Ալոպուրինոլ

Ընդհանուր նկարագրություն

Ալոպուրինոլը նշանակվում է պոդագրայի բուժման մեջ, որը պատճառվում է արյան մեջ միզաթթվի բարձր մակարդակով (հիպերուրիկեմիա):

Ալոպուրինոլը հանդիսանում է քսանթինային օքսիդազի արգելակիչ և իր այս ազդեցությամբ նման է Ֆեբուքսոստատին:

Միզաթթուն օրգանիզմում առաջանում է քսանթինային օքսիդազ կոչվող ֆերմենտի մասնակցությամբ որոշ սպիտակուցների (պուրինների) տրոհումից: Հիպերուրիկեմիան զարգանում է, երբ օրգանիզմն արտադրում է ավելի շատ միզաթթու, քան կարողանում է երիկամներով հեռացնել: Նման պայմաններում միզաթթուն առաջացնում է բյուրեղներ ինչպես հոդերում (պոդագրային հոդաբորբ), այնպես էլ այլ հյուսվածքներում՝ բերելով բորբոքման և ցավերի: Արյան միզաթթվի շատացումը կարող է նաև առաջացնել երիկամային հիվանդություն և երիկամի քարեր:

Ալոպուրինոլը կանխարգելում է միզաթթվի առաջացումը՝ արգելափակելով պուրինից այս նյութի փոխակերպումը: Արյան միզաթթվի մակարդակը սկսում է նվազել Ալոպուրինոլով բուժման 2-3-րդ օրերին և վերադառնում նախկին մակարդակներին բուժումը դադարեցնելուց 7-10 օր անց:

Պոդագրայի նոպաների կառավարումն Ալոպուրինոլով կարող է տևել մի քանի ամիս:

Ամերիկյան FDA-ն Ալոպուրինոլը հաստատել է 1966 թվականի օգոստոսին:

Բրենդային անվանումներ՝ Zyloprim, Aloprim

Ցուցումներ

• Ալոպուրինոլը նշանակվում է պոդագրայի սուր նոպաների, հոդերի պոդագրային էռոզիվ դեստրուկտիվ հիվանդության, հյուսվածքներում միզաթթվի կուտակումները, երիկամների պոդագրային հիվանդության, միզաթթվային քարերի կանխարգելման և (կամ) բուժման համար:
• Ալոպուրինոլը նաև նշանակվում է քիմիոթերապիա անցնող որոշ քաղցկեղով և կրկնվող երիկամների կալցիումական քարերով պացիենտների մոտ արյան միզաթթվի բարձրացումը կանխարգելելու համար:

Կողմնակի ազդեցություններ

Ալոպուրինոլի հիմնական կողմնակի ազդեցություններից են՝

• փորլուծություն
• սրտխառնոց
• մաշկացան
• մաշկային քոր
• քնկոտություն:

Այլ դեղերի, հավելումների և սննդի հետ փոխազդեցություններ

• Ալոպուրինոլը բարձրացնում է արյան մեջ խմելու Մերկապտոպուրինի և Ազաթիոպրինի մակարդակները, քանի որ նվազեցնում է դրանց տրոհումը: Ուստի, այս դեղերի թունավոր ազդեցություններից խուսափելու համար դրանց դեղաչափերը պետք է նվազեցնել:
• Ալոպուրինոլը պենիցիլինների հետ զուգակցելիս բարձրանում է մաշկացանի առաջացման հավանականությունը:
• Ալոպուրինոլը թուլացնում է Վարֆարինի քայքայումը, ուստի կարող է բարձրացնել վերջինիս ազդեցությունը:

Հղիություն և կրծքով կերակրում

• Հղիների մոտ Ալոպուրինոլի վերաբերյալ համարժեք հետազոտությունները բացակայում են:
• Ալոպուրինոլը չի արտազատվում է կրծքի կաթի մեջ: Նորածինների մոտ կողմնակի ազդեցություններից խուսափելու համար Ալոպուրինոլ ստացող կրծքով կերակրող մայրերը պետք է բժշկի հետ քննարկեն կրծքով կերակրման նպատակահարմարությունը:

Դեղաչափեր

• Պոդագրայի բուժման համար, հիվանդության սրությունից կախված, Ալոպուրինոլը նշանակվում է օրական 200-600 մգ դեղաչափով:
• Քիմիոթերապիա անցնող պացիենտների մոտ արյան միզաթթվի բարձր մակարդակի բուժման համար Ալոպուրինոլը նշանակվում է քիմիոթերապիան սկսելուց 1-2 օր առաջ 100-800 մգ/օր դեղաչափով:
• Ալոպուրինոլը պետք է ընդունել սննդի հետ միասին, որպեսզի կանխարգելվի ստամոքսի գրգռումը:
• Երիկամային քարերի առաջացումը կանխարգելելու համար Ալոպուրինոլ ստացող պացիենտները պետք է ստանան առատ հեղուկներ:

Դեղաձևեր և պահպանում

Դեղաձևեր

• Հաբեր՝ 100 և 300 մգ:
• Ներարկման փոշի՝ մգ:

Պահպանում

• Ալոպուրինոլի հաբերը պետք է պահպանել սենյակային ջերմաստիճանային պայմաններում (15-25 C), խոնավություն չպարունակող, անլուսաթափանց և փակ տուփում:
• Ալոպուրինոլի ներարկման փոշին պետք է պահպանել սենյակային (ոչ սառնարանային) պայմաններում (20-25 C):

Ամփոփում

Ալոպուրինոլը պոդագրայի բուժման դեղամիջոց է: Արյան մեջ միզաթթվի բարձրացած մակարդակները կարող են նաև առաջացնել երիկամային հիվանդություն և քարեր:

Մինչև դեղն ընդունելը հարկավոր է մանրամասն տեղեկանալ և ձեր բժշկի հետ քննարկել ցուցումների և հակացուցումների, կողմնակի ազդեցությունների, այլ դեղերի հետ փոխազդեցության, նախազգուշացումների, հղիության և կրծքով կերակրելու ընթացքում օգտագործման հարցերի մասին: