Ամլոդիպին

Ընդհանուր նկարագրություն

Ամլոդիպինը բարձր արյան ճնշումը (հիպերտենզիա) և կրծքահեղձուկը (ստենոկարդիա) բուժելու նպատակով կիրառվող դեղամիջոց է, որը պատկանում է կալցիումական անցուղիների պաշարիչների դասին:

Կրծքահեղձուկը (ստենոկարդիա) առաջանում է, երբ սրտամկանի թթվածնով մատակարարումը համարժեք չէ կատարած աշխատանքի չափին: Թթվածնի անբավարար մատակարարում կարող է առաջանալ պսակային զարկերակի խցանման, կծկանի (սպազմ) կամ ֆիզիկական լարվածության ժամանակ, երբ բարձրանում է նեղացած պսակային անոթներով սրտամկանին լրացուցիչ թթվածին մատակարարելու պահանջը:

Լայնացնելով զարկերակները, Ամլոդիպինը նվազեցնում է այս անոթներում առկա ճնշումը, որի շնորհիվ սիրտն ավելի հեշտությամբ է արտամղում արյունը և նվազում է թթվածնի նկատմամբ սրտամկանի պահանջը: Այս մեխանիզմով կալցիումի անցուղիների պաշարիչները, այդ թվում՝ Ամլոդիպինը կարող են մեղմացնել կամ կանխարգելել կրծքահեղձուկը:

Բրենդային անվանումներ՝ Norvasc

Օրինակներ

Կալցիումական ուղիների պաշարիչների այլ ներկայացուցիչներից են՝

• Վերապամիլ
• Դիլթիազեմ
• Նիֆեդիպին:

Ցուցումներ

• կրծքահեղձուկ, որն առաջանում է պսակային սպազմի կամ լարվածության պատճառով
• բարձր արյան ճնշում (հիպերտենզիա)

Կողմնակի ազդեցություններ

Ամլոդիպինի կողմնակի ազդեցություններն ընդհանուր առմամբ թեթև են և դարձելի: Այս դեղամիջոցի երկու ամենատարածված կողմնակի ազդեցություններն են՝

• գլխացավ
• ստորին վերջույթների այտուց:

Այլ կողմնակի ազդեցություններից են՝

• գլխապտույտ
• դեմքի տաք ներհոս (ջերմահորդանք) և կարմրություն
• հոգնածություն
• սրտխառնոց
• սրտխփոցի զգացում:

Ամլոդիպինի ամենալուրջ և ծանր կողմնակի ազդեցություններից են՝

• կրծքահեղձուկի հաճախականության և ծանրության աճ
• սրտամկանի ինֆարկտ
• կանգային սրտային անբավարարություն:

Ամլոդիպինի պատճառով կրծքահեղձուկի հաճախականության բարձրացումը և ծանրացումը հազվադեպ կարող է տեղի ունենալ ծանր սրտի իշեմիկ հիվանդությամբ անձանց մոտ, երբ մեկնարկվում է Ամլոդիպինով բուժում կամ վերջինիս դեղաչափը բարձրացնելիս: Արյան ճնշման լրացուցիչ նվազեցում (հիպոտենզիա) կարող է գրանցվել Ամլոդիպինով բուժումը սկսելիս, հատկապես այն անձանց մոտ, ովքեր ընդունում են արյան ճնշումը նվազեցնող այլ դեղամիջոցներ ևս: Հազվադեպ, կանգային սրտային անբավարարությունը կարող է կապված լինել Ամոլդիպինի հետ, հատկապես այն անձանց մոտ, ովքեր արդեն ստանում են բետա-պաշարիչներ:

Այլ դեղերի, հավելումների և սննդի հետ փոխազդեցություններ

• Ամլոդիպինը Սիլդենաֆիլի (Վիագրա) և էրեկտիլ դիսֆունկցիայի բուժման մեջ կիրառվող համանման դեղերի հետ զուգակցելիս կարող է զարգանալ արյան ճնշման լրացուցիչ անկում, որը կարող է բերել կանգնելիս ուշագնացության (օրթոստատիկ հիպոտենզիա):
• Ամլոդիպինը զգալիորեն բարձրացնում է արյան մեջ Սիմվաստատինի մակարդակը, ուստի վերջինիս դեղաչափը պետք է սահմանափակել մինչև օրական 20 մգ-ի:
• Կետոկոնազոլը, Ինտրոկոնազոլը, Ռիտոնավիրը և այլ դեղերը, որոնք հանդիսանում են լյարդում Ամլոդիպինի չեզոքացման հզոր արգելակիչներ, կարող են բարձրացնել արյան մեջ Ամլոդիպինի մակարդակը՝ առաջացնելով արյան ճնշման լրացուցիչ անկում:

Հղիություն և կրծքով կերակրում

• Ընդհանուր առմամբ, հղիության ընթացքում Ամլոդիպինից պետք է խուսափել, քանի որ չկան հղի կանանց շրջանում այս դեղի անվտանգության վերաբերյալ բավարար տվյլաներ:
• Դեռևս հայտնի չէ, թե արդյոք Ամլոդիպինն արտազատվում է կրծքի կաթի մեջ: Ուստի, կրծքով կերակրող մայրերը ևս պետք է այս դեղից հրաժարվեն:

Դեղաչափեր

• Ամլոդիպինի խորհուրդ տրվող սկզբնական դեղաչափը երեխաների և չափահասների համար 2,5-5 մգ է, օրական մեկ անգամ:
• Չափահասների համար Ամլոդիպինի օրական առավելագույն դեղաչափը 10 մգ է, իսկ երեխաների համար՝ 5 մգ:
• Ամլոդիպինը կարող է ընդունվել սննդի հետ կամ առանց սննդի:
• Ամլոդիպինը չեզոքացվում է լյարդում, ուստի լյարդի գործունեության խանգարմամբ անձանց մոտ օրական դեղաչափը պետք է նվազեցվի:

Դեղաձևեր և պահպանում

Դեղաձևեր

• Հաբեր՝ 2,5 մգ, 5 մգ և 10 մգ դեղաչափերով:

Պահպանում

• Ամլոդիպինը պետք է պահպանել սենյակային ջերմաստիճանային պայմաններում, անլուսաթափանց տուփում:

Ամփոփում

Ամլոդիպինը կալցիումի անցուղիների պաշարիչների խմբին պատկանող դեղ է, որը նշանակվում է կրծքահեղձուկի (ստենոկարդիա՝ սրտի կամ հետկրծոսկրային ցավեր) կանխարգելման համար, որն առաջանում է պսակային զարկերակների կծկանքի և լարվածության հետևանքով: Ամլոդիպինը նաև նշանակվում է բարձր արյան ճնշումը (հիպերտենզիա) բուժելիս: Կողմնակի ազդեցություններից են՝ սրտխփոց, գլխապտույտ, ընդհանուր հոգնածություն, գլխացավ և սրտխառնոց:

Մինչև դեղն ընդունելը հարկավոր է մանրամասն տեղեկանալ և ձեր բժշկի հետ քննարկել ցուցումների և հակացուցումների, կողմնակի ազդեցությունների, այլ դեղերի հետ փոխազդեցության, նախազգուշացումների, հղիության և կրծքով կերակրելու ընթացքում օգտագործման հարցերի մասին: