Շնչառական համակարգ - Շնչառական համակարգ

Շնչառական համակարգը ձեր օրգանիզմն ապահովում է թթվածնով և հեռացնում է ածխաթթու գազը։

Շնչառական համակարգի խնդիրները կարող են նվազեցնել ձեր թոքեր հասնող թթվածնի քանակը, որն իր հերթին կարող է բերել ինքնազգացողության վատացման։

Շնչառական համակարգի բաժինները

Ձեր շնչառական համակարգը կազմված է հետևյալ օրգաններից՝

• քիթ
• ըմպան (ֆարինքս)
• կոկորդ (լարինքս)
• շնչափող (տրախեա)
• բրոնխներ (ճյուղավորվում են շնչափողից և աստիճանաբար նեղանում՝ վերածվելով բարակ բրոնխիոլների)
• թոքեր։

Աջ և ձախ թոքերը գտնվում են ձեր կրծքավանդակում և պաշտպանված են կողերով։ Դուք շնչում եք՝ կծկելով ձեր միջկողային մկանները և կրծքավանդակի հատակը կազմող ստոծանին (դիաֆրագմա)։ Սա առաջացնում է կրծքավանդակի ընդարձակում՝ քթով և վերին շնչուղիներով ներքաշելով օդը դեպի թոքեր։

Ձեր թոքերում օդը մտնում է փոքր օդախորշեր, որոնք կոչվում են ալվեոլներ։ Ալվեոլի պատին սերտորեն հպվում են ամենաբարակ արյունատար անոթները՝ մազանոթները։ Թթվածինն ալվելներից տեղափոխվում է դեպի արյան հուն, իսկ ածխաթթու գազը՝ հակառակ ուղղությամբ արյան հունից դեպի ալվեոլներ։ Արտաշնչելիս դուք ալվելոներում կուտակված ածխաթթու գազը վերին շնչուղիներով և քթով հեռացնում եք ձեր օրգանիզմից։

Շնչառական հիվանդություններ

Շնչառական հիվանդություններն ախտահարում են շնչուղիները և թոքերը։

Այս հիվանդությունները կարող են ունենալ կարճատև (սուր) կամ երկարատև (քրոնիկ) ընթացք։ Ախտանիշները կարող են ներառել՝

• շնչարգելություն, հևոց կամ խզզոցներ
• մշտական, նոր ի հայտ եկած կամ փոփոխված հազ
• կրծքավանդակի ցավ, որը սովորաբար ի հայտ է գալիս, երբ ախտաբանական գործընթացի մեջ ներգրավվում է նաև թոքերը արտաքինից ծածկող թաղանթը՝ թոքամիզը (պլևրա)
• հազ արյունով, լորձով կամ խորխով։

Ծանր շնչառական խանգարումները կարող են առաջացնել քրոնիկ հիվանդություններ կամ մահ։

Ինչպե՞ս ձեր շնչառական համակարգը պահել առողջ

Ձեր շնչառական համակարգը (և մասնավորապես՝ թոքերը) առողջ պահելու համար՝

• մի՛ ծխեք
• խուսափեք շրջակա միջավայրի վնասակար գործոններից, ինչպիսիք են ծուխ, փոշի և քիմիական նյութեր
• կանոնավոր կերպով զբաղվեք ֆիզիկական վարժանքներով, ցանկալի է գերբեռնված փողոցներից հեռու վայրերում (նախապես բժշկից տեղեկացեք, թե ձեր ընդհանուր առողջական վիճակի պայմաններում ինչ ծանրաբեռնվածության ֆիզիկական ակտիվությունն է առավել օգտակար և քիչ ռիսկային)
• կանոնավոր կերպով լվացեք ձեր ձեռքերը, որ կանխարգելեք վարակները
• սնվեք առողջ՝ սննդանյութերով և վիտամիններով հարուստ մթերքներով
• շատ խմեք հեղուկներ, հատկապես՝ ջուր
• փորձեք ձեր բնակարանում աճեցնել ալերգիա չհարուցող բույսեր
• պահպանեք հիգիենայի կանոնները և մաքուր պահեք ձեր ձեռքերը
• ձեր բժշկի հետ խորհրդակցեք ամեն տարի գրիպի դեմ պատվաստանյութ ստանալու հարցի մասին։