջրով լավ լվացեք ձեր ձեռքերը, որ վարակը չտարածեք մարմնի այլ տեղամասեր:
- Օգտագործեք միայն ձեր անհատական սրբիչը:
- Խուսափեք հոտավետ հավելանյութերով օճառներից, ցնցուղի գելերից կամ դեզադորանտներից: Մի կատարեք հեշտոցի «ներքին լվացում»:
- Ներհեշտոցային քսուքներ կամ այլ դեղաձևեր օգտագործելիս խուսափեք տամպոններից և օգտվեք միջադիրներից:
- Սեռական օրգանները պահեք չոր և քրտինքից մաքուր:
- Ամեն օր փոխեք ձեր ներքնազգեստները։
- Կրեք ոչ փոքր համարի (չափս) ներքնազգեստ:
- Եթե ցավեր ունեք, դիմեք ձեր բժշկին:
Սեռական զուգընկերներ
- Հայտնեք ձեր սեռական զուգընկերոջը այն մասին, որ նա կարող է ախտորոշման և բուժման կարիք ունենալ: Եթե ձեզ մոտ առկա է վարակ, խուսափեք սեռական շփումներից, քանի դեռ ձեր հիվանդությունը լիարժեքորեն չի բուժվել:
Եթե ձեզ մտահոգում է հեշտոցի և հարհեշտոցային շրջանի բորբոքման խնդիրները, զրուցեք այս թեմայով ձեր բժշկի հետ:
Հոդվածը տեղադրվել է՝ 17-04-2018 վերանայվել է՝ 15-01-2022
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
