Գուցե դուք չեք մտածել այս հարցի շուրջ կամ ձեր մտքով չի անցել, սակայն մաշկը նույնպես առանձին օրգան է:

Ընդ որում, մաշկը ձեր ամենամեծ օրգանն է. առանց ենթամաշկային ճարպաբջջանքի, այն կշռում է ամբողջ մարմնի քաշի 20%-ը, իսկ ենթամաշկի հետ միասին՝ ավելի քան 50%-ը։ Չափահաս մարդու մաշկի մակերեսը 1,5-2 քառակուսի մետր է, իսկ հաստությունը՝ մինչև 4 մմ։

Մաշկի մասին որոշակի գիտելիքներ իմանալը մեծապես կօգնի, որպեսզի ձեր մաշկային ծածկույթի խնամքին ավելի մեծ դեր հատկացնեք:

Մաշկի կառուցվածքը

Մաշկն ունի երեք շերտ՝

վերնամաշկ (էպիդերմիս), որը հանդես է գալիս որպես անջրաթափանց պատնեշ և պարունակում է բջիջներ (մելանոցիտներ), որոնք գունավորում են ձեր մաշկը
բուն մաշկ (դերմիս), որը պարունակում է խիտ շարակցական հյուսվածք, մազարմատներ և քրտնագեղձեր
ենթամաշկ (հիպոդերմիս), որը պարունակում է ճարպաբջջանք և շարակցական հյուսվածք:

Էպիդերմիսն ու դերմիսն միմյանցից սահմանազատված են հիմային թաղանթով։

Մաշկի գործառույթները

Մաշկը ձեզ պաշտպանում է արտաքին միջավայրից, այդ թվում՝ եղանակային պայմաններից: Այն նաև ներկայացված է ձեր օրգանիզմի իմունային համակարգի մեջ և շատ անգամ հանդիսանում է վարակների հարուցիչների և օտարածին մոլեկուլների դեմ պայքարի «առաջին գիծը», ընդ որում, ոչ միայն որպես ֆիզիկական պատնեշ, այլև որպես ակտիվ իմունային պատասխաններին անմիջականորեն մասնակից:
Մաշկն օգնում է ձեր մարմնի ջերմաստիճանի կարգավորմանը: Օրինակ, մարմնի ջերմաստիճանը բարձրանալիս արյան հոսքը դեպի մաշկ ուժեղանում է, մաշկը սկսում է «բաց թողնել» ավելի շատ ջերմություն՝ օգնելով մարմնի ջերմության նվազեցմանը: Մաշկը մասնակցում է օրգանիզմի ջերմակարգավորմանը նաև քրտնարտադրության միջոցով:
Մաշկը ձեզ հնարավորություն է տալիս ընդլայնելու ձեր զգացողությունների շրջանակը՝ տաքություն, սառնություն, հպում, ցավ և վիբրացիա:
Մաշկն անջրաթափանց է և թույլ չի տալիս, որ սննդանյութերը ձեր մարմնից «հոսեն դուրս»:
Վերջապես, մաշկը կլանում է արյան ուլտրամանուշակագույն ճառագայթները և արտադրում վիտամին D: