Բիֆիդոբակտեր - Պրոբիոտիկներ

Ընդհանուր նկարագրություն

Բիֆիդոբակտերը բակտերիաների սեռ է, որոնք ապրում են մարդու ստամոքս-աղիքային խողովակում, բերանի խոռոչում և հեշտոցային խողովակում:

Բիֆիդոբակտերիաները հայտնի են որպես «լավ» բակտերիաներ և անհրաժեշտ են մարսողական և հեշտոցային ուղիների առողջ վիճակի պահպանման համար: Բիֆիդոբակտերիաներն ընդունվում են որպես պրոբիոտիկ հավելումներ՝ մարսողական համակարգը և հեշտոցն օգտակար բակտերիաներով համալրելու համար: Դրանք հատկապես օգտակար են այն մարդկանց համար, ում աղիքները կամ միկրոբիոմը խանգարված են հակաբիոտիկներով բուժման կամ այլ պատճառներով, ինչպիսիք են քիմիոթերապիան կամ ճառագայթային բուժումը:

Բակտերիաների բիֆիդոբակտերիաներ տեսակներն աղիքների, հատկապես նորածինների մոտ ամենամեծաքանակ բակտերիաներից են, որոնք զարգացման տարբեր փուլերում կազմում են ընդհանուր միկրոբիոտայի 40%-ից 90%-ը: Բիֆիդոբակտեր պարունակող պրոբիոտիկային հավելումները օգնում են մարսողական համակարգին քայքայել սնունդը և ներծծել սննդանյութերը, վերականգնել աղիքների նորմալ ֆլորան, արգելակել հիվանդություն առաջացնող ախտածինների աճը և բարելավել տեղային իմունիտետը: Բիֆիդոբակտերը նաև վերահսկում է փորլուծությունը և հեշտացնում է կղանքի ճիշտ ձևավորումը՝ նպաստելով հաստ աղիքում ջրի վերաներծծմանը:

Բրենդային անվանումներ

Align, Bifidobacterium infantis

Ցուցումներ

Բիֆիդոբակտերի օգտագործման առաջարկվող վիճակներից են՝

• հակաբիոտիկների հետ կապված փորլուծություն
• նորածինների և մանկահասակ երեխաների փորլուծություն
• նորածինների նեկրոզացնող էնտերոկոլիտ
• ճանապարհորդների փորլուծություն
• մարսողական համակարգի առողջական վիճակի բարելավում
• գրգռված աղիքի համախտանիշ
• աղիների բորբոքային հիվանդություններ, ինչպիսիք են խոցային կոլիտը և դիվերտիկուլիտը
• հակաբիոտիկների օգտագործումից հետո հեշտոցային կանդիդոզ վարակ։

Մի՛ ընդունեք բիֆիդոբակտերիումային հավելումներ, եթե՝

• գերզգայուն եք պատրաստուկի ցանկացած բաղադրիչի նկատմամբ
• ունեք ընկճված իմունային համակարգ
• ունեք թափածակում (պերֆորացիա) ստամոքս-աղիքային խողովակում։

Կողմնակի ազդեցություններ

Բիֆիդոբակտերի ամենատարածված կողմնակի ազդեցություններից են՝

• ստամոքսի խանգարում
• աղիքային գազեր և փքվածություն
• փորլուծություն
• վարակ (խիստ հազվադեպ):

Նկատի ունեցեք նաև այս խորհուրդները:

• Բիֆիդոբակտերիումի որոշ արտադրանքներ կարող են պարունակել լակտոզ: Ընդունելուց առաջ խորհրդակցեք ձեր բժշկի հետ, եթե պահպանում եք լակտոզազուրկ սննդակարգ:
• Որոշ արտադրանքներ պարունակում են շաքար: Ստուգեք պիտակները և խուսափեք այս տեսակներից, եթե դիաբետիկ եք:
• Անմիջապես դադարեցրեք բիֆիդոբակտերը և դիմեք բժշկի օգնությանը, եթե որևէ ալերգիկ ռեակցիա զգաք:

Փոխազդեցություններ

• Բիֆիդոբակտերի որևէ ծանր կամ լուրջ փոխազդեցություն այլ դեղամիջոցների հետ չի նկարագրվել:
• Բիֆիդոբակտերը կարող է չափավոր փոխազդեցություն դրսևորել հակաբիոտիկների և հակասնկիկային դեղամիջոցների հետ:

• Բիֆիդոբակտերը պետք է օգտագործվի հղիության ընթացքում միայն հստակ ցուցումների դեպքում: Օգտագործելուց առաջ խորհրդակցեք ձեր բժշկի հետ:
• Բիֆիդոբակտերն առկա է կրծքի կաթում: Կրծքով կերակրվող նորածնի վրա ազդեցության մասին տվյալներ չկան, երբ կրծքով կերակրող կինը բիֆիդոբակտերիումային հավելումներ է ընդունում:
• Երբեք մի ընդունեք որևէ OTC կամ բուսական արտադրանք, ներառյալ բիֆիդոբակտեր առանց նախապես ձեր բժշկի հետ խորհրդակցելու, եթե հղի եք կամ կրծքով կերակրում եք:

Դեղաչափեր

Դեղաչափերը կախված են արտադրանքից: Սովորական դեղաչափն է՝ 4 մգ բերանային, օրական մեկ պատիճ:

Ամփոփում

Բիֆիդոբակտերիաները «լավ» բակտերիաներ են, որոնք ընդունվում են որպես պրոբիոտիկ հավելումներ՝ մարսողական համակարգը և հեշտոցն օգտակար բակտերիաներով համալրելու համար: Այս բակտերիաներն առնձնակի օգտակար այն մարդկանց համար, ում աղիքները կամ միկրոբիոմը խանգարված են հակաբիոտիկներով բուժման կամ այլ պատճառներով, ինչպիսիք են քիմիոթերապիան կամ ճառագայթային թերապիան: Բիֆիդոբակտերիումի ընդհանուր կողմնակի ազդեցություններից են՝ ստամոքսի խանգարում, գազեր (մետեորիզմ) և փքվածություն, փորլուծություն և վարակ (հազվադեպ): Խորհրդակցեք ձեր բժշկի հետ, եթե հղի եք կամ կրծքով կերակրում եք: