Բիսակոդիլ

Ընդհանուր նկարագրություն

Բիսակոդիլը լուծողական դեղամիջոց է, որը խթանում է աղիքային կծկողականությունը:

Բիսակոդիլը խթանող լուծողական է: Այն խթանում է բարակ և հաստ աղիքների պատի մկանները՝ առաջացնելով գալարակծկանք: Բիսակոդիլը նաև փոփոխում է աղիներում ջրի և էլեկտրոլիտների մակարդակը՝ բարձրացնելով հեղուկների մակարդակը, որը նույնպես առաջացնում է լուծողականներին նմանվող ազդեցություն:

Ե՞րբ է նշանակվում Բիսակոդիլը

Բիսակոդիլը երբեմն օգտագործվում է որպես փորկապության և աղիների անկանոն գործունեությունը ժամանակավոր թեթևացնող միջոց: Այս դեղը սովորաբար խթանում է աղիքային գալարակծկանքները և կղազատումը 6-12 ժավա ընթացքում:

Բրենդային անվանումներ՝ Dulcolax, Correctol, Bisacolax, Bisac-Evac, Alophen, Fleet Bisacodyl, Feen-A-Mint

Ցուցումներ

Բիսակոդիլն օգտագործվում է որպես հազվադեպ առաջացող փորկապության և աղիների անկանոն գործունեության ժամանակավոր թեթևացում: Այս դեղը սովորաբար խթանում է աղիքների դատարկումը 6-12 ժավա ընթացքում:

Կողմնակի ազդեցություններ

Բիսակոդիլի առաջացարած կողմնակի ազդեցություններից են՝

• աղիքային կծկանքներ
• փորլուծություն
• սրտխառնոց
• փսխում
• վերտիգո (գլխապտույտի տարատեսակ է, որը հաճախ նկարագրվում է որպես պտտվելու, առաջ կամ ետ թեքվելու կամ ճոճվելու շարժողական զգացում, հատկապես, երբ դուք փոփոխում եք մարմնի դիրքը)
• ուղիղ աղիքում այրող ցավեր
• հեղուկների և էլեկտրոլիտների անհավասարակշռություն:

Այլ դեղերի, հավելումների և սննդի հետ փոխազդեցություններ

Որևէ նշանակալի փոխազդեցություն չի նկարագրվում:

Հղիություն և կրծքով կերակրում

• Համարժեք հետազոտություններ չկան, որ գնահատեին հղի կանանց կողմից Բիսակոդիլ օգտագործելու հետ կապված անվտանգությունը և արդյունավետությունը:
• Հայտնի չէ, թե արդյոք Բիսակոդիլն արտազատվում է կրծքի կաթով, ուստի կրծքով կերակրող մայրերը պետք է օգտագործեն զգուշությամբ:

Դեղաչափեր

Հաբեր

• Չափահասներ և 12 տարեկան ու ավելի մեծ երեխաներ՝ 1-3 հաբ (5-15 մգ) բերանային (օրալ), օրական 1 անգամ որպես միանվագ դեղաչափ, մեկ բաժակ ջրով
• 6-12 տարեկան երեխաներ՝ 1 հաբ, բերանային (օրալ), օրական 1 անգամ, մեկ բաժակ ջրով
• Մինչև 6 տարեկան երեխաներ՝ հարցրեք բժշկին:

Ուղիղաղիքային մոմիկ

• Չափահասներ և 12 տարեկան ու ավելի մեծ երեխաներ՝ 1 մոմիկից, բացեք փաթեթը և ներմուծեք հետանցքով դեպի ուղիղ աղիք, օրական 1 անգամ որպես միանվագ դեղաչափ, պահպանեք 15-20 րոպե:
• 6-12 տարեկան երեխաներ՝ ½ մոմիկից, բացեք փաթեթը և ներմուծեք ուղիղ աղիք, օրական 1 անգամ որպես միանվագ դեղաչափ:
• Մինչև 2 տարեկան երեխաներ՝ հարցրեք բժշկին:

Հոգնա

• Չափահասներ և 12 տարեկան ու ավելի մեծ երեխաներ՝ օգտագործեք 1 շշիկ (1.25 oz) որպես միանվագ դեղաչափ:
• Մինչև 12 տարեկան երեխաներ՝ հարցրեք բժշկին:

Դեղաձևեր և պահպանում

Դեղաձևեր

Բիսակոդիլը մատչելի է որպես 5 մգ աղիքալուծ թաղանթապատ խմելու հաբեր, 10 մգ ուղիղաղիքային մոմիկներ և 10 մգ/1,25 oz Բիսակոդիլ պարունակող հոգնայի լուծույթ:

Պահպանում

Բիսակոդիլի հաբերը պետք է պահպանել 20-25° C և խոնավությունից պաշտպանված պայմաններում: Մոմիկները և հոգնայի լուծույթները պահանջում են 30° C-ից ցածր պայմաններ:

Ամփոփում

Բիսակոդիլն առանց դեղատոմս դուրս գրվող դեղամիջոց է, որն օգտագործվում է փորկապությունը և անկանոն աղիների գործունեությունը բուժելու համար: Մինչև դեղն ընդունելը հարկավոր է մանրամասն տեղեկանալ այլ դեղերի հետ փոխազդեցության, նախազգուշացումների, հղիության և կրծքով կերակրելու ընթացքում օգտագործման մասին:

Մինչև դեղն ընդունելը հարկավոր է մանրամասն տեղեկանալ և ձեր բժշկի հետ քննարկել ցուցումների և հակացուցումների, կողմնակի ազդեցությունների, այլ դեղերի հետ փոխազդեցության, նախազգուշացումների, հղիության և կրծքով կերակրելու ընթացքում օգտագործման հարցերի մասին: