Դեղեր և հավելումներ

Ցեֆիքսիմ

Ընդհանուր նկարագրություն

Ցեֆիքսիմը ցեֆալոսպորինների խմբի կիսասինթետիկ բերանային (օրալ) հակաբիոտիկ է:

Ինչպես մյուս ցեֆալոսպորինները, Ցեֆիքսիմը դադարեցնում է բակտերիաների բազմացումը՝ կանխելով բակտերիաները շրջապատող արտաքին պատի (թաղանթի) ձևավորումը: Բակտերիաների մեծ մասը չի կարող գոյատևել առանց բջջային պատի:

Ցեֆիքսիմն ակտիվ է բակտերիաների շատ լայն սպեկտրի դեմ, ինչպիսիք են՝

  • Staphylococcus aureus (ոսկեգույն ստաֆիլոկոկ)
  • Streptococcus pneumoniae
  • Streptococcus pyogenes (ստրեպտոկոկային ֆարինգիտի հարուցիչ)
  • Hemophilus influenzae
  • Moraxella catarrhalis
  • E. coli (աղիքային ցուպիկ)
  • Klebsiella
  • Proteus mirabilis
  • Salmonella
  • Shigella
  • Neisseria gonorrhoeae (գոնոկոկ, որը հարուցում է գոնորեա հիվանդությունը)

ԱՄՆ Սննդի և դեղերի գործակալությունը (FDA) Ցեֆիքիսմը հաստատել է 1989թ․ ապրիլին:

Բրենդային անվանումներ՝ Suprax, Pancef

Ցուցումներ

Ցեֆիքսիմն արդյունավետ է նմանատիպ վարակների համար՝

  • միջին ականջի վարակ (միջին օտիտ)
  • տոնզիլիտ
  • կոկորդի վարակներ (ֆարինգիտ)
  • լարինգիտ
  • բրոնխիտ
  • թոքաբորբ (պնևմոնիա)՝ հարուցված կասկածելի բակտերիաներով:

Այն նաև օգտագործվում է հետևյալ վարակների բուժման մեջ՝

  • միզուղիների վարակներ
  • գոնորեա
  • սուր բակտերիալ վարակ, որը զարգանում է թոքերի քրոնիկ օբստրուկտիվ հիվանդությամբ (ԹՔՕՀ) մարդկանց մոտ:

Կողմնակի ազդեցություններ

Ցեֆիքսիմի տարածված կողմնակի ազդեցություններից են՝

  • փորլուծություն
  • սրտխառնոց
  • որովայնային ցավ
  • փսխում
  • մաշկի ցան:

Այլ կողմնակի ազդեցություններից են՝

  • ջերմություն
  • հոդացավ
  • հոդաբորբ
  • լյարդային թեստերի շեղում
  • վագինիտ
  • քոր
  • գլխացավեր
  • գլխապտույտ:

Այլ դեղերի, հավելումների և սննդի հետ փոխազդեցություններ

  • Պրոբենեցիդը (Բենեմիդը) կարող է մեծացնել արյան մեջ Ցեֆիքսիմի խտությունը՝ նվազեցնելով երիկամի կողմից վերջինիս հեռացումը: Այս փոխազդեցությունը երբեմն օգտագործվում է ցեֆալոսպորինների ազդեցությունը ուժեղացնելու համար:
  • Ցեֆիքսիմը ամինոգլիկոզիդների հետ համատեղելը (օրինակ՝ Տոբրամիցին) առաջացնում է հավելյալ բակտերիաների ոչնչացնող ազդեցություն, սակայն նաև կարող է մեծացնել երիկամների վրա վնասակար ազդեցության ռիսկը:
  • Էքսենատիդը (Բիետտա) կարող է հետաձգել կամ նվազեցնել ցեֆալոսպորինների ներծծումը: Ցեֆալոսպորինները պետք է կիրառվեն էքսենատիդից մեկ ժամ առաջ:
  • Ցեֆիքսիմը կարող է առաջացնել մեզի կետոնների կեղծ դրական թեստ:

Հղիություն և կրծքով կերակրում

  • Հղիության ընթացքում Ցեֆիքսիմի անվտանգությունը հաստատված չէ: Հղի կանանց վերաբերյալ համապատասխան ուսումնասիրություններ չկան: Այնուամենայնիվ, կենդանիների վրա կատարված ուսումնասիրությունները ցույց են տալիս, որ պտղի վրա որևէ կարևոր ազդեցություն չկա:
  • Կերակրող մայրերի մոտ անվտանգությունը հաստատված չէ: Հայտնի չէ, թե արդյոք Ցեֆիքսիմը արտազատվում է կրծքի կաթում:

Դեղաչափեր

  • Չափահասների համար առաջարկվող դեղաչափը միջին օտիտի, տոնզիլիտի, ֆարինգիտի և միզուղիների վարակների դեպքում 400 մգ է՝ օրական մեկ անգամ կամ բաժանված և տրված 200 մգ-ից յուրաքանչյուր 12 ժամը մեկ:
  • Երեխաների համար (6 ամսական և բարձր) առաջարկվում է 8 մգ/կգ/օր՝ օրական մեկ անգամ կամ 4/մգ/կգ երկու դեղաչափից՝ յուրաքանչյուր 12 ժամը մեկ:

Դեղաձևեր և պահպանում

Դեղաձևեր

  • Հաբեր՝ 400 մգ:
  • Հաբեր (ծամելի)՝ 100 և 200 մգ:
  • Կախույթ (սուսպենզիա)՝ 100, 200, 500 մգ/5 մլ:

Պահպանում

  • Հաբերը և բերանային սուսպենզիան կարող են պահվել սենյակային ջերմաստիճանում, 20-25°C ջերմաստիճանային պայմաններում, կիպ փակ տարայի մեջ: Սուսպենզիան խառնելուց հետո կարելի է պահել սառնարանում կամ սենյակային ջերմաստիճանում:

Ամփոփում

Ցեֆիքսիմը ցեֆալոսպորինների դասի հակաբիոտիկ է: Այն նշանակվում է բակտերիալ վարակների բուժման համար: Ուշադիր ծանոթացեք կողմնակի ազդեցություններին, դեղերի փոխազդեցություններին, նախազգուշացումներին ու նախազգուշական միջոցներին, ինչպես նաև հիվանդի վերաբերյալ տեղեկությունները՝ մինչև որևէ դեղամիջոց ընդունելը:

Մինչև դեղն ընդունելը հարկավոր է մանրամասն տեղեկանալ և ձեր բժշկի հետ քննարկել ցուցումների և հակացուցումների, կողմնակի ազդեցությունների, այլ դեղերի հետ փոխազդեցության, նախազգուշացումների, հղիության և կրծքով կերակրելու ընթացքում օգտագործման հարցերի մասին:

Հոդվածը տեղադրվել է՝ 25-07-2023 վերանայվել է՝ 24-08-2023

Հեղինակ

Հեղինակային բոլոր իրավունքները պատկանում են Մեդեքսին։

Ձեզ ներկայացված է մասնագիտական բնույթի նյութ: Հոդվածն ունի նաև ընդհանուր տեղեկատվական նշանակություն, սակայն, եթե դուք բժիշկ չեք, խիստ ցանկալի է որևէ դեղ ընդունելու վերաբերյալ որոշումներ կայացնել միայն ձեր բժշկի հետ միասին

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով