Դիկլոֆենակ

Ընդհանուր նկարագրություն

Դիկլոֆենակը ոչ ստերոիդ հակաբորբոքային դեղամիջոց (ՈՍՀԲԴ) է, որն օգտագործվում է տարբեր հիվանդությունների ժամանակ առաջացող ցավը, ջերմությունն ու բորբոքումը բուժելու համար:

ՈՍՀԲԴ-ները լայնորեն օգտագործվում են թույլից մինչև չափավոր ցավերը, ջերմությունն ու բորբոքումը բուժելիս: Այս դեղերը նվազեցնում են պրոստոգլանդինների արտադրությունը, որոնք կենսաբանորեն ակտիվ նյութեր են և անմիջականորեն մասնակցում են ցավի, բորբոքման և ջերմության բարձրացման գործընթացներին: Նվազեցնելով օրգանիզմում պրոստոգլանդինների քանակը, Դիկլոֆենակը մեղմացնում է ցավը, բորբոքումը և կարգավորում բարձրացած ջերմությունը։

Տարբեր մարդիկ տարբեր ձև են պատասխանում տարբեր ՈՍՀԲԴ-ներին, ուստի տարօրինակ չէ, որ բժիշկը կարող է նույն մարդու մոտ փորձել մի շարք հակաբորբոքայիններ՝ մինչև գտնի ամենաարդյունավետ ու այդ մարդու առողջական կարիքներին առավել համապատասախող դեղամիջոցը:

Ամերիկյան FDA կազմակերպությունը Դիկլոֆենակը հաստատել է 1998թ. հուլիսին:

Բրենդային անվանումներ՝ Voltaren, Cataflam, Voltaren-XR, Cambia, Zipsor, Zorvolex

Օրինակներ

ՈՍՀԲԴ-ների խմբի այլ դեղերից են՝

• Իբուպրոֆեն
• Ինդոմեթացին
• Նաբումետոն
• Նապրոքսեն նատրիում
• այլ տասնակ դեղեր:

Ցուցումներ

Դիկլոֆենակը նշանակվում է հետևյալ հիվանդությունների գանգատները և մյուս ախտանիշները մեղմացնելու համար՝

• օստեոարթրիտ
• ռևմատոիդ արթրիտ
• անկիլացնող սպոնդիլիտ (Բեխտերևի հիվանդություն):

Կողմնակի ազդեցություններ

Դիկլոֆենակի կողմնակի ազդեցությունների մեծ մասը կապված է ստամոքս-աղիքային համակարգի հետ, օրինակ՝

• ստամոքսի կամ 12-մատնյա աղու (պեպտիկ) խոցի առաջացում
• որովայնում այրոցանման կամ անհարմարավետության զգացում (դիսկոմֆորտ)
• որովայնային ցավեր կամ կծկանքներ (սպազմ)
• սրտխառնոց
• ստամոքսի լորձաթաղանթի բորբոքում (գաստրիտ)
• ստամոքս-աղիքային արյունահոսություն
• լյարդի թունավոր (տոքսիկ) ախտահարում:

Երբեմն ստամոքսի խոցի առաջացումը և արյունահոսությունը կարող են զարգանալ առանց որովայնային ցավերի: Սև ձութանան կղանքը, ընդհանուր թուլությունը և կանգնելիս գլխապտույտը (օրթոստատիկ հիպոտենզիա) կարող են լինել ներքին արյունահոսության միակ նշանները:

Այլ կարևոր կողմնակի ազդեցություններից են՝

• օրգանիզմում հեղուկների պահպանում և այտուցներ
• արյան մակարդուկներ (թրոմբ)
• սրտամկանի ինֆարկտ
• բարձր արյան ճնշում (հիպերտենզիա)
• սրտային անբավարարություն:

Այն անձինք, ովքեր այլ ՈՍՀԲԴ-ների նկատմամբ դրսևորել են ալերգիա, պետք է զերծ մնան Դիկլոֆենակ օգտագործելուց:

ՈՍՀԲԴ-ները նվազեցնում են երիկամների արյունամատակարարումը, որը կարող է թուլացնել երիկամների գործունեությունը: Նման խանգարումն ավելի հավանական է, որ առաջանա երիկամային հիվանդություններով կամ կանգային սրտային անբավարարությամբ անձանց մոտ, ուստի նման դեպքերում հակաբորբոքային դեղերը պետք է նշանակել մեծ զգուշությամբ։

Ասթմայով անձինք ավելի հավանական է, որ ալերգիկ ռեակցիա դրսևորեն Դիկլոֆենակի կամ մեկ այլ ՈՍՀԲԴ-ի նկատմամբ:

Այլ դեղերի, հավելումների և սննդի հետ փոխազդեցություններ

Այլ դեղերի հետ Դիկլոֆենակի փոխազդեցությունը մեծամասամբ կրկնօրինակում է ՈՍՀԲԴ-ների խմբի նույն փոխազդեցությունները:

Հղիություն և կրծքով կերակրում

• Համարժեք տվյալներ չկան այն մասին, թե արդյոք Դիկլոֆենակն արտազատվում է կրծքի կաթի մեջ:

Դեղաչափեր

• Բազմաթիվ հիվանդությունների բուժման համար Դիկլոֆենակի խորհուրդ տրվող դեղաչափն է օրական 100-200 մգ:
• Կախված հիվանդությունից և դեղաձևից, օրական դեղաչափը պետք է բաժանել 2-4 ընդունման վրա:
• Ստամոքսի խանգարումից խուսափելու համար Դիկլոֆենակը պետք է ընդունվի սննդի հետ:

Դեղաձևեր և պահպանում

Դեղաձևեր

• Հաբեր` տարբեր բրենդային անվանումներ արտադրում են տարբեր դեղաչափերով՝ 220, 250, 275, 375 և 500 կամ 550 մգ:
• Սուսպենզիա (կախույթ)՝ 125 մգ/5 մլ (մեկ թելի գդալ):
• Կառավարելի-ազատվող հաբեր՝ 375 և 500 մգ:

Պահպանում

Դիկլոֆենակը պետք է պահպանել 30° C-ից ցածր ջերմաստիճանային պայմաններում և պաշտպանել խոնավությունից:

Ամփոփում

Դիկլոֆենակը ոչ ստերոիդ հակաբորբոքային դեղամիջոց է (ՈՍՀԲԴ), որը նշանակվում է ռևմատոիդ արթրիտին, օստեոարթրիտին, անկիլացնող սպոնդիլիտին, բուրսիտին և դաշտանային կծկանքներին ուղեկցող բորբոքումը և ցավը բուժելու համար:

Մինչև դեղն ընդունելը հարկավոր է մանրամասն տեղեկանալ և ձեր բժշկի հետ քննարկել ցուցումների և հակացուցումների, կողմնակի ազդեցությունների, այլ դեղերի հետ փոխազդեցության, նախազգուշացումների, հղիության և կրծքով կերակրելու ընթացքում օգտագործման հարցերի մասին: