Հեշտոցի տհաճ հոտ - Կանանց առողջություն

Նորմայում կնոջ հեշտոցն ունի թույլ հոտ, որը պայմանավորված է այստեղ բնակվող բակտերիաներով և հեշտոցային արտազատուկով:

Սակայն, երբեմն հեշտոցային հոտը կարող է դառնալ սուր և խիստ տհաճ, օրինակ՝ նմանվել ձկան հոտին: Սա արդեն կարող է լինել ոչ նորմալ և վկայել տեղային խնդրի առկայության մասին:

Վարակային կամ այլ ծագում ունեցող ոչ նորմալ հեշտոցային հոտը սովորաբար կապված է հեշտոցային այլ գանգատների և ախտանիշների հետ, ինչպիսիք են քորը, այրոցի զգացումը, գրգռվածությունը կամ ոչ նորմալ հեշտոցային արտադրությունը:

Պատճառներ

Հեշտոցային հոտը կարող է փոփոխվել ձեր դաշտանային ցիկլի ընթացքում: Այն կարող է ավելի ուժեղանալ անմիջապես սեռական հարաբերությունից հետո: Նորմալ քրտնարտադրությունը նույնպես կարող է ուժեղացնել այս հոտը: Որոշ կանայք փորձում են ներլվացումներով (հեշտոցի խոռոչի լվացում) կամ հեշտոցային (վագինալ) դեզադորանտներով մեղմացնել այս հոտը, այնուամենայնիվ, այս միջոցներն իրականում կարող են ուժեղացնել հեշտոցի լորձաթաղանթի գրգռումը և վատթարացնել այլ հեշտոցային ախտանիշները:

Բակտերիալ վագինոզը՝ հեշտոցային նորմալ բակտերիաների գերաճը, համարվում է ամենատարածված հեշտոցային վարակը, որ կարող է առաջացնել տհաճ հեշտոցային հոտ։ Իրենից սեռական ճանապարհով փոխանցվող վարակ ներկայացնող տրիխոմոնոզը նույնպես կարող է բերել ուժեղացած հեշտոցային հոտի, մինչդեռ քլամիդիային և գոնորեային վարակները սովորաբար չեն ուղեկցվում հեշտոցային հոտով: Նույնը վերաբերվում է հեշտոցային կանդիդոզին:

Ընդհանուր առմամբ, եթե ունեք հեշտոցային տհաճ հոտ առանց այլ հեշտոցային ախտանիշների, ապա քիչ հավանական է, որ այդ հոտն ախտաբանական է:

Ոչ նորմալ կամ ախտաբանական հեշտոցային հոտի տարածված պատճառներից են՝

• վագինիտ (հեշտոցի վարակ)
• ոչ պատշաճ հիգիենա
• մի քանի օր չփոխված կամ «մոռացված» տամպոն
• տրիխոմոնոզ:

Ավելի հազվադեպ ոչ նորմալ հեշտոցային հոտը կարող է պատճառվել հետևյալ հիվանդություններով՝

• ուղիղաղիք-հեշտոցային խուղակ (ռեկտովագինալ ֆիստուլա)՝ ախտաբանական բացվածք ուղիղ աղիքի և հեշտոցի միջև, որի պատճառով կղանքը կարող է արտահոսել դեպի հեշտոց
• արգանդի վզիկի քաղցկեղ
• հեշտոցային քաղցկեղ:

Ե՞րբ դիմել բժշկին

Եթե անհանգստացած եք, որ ունեք ոչ նորմալ կամ մշտական հեշտոցային հոտ, հանդիպեք ձեր գինեկոլոգին, ով կկատարի հեշտոցային ներզննում և ըստ անհրաժեշտության կնշանակի որոշ լաբորատոր թեստեր, հատկապես, եթե առկա են նաև այլ ախտանիշներ (քոր, արյոց, գրգռում կամ արտադրություն):

Ինքնօգնություն

Որոշ միջոցներ կարող են մեղմացնել հեշտոցային

• Լվացեք ձեր արտաքին սեռական շրջանը. կանոնավոր լոգանքի կամ ցնցուղ ընդունելու ընթացքում օգտագործեք թույլ հոտազուրկ օճառ և առատ ջուր:
• Խուսափեք ներլվացումներից. առողջ հեշտոցը պարունակում է բակտերիաներ և խմորասնկիկներ, որոնք ապահովում են նորմալ թթվային միջավայր և կանխարգելում ախտաբանական բակտերիաների աճը: Օճառաջրով հաճախակի կամ ներլվացումները կարող են խախտել այս զգայուն հավասարակշռությունը: