Կլարիթրոմիցին - Հակաբիոտիկներ

Ընդհանուր նկարագրություն

Կլարիթրոմիցինը կիսասինթետիկ մակրոլիդային հակաբիոտիկ է, որը քիմիապես կապված է Էրիթրոմիցինի և Ազիթրոմիցինի հետ:

Կլարիթրոմիցինն արդյունավետ է բազմաթիվ տարբեր բակտերիաների նկատմամբ, այդ թվում՝

• Haemophilus influenzae
• Streptococcus pneumoniae
• Mycoplasma pneumoniae
• Staphylococcus aureus (ոսկեգույն ստաֆիլոկոկ)
• Mycobacterium avium։

Մյուս բոլոր մակրոլիդային հակաբիոտիկների նման Կլարիթրոմիցինը խաթարում է բակտերիաների աճը՝ ազդելով դրանց կողմից սպիտակուց արտադրելու ունակության վրա: Մարդու օրգանիզմում և բակտերիաներում սպիտակուցներն արտադրվում են տարբեր ուղիներով, ուստի Կլարիթրոմիցինը չի ազդում բնական սպիտակուցների արտադրության վրա:

Ամերիկյան Դեղերի և սննդի գործակալությունը (FDA) Կլարիթրոմիցինը հաստատել է 1991 թվականի հոկտեմբերին:

Բրենդային անվանումներ

Biaxin

Օրինակներ

Մակրոլիդային շարքի հակաբիոտիկներից են նաև՝

• Էրիթրոմիցին
• Ազիթրոմիցին։

Ցուցումներ

Կլարիթրոմիցինն արդյունավետ է բազմաթիվ վարակային հիվանդությունները հարուցող կասկածելի բակտերիաների նկատմամբ, այդ թվում՝

• միջին ականջի վարակ (միջին օտիտ)
• նշագեղձերի վարակ (տոնզիլիտ)
• ըմպանի վարակներ (ֆարիգիտ)
• կոկորդի վարակներ (լարինգիտ)
• բրոնխների վարակներ (բրոնխիտ)
• թոքերի վարակներ (թոքաբորբ կամ պնևմոնիա)
• մաշկի վարակներ:

Կլարիթրոմիցինը նաև նշանակվում է Mycobacterium avium-ով հարուցված վարակների բուժման մեջ՝ բակտերիա, որը սերտ կապված է տուբերկուլոզ հարուցող բակտերիայի հետ:

Նախկինում Կլարիթրոմիցինը Օմեպրազոլի հետ զուգակցված նշանակվում էր H. Pylori բուժման մեջ (բակտերիա, որն առաջացնում է ստամոքսի խոց):

Կողմնակի ազդեցություններ

Կլարիթրոմիցինն ընդհանուր առմամբ օգտագործողների կողմից լավ է տարվում, իսկ կողմնակի ազդեցությունները սովորաբար լինում են թեթև ու անցողիկ:

Կլարիթրոմիցինի տարածված կողմնակի ազդեցություններից են՝

• սրտխառնոց
• փորլուծություն
• համի փոփոխություն
• ստամոքսի խանգարում (դիսպեպսիա)
• որովայնային ցավեր
• գլխացավ:

Կլարիթրոմիցինի այլ, հազվադեպ հանդիպող, բայց ծանր կողմնակի ազդեցություններից են՝

• լյարդային անբավարարություն
• սրտի ռիթմի խանգարումներ (առիթմիա)
• լսողության կորուստ
• ցնցումներ:

Կլարիթրոմիցինը չպետք է նշանակվի այն անձանց, ովքեր այս կամ այլ մակրոլիդների (օրինակ՝ Էրիթրոմիցին) նկատմամբ ունեն հայտնի ալերգիա:

Մյուս հակաբիոտիկների նման, Կլարիթրոմիցինը կարող է փոփոխել հաստաղիքային նորմալ բակտերիալ կազմը և նպաստել որոշ բակտերիաների, օրինակ՝ Clostridium difficile-ի գերաճը, որը կարող է առաջացնել հաստ աղու բորբոքում (կեղծ-թաղանթային կոլիտ)`ջրիկ լուծ, բարձր ջերմություն, որովայնային ցավեր, հնարավոր է նաև շոկ: Նան դեպքերում անհրաժեշտ է անհապաղ կապ հաստատել բուժող բժշկի հետ:

Փոխազդեցություններ

Կլարիթրոմիցինը փոխազդում է տարբեր դեղերի հետ, քաի որ ընկճում է դրանց քայքայմանը մասնակցող լյարդային ֆերմենտների ակտիվությունը: Նման փոխազդեցության արդյունքում արյան մեջ այդ դեղերի մակարդակները կարող են աճել՝ բերելով կողմնակի ազդեցությունների հաճախականության կամ ծանրության աստիճանի բարձրացման: Օրինակներից են՝

• Կոլխիցին (Կոլկրիս)
• ստատիններ՝ Սիմվաստատին (Զոկոր), Լովաստատին (Մեվակոր) և Ատորվաստատին (Լիպիտոր)
• Վերապամիլ (Կալան)
• Ամլոդիպին (Նորվազք)
• Դիլթիազեմ (Կարիզեմ):

Կլարիթրոմիցինը բարձրացնում է արյան մեջ Սիլդենաֆիլի (Վիագրա), Տադալաֆիլի (Սիալիս), Վարդենաֆիլի (Լևիտրա), Թեոֆիլինի և Կարբամազեպինի (Տեգրետոլ) մակարդակները, ուստի բարձրացնում է նաև դրանց կողմնակի ազդեցությունների հաճախականությունը կամ ծանրության աստիճանը:

Ռիտոնավիրը (Նորվիր) և Ատազանավիրը (Ռեյատազ) բարձրացնում են, մինչդեռ Էֆավիրենզը (Սուստիվա), Նևիրապինը (Վիրամուն), Ռիֆամպինը նվազեցնում են Կլարիթրոմիցինի մակարդակն արյան մեջ:

Իտրակոնազոլը և Սաքվիավիրը կարող են բարձրացել Կլարիթրոմիցինի մակարդակը, մինչդեռ Կլարիթրոմիցինն իր հերթին կարող բարձրացնել այս երկու դեղերի մակարդակներն արյան մեջ:

Կլարիթրոմիցինի զուգակցումը սրտի ռիթմի վրա ազդող դեղերի հետ (օրինակ՝ Ամիոդարո, Խինիդին և Դիզոպիրամիդ) կարող է առաջացնել առիթմիա:

• Հղիության ընթացքում Կլարիթրոմիցինի անվտանգությունը հաստատող տվյալները բավարար չեն:
• Կլարիթրոմիցինն անցնում է կրծքի կաթի մեջ:

Դեղաչափեր

• Կլարիթրոմիցինը կարող է ընդունվել սննդի հետ կամ առաց դրա:
• Վարակների մեծ մասի համար խորհուրդ է տրվում չափահասներին Կլարիթրոմիցին նշանակել հետևյալ դեղաչափերով՝ 250-500 մգ անհապաղ ազդող հաբեր, օրական 2 անգամ կամ 1000 մգ երկար ազդող հաբեր, օրական մեկ անգամ:
• Կլարիթրոմիցինը սովորաբար նշանակվում է 7-14 օրվա համար:

Դեղաձևեր և պահպանում

Դեղաձևեր

• Հաբեր (անհապաղ կամ երկարատև ազդող)՝ 250 և 500 մգ:
• Օշարակ (սուսպենզիա)՝ 125 և 250 մգ/5 մլ (թեյի գդալ):

Պահպանում

• Հաբերը պետք է պահպանել 15-30°C ջերմաստիճանային պայմաններում: Կարևոր է հաբերը պահել կիպ փակած տուփում:
• Բերանային (օրալ) օշարակը պատրաստելուց հետո չի կարելի պահել սառնարանում և պետք է օգտագործել 14 օրվա ընթացքում:

Ամփոփում

Կլարիթրոմիցինը հակաբիոտիկ է, որը նշանակվում է բազմաթիվ տարբեր բակտերիալ վարակների բուժման մեջ, այդ թվում՝ միջին ականջի, նշագեղձերի, ըմպանի, կոկորդի, բրոնխիոլների, թոքերի և մաշկի վարակային բորբոքումներ: