Ընդհանուր նկարագրություն

Ալբուտերոլի սուլֆատի ինհալացիոն լուծույթն օգտագործվում է բրոնխակծկանքի (բրոնխոսպազմ) բուժման համար ասթմայով (շնչուղիների դարձելի օբստրուկտիվ հիվանդություն) և թոքերի այլ հիվանդություններ ունեցող 2-ից 12 տարեկան հիվանդների մոտ:

Ասթման շնչառության հետ կապված խնդիր է, որը պայմանավորված է շնչուղիների (բրոնխային խողովակների) նեղացմամբ, որոնցով օդը շարժվում է թոքերից ներս և դուրս: Այս շնչուղիները կարող են նեղանալ լորձի կուտակման, դրանք շրջապատող մկանների սպազմի (բրոնխոսպազմ) կամ շնչուղիների լորձաթաղանթի այտուցման պատճառով։ Շնչուղիների նեղացումը հանգեցնում է շնչարգելության և հևոցի, խզզոցների, հազի և քթի փակվածության:

Ալբուտերոլի սուլֆատը լայնացնում է թոքերի շնչուղիները՝ թուլացնելով դրանք շրջապատող մկանները։ Ալբուտերոլը նաև կարող է օգտակար լինել էմֆիզեմայով և քրոնիկ բրոնխիտով հիվանդների մոտ, երբ ախտանշանները մասամբ կապված են շնչուղիների մկանների սպազմի հետ:

Ալբուտերոլի սուլֆատը հաստատվել է ամերիկյան FDA կազմակերպության կողմից 1987-ի հունվարին:

Դեղեր և հավելումներ բաժնի հովանավոր

Այցելեք Յունիմեդ բժշկական կենտրոն ճշտգրիտ ախտորոշում ստանալու համար:

Բրենդային անվանումներ

Ventolin, Proventil

Ցուցումներ

ասթմայով (շնչուղիների դարձելի օբստրուկտիվ հիվանդություն)
թոքային այլ հիվանդություններ, որոնք մասամբ պայմանավորված են կամ ընթանում են բրոնխոսպազմով

Մի՛ փորձեք

Ինքնուրույն օգտագործել որևէ դեղամիջոց կամ ինքնուրույն փոխել ձեզ նշանակված դեղամիջոցները կամ դրանց դեղաչափերը:

Կողմնակի ազդեցություններ

Տարածված կողմնակի ազդեցություններից են՝

միգրենային գլխացավեր
ոչ միգրենային գլխացավեր
սրտխառնոց
ստամոքսի խանգարում
գրիպանման ախտանիշներ
մրսածության ախտանիշներ
ականջի վարակներ (միջին օտիտ)
բրոնխիտ
հազ:

Այլ կողմնակի ազդեցություններից են՝

ալերգիկ ռեակցիաներ (ցան, եղնջացան, քոր)
նյարդայնություն
դող (տրեմոր)
խզզոցներ
ուժեղացած խորխարտադրություն
շնչարգելություն:

Հնարավոր կողմնակի ազդեցություններից են՝

բրոնխոսպազմ (ասթմայի սրացում)
ծանր ալերգիկ ռեակցիաներ (անաֆիլաքսիա)
ցածր կալիում
սրտի ռիթմի խանգարումներ (սրտխփոց)
արագացած սրտազարկ
բարձրացած արյան ճնշում
ետկրծոսկրային ցավեր:

Փոխազդեցություններ

Տրիցիկլիկ հակադեպրեսանտները, օրինակ՝ Ամիտրիպտիլինը (Էլավիլ, Էնդեպ) և մոնոամին օքսիդազի (ՄԱՕ) արգելակիչները կամ ինհիբիտորները, օրինակ՝ Տրանիլցիպրոմինը, չպետք է համակցվեն Ալբուտերոլ սուլֆատի հետ՝ անոթային համակարգի վրա դրանց լրացուցիչ ազդեցության պատճառով (արյան ճնշման բարձրացում, սրտի ռիթմ և այլն): Ալբուտերոլ սուլֆատով և տրիցիկլիկ հակադեպրեսանտներով կամ ՄԱՕ ինհիբիտորներով բուժումների միջև պետք է թողնել երկու շաբաթյա ժամանակային միջակայք:
Ալբուտերոլ սուլֆատի օգտագործումը այլ խթանող դեղամիջոցների հետ չի խրախուսվում, քանի որ դրանք համակցված ազդեցություն են թողնում սրտազարկի, արյան ճնշման վրա և սրտային հիվանդություն ունեցող հիվանդների մոտ կարող են առաջացնել ետկրծոսկրային ցավեր:
Բետա պաշարիչները, օրինակ՝ Պրոպրանոլոլը (Ինդերալ, Ինդերալ LA), արգելափակում են ալբուտերոլ սուլֆատի ազդեցությունը և կարող են ասթմատիկ հիվանդների մոտ առաջացնել բրոնխոսպազմ:
Ալբուտերոլի սուլֆատը կարող է առաջացնել հիպոկալեմիա (ցածր արյան կալիում): Հետևաբար, Ալբուտերոլ սուլֆատի համակցումը կծիկային միզամուղների հետ, ինչպիսին է Ֆուրոսեմիդը (Լազիքս) կարող է մեծացնել հիպոկալեմիայի հավանականությունը:

Վարվեք այս կերպ

Տեղեկացրեք ձեր բժշկին, եթե զգում եք նրա նշանակած դեղամիջոցի հետ կապված որևէ անցանկալի կամ կողմնակի ազդեցություն:
Տեղեկացրեք ձեր բժշկին, եթե ցանկանում եք ընդունել որևէ այլ դեղամիջոց կամ հավելում:

Հղիություն և կրծքով կերակրում

Ալբուտերոլի սուլֆատի ինհալացիոն լուծույթն օգտագործվում է երեխաների բուժման համար:
Հղիության ընթացքում Ալբուտերոլի սուլֆատի օգտագործման վերաբերյալ համարժեք հետազոտություններ չկան: Որոշ զեկույցներ ցույց են տալիս, որ հղիության ընթացքում Ալբուտերոլ սուլֆատը կարող է առաջացնել բնածին արատներ:
Հայտնի չէ, թե արդյոք Ալբուտերոլի սուլֆատն արտազատվում է կրծքի կաթում:

Դեղաչափեր

Ալբուտերոլի սուլֆատի լուծույթի կիրառման համար օգտագործվում է շիթային նեբուլայզեր, որը միացված է օդային կոմպրեսորին։ Ինհալացիան իրականացվում է բերանային հարմարանքով կամ դիմակով:
2-ից 12 տարեկան հիվանդների համար առաջարկվող մեկնարկային դեղաչափը 0,63, 1,25 կամ 2,5 մգ է, որը տրվում է նեբուլայզերով օրական 3 կամ 4 անգամ, ըստ անհրաժեշտության: Ավելի հաճախակի օգտագործումը խորհուրդ չի տրվում:
Ավելի ծանր ասթմա ունեցող 6-ից 12 տարեկան երեխաները կարող են ավելի լավ նախնական արդյունքի հասնել 1,25 կամ 2,5 մգ դեղաչափերով:
Մեկ սրվակի ամբողջ պարունակությունը պետք է տեղադրվի նեբուլայզերի մեջ և հոսքի արագությունը պետք է կարգավորվի՝ Ալբուտերոլ սուլֆատը մատակարարելու 5-15 րոպեի ընթացքում:

Դեղաձևեր և պահպանում

Դեղաձևեր

Ինհալացիոն լուծույթ՝ 0,63, 1,25 և 2,5 մգ/3 մլ, 2.5 մգ/0,5 մլ:

Պահպանում

Ալբուտերոլի սուլֆատը պետք է պահվի 2-25° C ջերմաստիճանային պայմաններում և պաշտպանվի լույսից և տաքությունից:

Ամփոփում

Ալբուտերոլը դեղամիջոց է, որն օգտագործվում է բրոնխակծկանքի (բրոնխոսպազմի) կանխարգելման և թեթևացման համար ասթմայով, ֆիզիկական վարժություններով պայմանավորված ասթմայով, էմֆիզեմայով կամ քրոնիկ բրոնխիտով հիվանդ մարդկանց մոտ: Դեղամիջոցը կարող է փոխազդեցել եռացիկլիկ հակադեպրեսանտների, մոնոամին օքսիդազի (ՄԱՕ) արգելակիչների և բետա պաշարիչների հետ: Կողմնակի ազդեցություններից են դողը (տրեմոր), գլխացավերը, սրտխփոցները և այլն: Խորհրդակցեք ձեր բժշկի հետ, եթե հղի եք կամ կրծքով կերակրում եք:

Մինչև որևէ դեղ ընդունելը հարկավոր է մանրամասն տեղեկանալ և ձեր բժշկի հետ քննարկել ցուցումների և հակացուցումների, կողմնակի ազդեցությունների, այլ դեղերի հետ փոխազդեցության, նախազգուշացումների, հղիության և կրծքով կերակրելու ընթացքում օգտագործման հարցերի մասին: